नेपाल भलिबल संघले एक वर्षमा चार अन्तर्राष्ट्रिय प्रतियोगिता आयोजना गर्ने

काठमाडौं। नेपाल भलिबल संघले २०८३/०८४ को वार्षिक कार्यक्रम सार्वजनिक गर्दै एक वर्षभित्र चार अन्तर्राष्ट्रिय भलिबल प्रतियोगिता आयोजना गर्ने भएको छ।

संघले सार्वजनिक गरेको कार्यक्रमअनुसार नेपालमा सेन्ट्रल एशियन भलिबल एसोसियसन (काभा) महिला च्याम्पियन्स लिग, काभा पुरुष भलिबल च्याम्पियनसिप, काभा पुरुष च्यालेन्ज कप र थ्री नेसन्स कप प्रतियोगिता आयोजना गरिनेछ।

महिला च्याम्पियन्स लिग १ देखि ७ सेप्टेम्बरसम्म काठमाडौंमा हुने तय भइसकेको छ। नेपालले यसअघि २०२४ र २०२६ मा यो प्रतियोगिता आयोजना गरिसकेको छ। गत संस्करण पनि यो प्रतियोगिता नेपालमै हुने तय थियो। तर, जेन्जी आन्दोलनका कारण प्रतियोगिता ताजकिस्तानमा सारिएको थियो। उक्त प्रतियोगितामा नेपाल सहभागी थिएन।

नेपाल २०२४ को उपविजेता हो। २०२६ मा भने नेपाल चौथो भएको थियो। अन्य प्रतियोगिताको मिति भने पछि तय गरिने संघले जनाएको छ।

वार्षिक कार्यक्रमअनुसार राष्ट्रियस्तरमा ३५औं पुरुष तथा २५औं महिला राष्ट्रिय भलिबल प्रतियोगिता, १०औं क्लब भलिबल च्याम्पियनसिप, प्रधानमन्त्री कप, सातौं महिला तथा आठौं पुरुष राष्ट्रिय बीच भलिबल प्रतियोगिता, १९ वर्षमुनिको राष्ट्रिय प्रतियोगिता, महिला फ्रेन्चाइज लिग र पुरुष भलिबल लिग पनि आयोजना गरिनेछ।

त्यसैगरी नेपाली टोलीले जापानमा हुने २०औं एसियाली खेलकुदअन्तर्गत महिला भलिबल, भुटानमा हुने बीच भलिबल प्रतियोगिता तथा माल्दिभ्समा हुने बीच भलिबल प्रतियोगितामा सहभागिता जनाउने कार्यक्रम पनि तय गरिएको छ।