काठमाडौं । नेपालले आसन्न एसियन गेम्समा खेल संख्या घटाउने गरि तयारी थालेको छ ।
युवा तथा खेलकुद मन्त्रालयको आग्रह अनुसार एसियन गेम्सको तयारीमा जुटेको नेपाल ओलम्पिक कमिटीले एसियन गेम्समा नेपालबाट खेल संख्या घटाउने गरि गृहकार्य अघि बढाएको हो ।
एसियन गेम्समा नेपाल संख्यात्मक रुपमा धेरै खेलमा सहभागी हुने तर नतिजा शुन्य प्राय देखिने भएकाले पदकको सम्भावना भएका खेललाई मात्र प्रतियोगितामा सहभागी गराउने गरि तयारी अघि बढेको हो ।
युवा तथा खेलकुद मन्त्री महेश्वर गहतराजले नेपाल ओलम्पिक कमिटी (एनओसी)लाई यस वर्ष चीनमा हुने एसियन गेम्सको तयारी थाल्न निर्देशन दिएका थिए । सोही अनुसार उनले प्रतियोगितामा सहभागी गराउने खेलको टुङ्गो लगाउन एनओसीलाई आग्रह गरेका थिए ।
एसियन गेम्समा सहभागी हुने खेलको टुङ्गो लगाउने समिति गठन भएको छ । जसमा एनओसी महासचिव निलेन्द्रराज श्रेष्ठ, खेल विज्ञ पार्थशारथी सेन गुप्ता, सुमन अधिकारी सहित राखेपका विभागीय प्रमुख समितिमा छन् ।
समितिले विभिन्न खेलका पदाधिकारी र मुख्य प्रशिक्षकसँग छलफल गरि एसियन गेम्समा सहभागी गराउनुको औचित्य पुष्टि गर्न र पदक प्राप्त गर्न सकिने आधार र विगतको प्रर्दशनको समिक्षा गरेको थियो ।
राष्ट्रिय संघसँग छलफल गरेर समितिले प्रारम्भिक ३० खेलको सूची तयार गरेको छ । तर सो सूचीमा समावेश खेललाई करिब आधा संख्यामा झार्ने समितिको तयारी छ ।
‘सबै संघले राम्रो गर्ने दाबी गर्छन् । तर साउथ एसियन गेम्समै पदक ल्याउन नसक्ने गेम्सले एसियन गेम्समा पदक जित्ने दाबी सान्दर्भीक हुँदैन ।’ एनओसी महासचिव निलेन्द्रराज श्रेष्ठले खेलपाटीसँग भने ।
समिति सदस्य समेत रहेका श्रेष्ठले परम्परागत रुपमा जन्ती गए जसरी एसियन गेम्समा सहभागी हुने प्रचलनलाई यसपटक सुधार गर्न लागिएको बताए ।
‘बरु कम खेल लैजाने, छनोट गरेको खेल र खेलाडीलाई राम्रो प्रशिक्षण दिने, अन्तराष्ट्रिय प्रतियोगिता र च्याम्पियनसिपमा सहभागी गराएर खेलाडीलाई एक्सपोजर दिने, राम्रा विदेशी प्रशिक्षक स्वदेश ल्याएर प्रशिक्षण दिने सोचेका छौं ।’ उनले भने ।
पछिल्लो सन् २०१८ मा इन्डोनेसियामा भएको एसियन गेम्समा नेपालले २९ खेलमा सहभागीता जनाएको थियो । इन्डोनेसियाको जाकार्ता र पालेमबङ्ग भएको प्रतियोगितामा नेपालले २९ खेलमा १ सय ८५ खेलाडी उतारेको थियो । तर अन्तिम समयमा बिना तयारी सहभागी बनेको प्याराग्लाइडिङ बाहेक अन्य कुनै खेलबाट खेलाडीले पदक जित्न सकेनन्।
अन्तिम समयमा प्याराग्लाइडिङले पदक जित्नु अघि सम्म नेपाल पदक तालिकामा शुन्य अवस्थामा थियो । नेपाली खेलकुदको इजजत प्याराग्लाइडिङको सोही पदकले जोगाएको थियो ।
एनओसी महासचिव श्रेष्ठ निश्चित मापदण्ड बनाएर यस पटक एसियन गेम्समा सहभागी हुने खेलको टुङ्गो लगाउने बताउँछन् ।
‘मापदण्ड बनाएपछि पदक जित्ने सम्भावना भएका थोरै खेल मात्र छनोट हुन्छन् । दक्षिण एसियामै पदक जित्न नसक्ने खेललाई एसियन गेम्समा सहभागी गराउन सान्दर्भिक हुदैन ।’ उनले भने, ‘चाँडै खेल संख्याको अन्तिम टुङ्गो लगाउनेछौं ।’
