किरण र विक्रम समूहबीच दरार आएकै हो ?

काठमाडौं। फुटबलको सर्वोच्च निकाय फिफाले अखिल नेपाल फुटबल संघ (एन्फा)लाई निलम्बन गरेको ४० दिन बितिसकेको छ। तर, निलम्बन अझै कायम रहेकाले नेपाली फुटबल अन्योलमा छ।

गत २५ जुनमा फिफा काउन्सिल ब्युरोले फिफा विधानको धारा १४ बमोजिम एन्फालाई अर्को सूचना जारी नभएसम्मका लागि निलम्बन गर्ने निर्णय गरेको थियो। उक्त निर्णयसँगै एन्फाले फिफा विधानको धारा १३ अन्तर्गत प्राप्त सबै सदस्यता अधिकार गुमाएको छ।

निलम्बन अवधिभर एन्फाका प्रतिनिधि टोली तथा नेपाली क्लबहरूले कुनै पनि अन्तर्राष्ट्रिय प्रतियोगितामा सहभागिता जनाउन नपाउने फिफाले स्पष्ट पारेको छ। यसले गर्दा आगामी नोभेम्बर ४ देखि बंगलादेशको ढाकामा हुने साफ च्याम्पियनसिपमा नेपालको सहभागिता लगभग असम्भव देखिएको छ।

यही परिस्थितिपछि राष्ट्रिय टोलीका खेलाडीहरूले निलम्बन फुकुवा गर्न फिफा, एएफसी, राष्ट्रिय खेलकुद परिषद् (राखेप) र नेपाल सरकारसँग अपिल गर्न थालेका छन्। तर, उक्त अपिलमा समेत खेलाडीहरू दुई समूहमा विभाजित भएको स्पष्ट देखिएको छ।

विक्रम लामाको नेतृत्वमा रहेको नेपाल फुटबल खेलाडी संघले सार्वजनिक गरिएको भिडियो सन्देशमा सावित्रा भण्डारी ‘साम्बा’, दीप कार्की, अञ्जन विष्ट, एरिक विष्ट, अनन्त तामाङ, प्रीति राई, लाकेन लिम्बू, विमला विक, आयुष घलान, रेखा पौडेल, नबिन लामा, अञ्जिला तुम्बाप्पो सुब्बा, पूजा राना, योगेश गुरुङ, सनिश श्रेष्ठ, रोहित चन्दलगायतका खेलाडीले नेपाली फुटबल जोगाइदिन सम्बन्धित निकायसँग आग्रह गरेका छन्।

तर, त्यसको केही घण्टापछि राष्ट्रिय टोलीका कप्तान किरणकुमार चेम्जोङले छुट्टै भिडियो सन्देश सार्वजनिक गरे। उक्त भिडियोमा उनीसँगै प्रीति र रोहितमात्र देखिएका छन्। एउटै उद्देश्यका लागि गरिएको अपिलसमेत दुई फरक समूहबाट आउनुले राष्ट्रिय टोलीभित्रको विभाजन पुनः सतहमा आएको संकेत गरेको छ।

खेलाडीहरूबीचको यो दूरी नयाँ भने होइन। करिब आठ महिनाअघि विक्रमको नेतृत्वमा अञ्जन विष्ट, सनिश श्रेष्ठ, एरिक विष्टलगायत केही खेलाडीले घरेलु लिग सञ्चालनको माग गर्दै सातदोबाटोस्थित एन्फा मुख्यालयमा धर्ना दिएका थिए। त्यसबेला कप्तान किरणले सक्रिय खेलाडी स्वयं आन्दोलनमा उत्रनु उचित नभएको धारणा सार्वजनिक गरेका थिए।

उनले भनेका थिए, ‘खेलिरहेका खेलाडी आफैं प्रदर्शनमा उत्रिनु नैतिकताले दिँदैन जस्तो लाग्छ। हामी राष्ट्रको प्रतिनिधित्व गर्ने खेलाडी हौं, त्यसैले यस्तो कदम उपयुक्त हुँदैन। खेलाडी संघले एन्फाका पदाधिकारीसँग समन्वय गरेर समस्या समाधान खोज्नुपर्थ्यो, तर खेलाडी आफैं लिग गराउन सडकमा उत्रिनु उचित थिएन।’

कप्तानको उक्त अभिव्यक्तिप्रति असन्तुष्टि जनाउँदै विक्रम नेतृत्वमा रहेको खेलाडी संघका सदस्य अनन्तले भने उनको भनाइको खण्डन गरेका थिए। आफूहरू नेपालको खेलाडी भएको कारण सबैका लागि बोल्नुपर्ने उनले बताएका थिए।

‘हामी राष्ट्रिय टोलीमा छौं भन्दैमा अन्य खेलाडीको पीडा बेवास्ता गर्न मिल्दैन। हामी राम्रो अवस्थामा छौं भनेर मात्र खुसी हुने होइन, सबै खेलाडीको हितका लागि एकजुट भएर बोल्नुपर्छ,’ उनले भनेका थिए।

त्यसयता कप्तान किरण र विक्रमको नेतृत्वमा रहेको समूहबीच दूरी बढ्दै गएको देखिएको थियो। विक्रम समूह लगातार घरेलु फुटबल हुनुपर्ने मागसहित लडिरहँदा किरण भने चुप बस्दै आएका थिए। तर, मंगलबार सार्वजनिक भएका छुट्टाछुट्टै अपिल भिडियोले ८ महिना अगाडि त्यो दरार अझै कायम रहेको संकेत गरेको छ।