स्तब्ध मेसी

काठमाडौं। कोलम्बस क्रुले आइतबार बिहान भएको एमएलएस खेलमा इन्टर मियामीलाई २–२ को बराबरीमा रोकेको छ। घरेलु टोलीका लागि डेब्यु खेल खेलिरहेका ब्राइस मेन्देजले खेलको अन्त्यतिर फ्रिकिकमार्फत गोल गर्दै टोलीलाई महत्त्वपूर्ण एक अंक दिलाए।

कोलम्बसले यस नतिजासँगै इन्टर मियामीको लगातार ६ खेलको जितको यात्रा अन्त्य गरिदिएको छ। यद्यपि‚ मियामी भने लगातार सात खेलसम्म अपराजित रह्यो। मेन्देजले ८४औं मिनेटमा दायाँतर्फबाट प्रहार गरेको फ्रिकिक कसैले नछोई पोस्टमा लाग्दै गोलमा परिणत भएपछि खेल २–२ को बराबरीमा पुगेको थियो।

अर्जेन्टिनालाई लगातार दोस्रो विश्वकप फाइनलमा पुर्‍याएपछि १२ दिनको विश्राम पाएका लिओनल मेसी ५३औं मिनेटमा वैकल्पिक खेलाडीका रूपमा मैदान प्रवेश गरेका थिए। उनले खेलको अन्तिम समयमा केही राम्रो अवसर सिर्जना गरे पनि गोल गर्न सकेनन्।

कोलम्बसले पहिलो हाफमा मियामीकै आत्मघाती गोलबाट अग्रता लिएको थियो। मियामीका लागि १६औं मिनेटमा लुइस सुआरेजले गोल गर्दै टोलीलाई अग्रता दिलाएका थिए। यो नियमित सिजनका पछिल्ला चार खेलमा उनको सातौं गोल हो।

यससँगै सुआरेज एमएलएस इतिहासमा आफ्नो पहिलो तीन सिजनमध्ये प्रत्येकमा कम्तीमा १० गोल र ५ असिस्ट गर्ने पाँचौं खेलाडी बने। पहिलो हाफको इन्जुरी समयमा नोआ एलेनले हेडमार्फत गोल गर्दै मियामीलाई २–१ को अग्रता दिलाएका थिए।

खराब मौसमका कारण खेल निर्धारित समयभन्दा ४० मिनेट ढिलो सुरु भएको थियो।