सलाहलाई अविश्वसनीय प्रस्ताव

काठमाडौं। इजिप्टका स्टार फरवार्ड मोहम्मद सलाहलाई अनुबन्ध गर्ने प्रतिस्पर्धामा सुरुआतमा बेसिक्तास मात्रै देखिएको थियो।

तर‚ अन्तिम समयमा टर्किस सुपर लिगकै अर्को क्लब ट्राब्जोनस्पोर पनि मैदानमा उत्रिएको छ। सलाहलाई टोलीमा भित्र्याउन क्लबले ठूलो आर्थिक प्रस्ताव अघि सारेको बताइएको छ।

स्थानान्तरण मामिलाका पत्रकार यागिज साबुनचुओग्लुको रिपोर्टअनुसार ट्राब्जोनस्पोरले बेसिक्तासलाई पछि पार्दै सलाहका प्रतिनिधिसँग छलफल सम्पन्न गरिसकेको छ। क्लबले दुई वर्षको सम्झौतासहित वार्षिक १ करोड ७० लाख युरो पारिश्रमिक दिने प्रस्ताव राखेको छ।

रिपोर्टका अनुसार सलाहले परिवारसँग परामर्श गरेपछि मात्र अन्तिम निर्णय लिनेछन्। अहिले जर्सी बिक्रीबाट प्राप्त हुने आम्दानीको हिस्सा मात्रै टुंगो लाग्न बाँकी रहेको छ। खेलाडी पक्षले २० देखि २५ प्रतिशत हिस्सा स्वीकार गर्न सक्ने अनुमान गरिएको छ।

सलाहलाई अनुबन्ध गर्न ट्राब्जोनस्पोरले कुनै स्थानान्तरण शुल्क तिर्नुपर्ने छैन। लिभरपुलसँगको सम्झौतामा अझै करिब एक वर्ष बाँकी भए पनि उनले क्लबसँगको सम्बन्ध अन्त्य गरिसकेका छन्। जुलाई १ देखि उनी स्वतन्त्र खेलाडी (फ्री एजेन्ट) बनेका छन्।

यसअघि बेसिक्तासले पनि सलाहसँग व्यक्तिगत सहमति भइसकेको जनाएको थियो। क्लबले एक वर्षको सम्झौतासँगै अर्को एक वर्ष थप्ने विकल्प राख्दै वार्षिक १ करोड युरो तलब प्रस्ताव गरेको थियो। तर‚ ट्राब्जोनस्पोरले त्यसभन्दा ७० लाख युरो बढी पारिश्रमिक प्रस्ताव गर्दै प्रतिस्पर्धालाई नयाँ मोड दिएको छ।

लिभरपुलमा नौ वर्ष बिताएका सलाहले युरोपमै आफ्नो करिअरलाई निरन्तरता दिने निर्णय गरेको बताइएको छ। यसअघि उनको नाम साउदी प्रो लिगसँग पनि जोडिएको थियो।

सन् २०१९ मा लिभरपुललाई यूईएफए च्याम्पियन्स लिगको उपाधि जिताउन महत्त्वपूर्ण भूमिका खेलेका इजिप्टियन फरवार्ड अहिले फ्री ट्रान्सफरमार्फत नयाँ क्लबको खोजीमा छन्।