रोबर्टो अब एलए ग्यालेक्सीमा

काठमाडौं। स्पेनका अनुभवी मिडफिल्डर सर्जी रोबर्टो अमेरिकी मेजर लिग सकर (एमएलएस) क्लब एलए ग्यालेक्सीमा आबद्ध भएका छन्।

३४ वर्षीय रोबर्टोले ग्यालेक्सीसँग २०२८ सम्मको दुई वर्षे सम्झौता गरेका छन्। सम्झौतामा २०२८–२९ सिजनका लागि थप एक वर्ष लम्ब्याउन सकिने विकल्पसमेत रहेको छ।

ग्यालेक्सीले शनिबार रोबर्टोलाई अनुबन्ध गरेको घोषणा गरेको हो। उनी सन् २०२४ मा बार्सिलोनासँगको १८ वर्ष लामो यात्रा टुंग्याएपछि इटालियन सिरी ‘ए’ क्लब कोमोमा आबद्ध भएका थिए। कोमोमा उनले पछिल्ला दुई सिजन बिताएका थिए।

ग्यालेक्सीका महाप्रबन्धक विल कुन्जले रोबर्टोको आगमनले टोलीलाई नेतृत्व, प्राविधिक क्षमता, रणनीतिक बुद्धिमत्ता र उपाधि जितेको अनुभव प्रदान गर्ने बताएका छन्।

‘सर्जीले नेतृत्व, प्राविधिक क्षमता, रणनीतिक बुद्धिमत्ता र च्याम्पियन बन्ने अनुभवको यस्तो संयोजन ल्याएका छन्, जुन निकै कम खेलाडीसँग हुन्छ। उनी आफ्नो पुस्ताका केही उत्कृष्ट टोलीका महत्त्वपूर्ण सदस्य रहिसकेका छन्। जित्नका लागि के आवश्यक हुन्छ भन्ने मात्र होइन, विजेता टोली बन्नुको अर्थ के हो भन्ने कुरा पनि उनी बुझ्छन्,’ कुन्जले भने।

रोबर्टोले सन् २०१० को दशकमा लिओनल मेसीको नेतृत्वमा बार्सिलोनाले प्रभुत्व जमाउँदा टोलीका लागि महत्त्वपूर्ण सेन्ट्रल मिडफिल्डरको भूमिका निर्वाह गरेका थिए। बार्सिलोनामा रहँदा उनले सबै प्रतियोगिता गरी २५ उपाधि जितेका थिए।

१८ वर्षको उमेरमा बार्सिलोनाको पहिलो टोलीमा डेब्यु गरेका रोबर्टोले क्लबका लागि ३७३ खेलमा १९ गोल र ४३ गोलका लागि सहयोग गरेका थिए। सन् २०२३–२४ सिजनमा उनी बार्सिलोनाको कप्तानसमेत बनेका थिए।

बार्सिलोनामा रहँदा उनले सात पटक ला लिगा उपाधि र दुई पटक युरोपेली च्याम्पियन्स लिग उपाधि जिते। त्यसपछि उनी बार्सिलोना पूर्वसहकर्मी सेस्क फाब्रेगासको प्रशिक्षणमा खेल्न इटालीको कोमो पुगेका थिए। कोमोमा दुई सिजन बिताउने क्रममा उनले क्लबलाई इतिहासमै पहिलोपटक च्याम्पियन्स लिगमा छनोट हुने उपलब्धि हासिल गर्न महत्त्वपूर्ण योगदान दिएका थिए।

एलए ग्यालेक्सीमा रोबर्टोले जर्मनीका स्टार मार्को राउससँगै मिडफिल्ड सम्हाल्नेछन्। उनी बार्सिलोनाका पूर्वसहकर्मी रिकी पुजसँग पनि पुनर्मिलन हुनेछन्। चोटका कारण लगातार दुई सिजन गुमाएका पुज सन् २०२७ मा ग्यालेक्सीका लागि पुनः मैदानमा फर्किने अपेक्षा गरिएको छ।

यसैबीच, ग्यालेक्सीले यो सिजन अपेक्षाअनुसार प्रदर्शन गर्न सकेको छैन। टोली हाल पश्चिमी सम्मेलनको १२औँ स्थानमा रहेको छ। यद्यपि, क्लबले सिजनको अन्त्य बलियो बनाउने र सन् २०२७ का लागि टोलीलाई नयाँ स्वरूप दिने उद्देश्यले खेलाडी अनुबन्धमा सक्रियता देखाइरहेको छ।

सन् २०२४ मा कीर्तिमानी छैटौँ एमएलएस कप उपाधि जितेयता ग्यालेक्सीले खेलेका पछिल्ला ५३ एमएलएस खेलमध्ये केवल १२ खेलमा मात्र जित हासिल गरेको छ।

रोबर्टोको अनुबन्धअघि ग्यालेक्सीले सान डिएगो एफसीबाट मेक्सिकोका फरवार्ड हिर्भिङ ‘चुकी’ लोजानोलाई ऋणमा ल्याउने सम्झौता गरेको थियो।

बार्सिलोनाका लागि एक दशकभन्दा बढी समय महत्वपूर्ण खेलाडीका रूपमा खेले पनि रोबर्टोले स्पेनको राष्ट्रिय टोलीबाट भने ११ खेल मात्र खेलेका छन्। उनको उत्कृष्ट समय स्पेनिस फुटबलको मिडफिल्डमा आन्द्रेइ इनिएस्ता, जाभी र सर्जियो बुस्केट्सजस्ता विश्वस्तरीय खेलाडीहरूको दबदबा रहेको समयसँग मेल खाएको थियो।