रोड्रीको रोजाइमा परेन रियल

काठमाडौं। स्पेनिस मिडफिल्डर रोड्री हर्नान्डेजले अन्ततः बार्सिलोनालाई आफ्नो नयाँ गन्तव्य बनाएका छन्।

इङ्ग्लिस क्लब म्यानचेस्टर सिटी छाडेर स्पेन फर्किने निर्णय गरेसँगै रियल मड्रिड र बार्सिलोना दुवैले उनलाई अनुबन्ध गर्न चासो देखाएका थिए। तर, उनले अन्तिममा क्याटलान क्लब रोजेका हुन्।

रोड्रीले आफ्नो निर्णयबारे रियलको व्यवस्थापनलाई औपचारिक रूपमा जानकारी गराइसकेका छन्। रियलले आकर्षक आर्थिक प्रस्ताव गरे पनि उनले त्यसलाई अस्वीकार गर्दै बार्सिलोनामा जाने निर्णय लिएका हुन्।

रियलका अधिकारीहरूसँगको छलफलमा रोड्रीले क्लबप्रति सम्मान व्यक्त गरे पनि जाने विषयमा आफू सधैं द्विविधामा रहेको बताएका थिए। रियलले पनि उनको मनस्थिति बुझ्दै उनको निर्णयको सम्मान गरेको बताइएको छ।

हालै भएको अन्तिम छलफलमा रोड्रीले बार्सिलोना रोज्नुको कारण पनि स्पष्ट पारेका थिए। बार्सिलोनाको खेल शैली, प्रशिक्षक पेप ग्वार्डिओलाको फुटबल दर्शनको प्रभाव तथा स्पेन राष्ट्रिय टोलीका धेरै खेलाडीसँगको तालमेलले आफूलाई बार्सिलोनातर्फ आकर्षित गरेको उनको भनाइ रहेको छ।

रियलले पनि रोड्रीको निर्णयलाई सहज रूपमा स्वीकार गर्दै उनको भविष्यका लागि शुभकामना दिएको छ। क्लबले उनलाई अनुबन्ध गर्ने प्रयास गरे पनि कुनै दबाब वा अनावश्यक विवाद सिर्जना नगरेको बताइएको छ।

सिटीसँग दुई पटक छलफल भए पनि औपचारिक रूपमा स्थानान्तरणबारे कुनै सम्झौता भएको थिएन। यता‚ प्रशिक्षक जोसे मोरिन्होलाई पनि यस अवस्थाबारे जानकारी गराइएको छ। उनले मिडफिल्डमा आवश्यक विकल्प टोलीभित्रै रहेको विश्वास व्यक्त गरेका छन्।

सञ्चारमाध्यमका अनुसार रोड्रीको स्थानान्तरणका लागि बार्सिलोनाले अधिकतम ६ करोड युरो खर्च गर्नेछ। चार वर्षको सम्झौताअनुसार क्लबले उनको पारिश्रमिकका लागि वार्षिक करिब ३ करोड युरो बेहोर्नेछ।