भिनिसियसलाई भित्र्याउन आतुर आर्सनल

काठमाडौं। रियल मड्रिड छाडेर भिनिसियस जुनियर आर्सनल जाने चर्चा अझै रोकिएको छैन।

युरोपेली सञ्चारमाध्यमहरूका अनुसार ब्राजिलियन स्टारको रियलसँगको वर्तमान सम्झौता अब एक वर्ष मात्रै बाँकी रहेकाले प्रिमियर लिग च्याम्पियन आर्सनलले उनको अवस्थामाथि नजिकबाट निगरानी गरिरहेको छ।

हालसम्म प्राप्त जानकारीअनुसार भिनिसियसको पहिलो रोजाइ अझै पनि रियलमै छ। तर‚ नयाँ सम्झौतामा सहमति नभए उत्तर लन्डनस्थित आर्सनलमा आबद्ध हुने सम्भावनालाई पनि पूर्ण रूपमा नकार्न सकिँदैन। केही रिपोर्टमा दुवै पक्षबीच व्यक्तिगत सम्झौताका आधारभूत विषयमा सिद्धान्ततः सहमति भइसकेको दाबीसमेत गरिएको छ।

रियलमा किलियन एमबाप्पेको आगमनपछि भिनिसियसको भविष्यबारे निरन्तर चर्चा हुँदै आएको छ। पछिल्ला दुई सिजनमा एमबाप्पे र भिनिसियसले संयुक्त रूपमा १३० गोल गरे पनि टोलीले अपेक्षाअनुसार ठूला उपाधि जित्न सकेन। धेरै विश्लेषकका अनुसार एमबाप्पे, भिनिसियस र जुड बेलिङ्घमजस्ता आक्रामक खेलाडी एउटै टोलीमा हुँदा रणनीतिक सन्तुलनमा असर परेको छ।

यस्तो अवस्थामा यदि भिनिसियस आर्सनलमा पुगे भने उनी टोलीको मुख्य आक्रमणकारी खेलाडी बन्ने अवसर पाउनेछन्। साथै, क्लबको दीर्घकालीन योजनाको केन्द्रमा पनि उनलाई राखिने विश्वास गरिएको छ।

यसैबीच, रियलका नयाँ प्रशिक्षक जोसे मोरिन्होसँग भिनिसियसको सम्बन्धबारे पनि प्रश्न उठिरहेका छन्। गत सिजन बेन्फिकाविरुद्धको खेलमा प्रेस्टियानी घटनापछि मोरिन्होले दिएको प्रतिक्रियाले भिनिसियस सन्तुष्ट नभएको विभिन्न रिपोर्टहरूमा उल्लेख छ। उक्त घटनाले पनि उनको भविष्यको निर्णयमा प्रभाव पार्न सक्ने अनुमान गरिएको छ।

आर्थिक पक्षमा पनि आर्सनल ठूलो प्रस्ताव गर्न तयार रहेको बताइन्छ। भिनिसियसलाई टोलीमा भित्र्याउन क्लबले साताको ४ लाख पाउन्डभन्दा बढी पारिश्रमिक प्रस्ताव गर्न सक्ने चर्चा छ। यदि यस्तो सम्झौता भयो भने उनी बुकायो साकालाई उछिन्दै आर्सनलका सबैभन्दा धेरै पारिश्रमिक पाउने खेलाडी बन्नेछन्।

यद्यपि, हालसम्म रियल र आर्सनलबीच कुनै औपचारिक सम्झौता भएको छैन। त्यसैले भिनिसियसको भविष्य मुख्यतः रियलसँगको नयाँ सम्झौता वार्ता कसरी अघि बढ्छ भन्ने कुरामै निर्भर रहने देखिएको छ।