बड’लेन्डको जितमा एरोनको गोल

काठमाडौं। एरोन थापाको गोलसँगै बड’लेन्ड एफसीले १३५औं डुरान्ड कपमा पहिलो जित हात पारेको छ।

गुवाहाटीस्थित इन्दिरा गान्धी एथलेटिक स्टेडियममा बिहीबार सम्पन्न समूह ‘एफ’ को खेलमा बड’लेन्डले एफसी आईलाई ३–० ले पराजित गर्दै प्रतियोगितामा सशक्त पुनरागमन गरेको हो।

पहिलो खेलमा नर्थइस्ट युनाइटेडसँग पराजित भएको बड’लेन्डले दोस्रो खेलमा उत्कृष्ट प्रदर्शन गर्दै महत्त्वपूर्ण तीन अंक हात पार्‍यो। टोलीको जितमा रोबिन्सन रेन्डोन, रितुराज मोहन र एरोनले गोल गरे।

रेन्डोनले ५७औं मिनेटमा गोल गर्दै अग्रता दिलाए। यसअघि उनले समान अवसर खेर फालेका थिए। तर, नार्जारीको उत्कृष्ट क्रसलाई हेडमार्फत गोलमा परिणत गर्दै टोलीलाई राहत दिलाए।

खेलको दोस्रो हाफमा प्रशिक्षक विकाश पन्थीले गरेका रणनीतिक परिवर्तन पनि निर्णायक बने। वैकल्पिक खेलाडीका रूपमा मैदान प्रवेश गरेका रितुराज र एरोनले क्रमशः ७८औं र ८२औं मिनेटमा गोल गर्दै बड’लेन्डको जितलाई फराकिलो बनाए।

नार्जारीको फ्रिकिक डिफेन्डरको पर्खालमा लागेर फर्किएको बललाई सदुपयोग गर्दै रितुराजले गोल गरे। त्यसको चार मिनेटपछि एरोनले डिफेन्डरलाई छल्दै पेनाल्टी क्षेत्रभित्र प्रवेश गरेर आकर्षक फिनिसिङसहित तेस्रो गोल थपे।

यस जितसँगै समूह ‘एफ’को प्रतिस्पर्धा थप रोचक बनेको छ। बड’लेन्डले दुई खेलबाट तीन अंक जोडेको छ। पहिलो खेलको ठूलो हारका कारण गोलअन्तर अझै ऋणात्मक भए पनि टोली पुनः उपाधि होडमा फर्किएको छ।

एफसी आई पनि दुई खेलबाट तीन अंकसहित गोलअन्तरका आधारमा दोस्रो स्थानमा छ। नर्थइस्ट युनाइटेड अपराजित रहँदै समूहको शीर्ष स्थानमा छ भने कार्बी आङलोङ मोर्निङ स्टार एफसीले अझै अंकको खाता खोल्न सकेको छैन।