मेसीबिनाको इन्टर मियामीलाई मोन्टेरेले हरायो

काठमाडौं। डिएगो रोसीले खेल सकिन एक मिनेट बाँकी छँदा निर्णायक गोल गरेपछि मोन्टेरेले लिग्स कपको समूह चरणमा इन्टर मियामीलाई २–१ ले पराजित गरेको छ। आइतबार बिहान भएको खेलमा इन्टर मियामी आफ्ना स्टार खेलाडी लिओनल मेसीबिना मैदानमा उत्रिएको थियो।

मेसीका पिता जर्ज होर्खे मेसीको निधन भएपछि उनी सोही दिन अर्जेन्टिना फर्किएका थिए। ३९ वर्षीय मेसी क्लबमा कहिले फर्किनेछन् भन्ने विषयमा भने अहिलेसम्म कुनै जानकारी सार्वजनिक भएको छैन।

विश्वकपमा अर्जेन्टिनालाई उपविजेता बनाएपछि मेसीले दुई साताको विश्राम लिएका थिए। त्यसपछि अगस्ट १ मा कोलम्बससँग २–२ को बराबरी खेलेको खेलबाट उनी वैकल्पिक खेलाडीका रूपमा मैदान फर्किएका थिए। त्यसपछि लिग्स कपको पहिलो खेलमा एट्लेटिको सान लुइसविरुद्ध इन्टर मियामीले ४–२ को जित निकाल्दा मेसीले दुई गोलसँगै एक गोलका लागि सहयोग गरेका थिए।

सन् २०२३ को लिग्स कप विजेता इन्टर मियामी गत वर्ष प्रतियोगिताको फाइनलसम्म पुगेको थियो। तर, यसपटक समूह चरणमा एक खेल बाँकी रहँदा टोलीको नकआउट चरणमा पुग्ने सम्भावना कमजोर बनेको छ। इन्टर मियामीले दुई खेलबाट तीन अंक जोडेको छ।

कोलम्बस क्रुबाट जुलाई ३ मा मोन्टेरे पुगेका रोसीले ९०औं मिनेटमा निर्णायक गोल गर्दै आफ्नो नयाँ टोलीलाई महत्त्वपूर्ण जित दिलाए। उनले सन् २०२२ मा लस एन्जलस एफसीबाट खेल्दै एमएलएस गोल्डेन बुट जितेका थिए। त्यसैगरी, उनले कोलम्बस क्रुलाई सन् २०२३ को एमएलएस कप र २०२४ को लिग्स कप उपाधि जिताउन पनि योगदान दिएका थिए।

मोन्टेरेले दोस्रो हाफमा दुई गोल गर्दै पहिलो हाफमा १–० ले पछि परेको स्थिति उल्टाएको थियो। ४७औं मिनेटमा ह्युगो कुइपर्सले बराबरी गोल गरेका थिए। कुइपर्स सन् २०२६ को एमएलएस अल–स्टार टोलीमा परेका खेलाडी हुन्। मोन्टेरेमा आबद्ध हुनुअघि उनले यस सिजन शिकागो फायरका लागि ११ खेलमा १३ गोल गरेका थिए।

इन्टर मियामीका लागि भने रोड्रिगो डे पाउलले ३२औं मिनेटमा गोल गरेका थिए। करिब २५ यार्ड टाढाबाट प्रहार गरेको उनको बल बायाँ पोस्टको भित्री भागमा लाग्दै जाली चुमेको थियो।

गोल गरेपछि खुसी मनाउने क्रममा डे पाउलले केही समय आफ्नो सात नम्बरको जर्सी खोलेर भित्र लगाएको मेसीको १० नम्बरको जर्सी देखाएका थिए। अर्जेन्टिना र इन्टर मियामीका आफ्ना सहकर्मी मेसीको समर्थनमा गरिएको उक्त गतिविधिका कारण डे पाउलले पहेँलो कार्ड पाए।

खेलको १५औं मिनेटमा मोन्टेरेका डिफेन्डर कार्लोस साल्सेडो चोटका कारण मैदानबाट बाहिरिए। उनको स्थानमा होर्खे रोड्रिग्वेज मैदान प्रवेश गरेका थिए। लिग्स कपको समूह चरणका अन्तिम खेलहरू बुधबार हुनेछन्। इन्टर मियामीले घरेलु मैदानमा लियोनको सामना गर्नेछ भने मोन्टेरेले नासभिलको मैदानमा खेल्नेछ।