नेपालविरुद्ध भारत : इतिहासले के भन्छ ? (भाग ६)

काठमाडौं । भारत त्यसै पनि नेपालमाथि हाबी छ, त्यसमाथि नेपालले भारतलाई पछिल्ला छ खेलमा हराउन सकेको छैन् । त्यसो भनेको आठ वर्षयता नेपाल भारतविरुद्ध जितविहिन छ ।

हामी नेपाल र भारतबीच सन् दुई हजार दसको दशकमा भएका खेलबारे चर्चा गरिरहेका छौं र यसपल्ट त्यस्ता चार खेलको चर्चा गर्नेछौं, जसको नतिजा सुखद रहेन् । तर त्यसमा नेपालले केही गर्न सक्छ भन्ने विश्वास भने देखिएको थियो ।

इतिहासले के भन्छ, शृंखलाको छैटौं भाग ।

१५. २०१३ नोभेम्बर १९, सिलगुढी

भनिन्छ, सिलगुढीमा पनि फुटबल निकै लोकप्रिय छ, त्यसैले सन् २०१३ मा यही पश्चिम बंगालको सहरले भारत र नेपालबीचको मैत्रीपूर्ण खेलको आयोजना गरेको थियो ।

फेरि सिलगुढी नेपालबाट निकै नजिक पनि छ । संयोग कस्तो रह्यो भने यी दुई छिमेकी देशबीच मैत्रीपूर्ण अन्तर्राष्ट्रिय फुटबल भएको यो नै पहिलो पल्ट हो । त्यो अर्थमा यो ऐतिहासिक रह्यो ।

तर खेल भने भारतको पक्षमा रह्यो र उसले यो खेल २–० ले जित्यो ।

१६. २०१५ मार्च १२, गुवाहटी

यसपल्ट भने विश्वकप छनोटले नेपाल र भारतबीचको खेलको अवसर जुराएको थियो ।

एसियाली विश्वकप छनोटको दोस्रो चरणमा यी दुई देशबीच दुई लेगमा प्ले अफ भएको थियो र त्यसको पहिलो लेग भएको थियो, भारतको गुवाहटीमा । त्यसमा भारत फेरि एकपल्ट २–० ले विजयी रह्यो र छनोटको अर्को चरण पुग्ने सम्भावनालाई जीवन्त राख्न सफल भयो ।

नेपालका लागि यो खेल हार्नुको अर्थ विश्वकप छनोटको यही चरणमा रोकिनु जस्तै थियो ।

१७. २०१५ मार्च १७, काठमाडौं

गुवाहटीमा भएको खेलका पाँच दिन बित्दा नबित्दै नेपालले भारतको आथित्य गरेको थियो, दशरथ रंगशालामा ।

भारतलाई दोस्रो लेगमा दुई गोलको अग्रता त प्राप्त थियो, तर ढुक्क हुन सकेको थिएन् । भारतीय प्रशिक्षक स्टेफन कन्साइटिनले नेपाल वास्तवमै बलियो विपक्षी टिम रहेको पनि माने । उनी नेपालकै पूर्व प्रशिक्षक पनि हुन् ।

यो खेल भने गोलरहित बराबरीमा टुंगियो । यी दुई छिमेकी देशबीचको खेलमा कुनै गोल निस्कन नसकेको यो दोस्रो अवसर मात्र थियो ।