सविनलाई दुई विकल्प– राष्ट्रिय टोलीमा चढ्ने कि लामो प्रतीक्षा गर्ने?

काठमाडौं। राष्ट्रिय टोलीमा उक्लिन के चाहिन्छ? सहज उत्तर हो, उत्कृष्ट प्रदर्शन। अहिले उमेरसमूहमा भइरहेको त्यस्तो खाले प्रदर्शन हेर्ने हो भने ठ्याक्कै आइहाल्ने नाम हो, सविनकुमार लुंगेली मगर। 

दुई वर्षअघि सातदोबाटोस्थित एन्फा कम्प्लेक्समा आयोजित एन्फा यु–१६ युथ लिगमा संकटा फुटबल क्लबको जर्सीबाट १७ गोल गर्दै चर्चमा आएका मिडफिल्डर सविनको प्रदर्शन अहिले पनि उस्तै छ।

उमेरले १८ टेक्न लागेका सविनले गत वर्ष सोही मैदानमा आयोजित एन्फा यु–१८ लिगमा पनि तहल्कै मच्चाएका थिए। त्यो लिगमा उनले १३ गोल गरे। त्यही मात्रै होइन, २० भन्दा बढी गोलका लागि प्रत्यक्ष सहयोग पनि गरे।

त्यसैले त उनलाई राष्ट्रिय टोलीमा स्थान बनाउन सक्ने पछिल्लो पुस्ताका बलियो दाबेदार खेलाडी मानिन्छ। नेपाली युवा टोलीका मुख्य प्रशिक्षक राजेश शाही दाबी ठोकेरै भन्छन्, ‘सविन हेर्नलायक खेलाडी हुन्। उनी राष्ट्रिय टोलीमा जान योग्य छन्।’

राजेशले राष्ट्रिय टोलीमा जाने योग्य देखे पनि सविनले एउटा ‘अग्नि परीक्षा’ दिन भने बाँकी नै छ। त्यो परीक्षामा उत्रिर्ण भए उनी यसै वर्ष सिधैं राष्ट्रिय टोलीमा उक्लिन सक्छन्। नत्र अझै लामो प्रतीक्षा गर्नुको विकल्प उनीसँग रहने छैन। 

त्यो निर्णयको छिनोफानो भने त्रिपुरेश्वरस्थित दशरथ रंगशालामा शनिबार चीनको युनान युथ फुटबल टोलीसँगको मैत्रीपूर्ण खेलमा अडिएको प्रशिक्षक शाही बताउँछन्।

‘सिनियर खेलाडी विदेश पलायन भएका कारण धेरै ठाउँ खाली छ। त्यो खाली ठाउँ यही युवा टोलीबाट भर्ने तयारी एन्फाले गरेको छ। नाम नै लिएर भन्नुपर्दा सविन एउटा दाबेदार खेलाडी हुन्। तर, उनले हामीले सोचेजस्तो प्रदर्शन गर्नुपर्‍यो,’ उनले भने। 

‘प्लेमेकर’द्वय तेज तामाङ र सुजल श्रेष्ठजस्ता अनुभवी खेलाडी अस्ट्रेलिया पलायन भएको धेरै भइसकेको छ। त्यसैले नेपाली टोलीमा पछिल्लो समय यी दुई खेलाडीको स्थान लिन सक्ने खेलाडीको अभाव खड्किएको छ।

सविन आफैंमा पनि उमेर समूहको घरेलु लिग र अन्तर्राष्ट्रिय प्रतियोगिताको अनुभव बटुलिसकेका खेलाडी हुन्। उनले  गत वर्ष कतारमा भएको एएफसी यु–१७ एसिया कप छनोट पनि खेलिसकेका छन्। घरेलु टोलीविरुद्ध उनी उत्रिँदा नेपालले ५–१ को फराकिलो हार बेहोरेको थियो।

यद्यपि, एक वा दुई खेलको खराब नतिजाले कुनै खेलाडीको योग्यता प्रमाणित हुँदैन। त्यो त उनले विगतमा देखाउँदै आएको प्रदर्शनले जाँच गर्ने हो।

पछिल्लो यु-१८ लिगको नतिजाले भने उनीमा उत्कृष्ट मिडफिल्डर बन्ने क्षमता देखिसकेको शाही दाबी गर्छन्। तर, सविनले शनिबार त्यसरी नै प्रमाणित गर्नुपर्ने उनको भनाइ छ।