आशीषको उपचारमा करिब १२ लाख रुपैयाँ उठ्यो

काठमाडौं। युवा नेपाली फुटबलर आशीष राईको उपचारका लागि मलेसियास्थित एन पेनाङ एफसीको अग्रसरतामा सञ्चालन गरिएको अभियानबाट करिब १२ लाख रुपैयाँ आर्थिक सहयोग संकलन गरिएको छ।

३ फागुन २०८१ मा त्रिपुरेश्वरस्थित दशरथ रंगशालामा चिनियाँ नयाँ वर्षको अवसरमा नेपाली यू–२३ टोली र युनान प्रान्तीय टोलीबीच मैत्रीपूर्ण फुटबल खेल आयोजना गरिएको थियो। खेलको ३७औँ मिनेटमा युनानका खेलाडी मोरी मेडलेले गरेको ट्याकलका क्रममा आशीष गम्भीर घाइते भएका थिए। उनको बाँया खुट्टाको नली (टिबिया) तीन ठाउँमा भाँचिएको थियो र त्यसयता उनी निरन्तर उपचाररत छन्।

आशिषको उपचार खर्च जुटाउने उद्देश्यले मलेसियाको पेनाङमा आयोजित अन्तर्राष्ट्रिय मैत्रीपूर्ण फुटबल सिरिजमार्फत २१ हजार १४४ मलेसियन रिङ्गिट (करिब ७ लाख ८४ हजार १६१ रुपैयाँ) संकलन गरिएको थियो।

यस अभियानमा ऐक्यबद्धता जनाउँदै अष्ट्रेलियास्थित नेपबोर्न एफसीले थप ४ लाख रुपैयाँ सहयोग प्रदान गरेको थियो। मलेसियाको पेनाङमा सम्पन्न मैत्रीपूर्ण फुटबल प्रतियोगितामा हिमालयन एफसी, एन पेनाङ एफसी र नेपबोर्न एफसीबीच प्रतिस्पर्धात्मक खेल भएका थिए। त्यसैगरी, भेटेरान्सतर्फ पनि विशेष मैत्रीपूर्ण खेल आयोजना गरिएको थियो। एन पेनाङ एफसी भेटेरान्स र झापा भेटेरान्सबीच सम्पन्न उक्त खेलबाट संकलित सम्पूर्ण रकम आशिषको उपचार कोषमा जम्मा गरिएको आयोजकले जनाएको छ।