मेसीसँग ढुक्क छ अर्जेन्टिना

काठमाडौं। यस समरमा भएको विश्वकपमा लिओनल मेसीले अझै पनि आफू कति उत्कृष्ट खेल्न सक्छन् भन्ने प्रमाणित गरेका थिए। उनले अर्जेन्टिनालाई लगातार दोस्रोपल्ट फाइनलमा पुर्‍याउन ८ गोल गरेका थिए।

योसँगै अर्जेन्टिना फुटबल संघका अध्यक्ष क्लाउडियो ‘चिकी’ तापिया उनलाई तत्कालन अन्तर्राष्ट्रिय फुटबलबाट बिदा गर्ने मूडमा देखिएका छैनन्।

अर्जेन्टिनाको टेलिभिजनमा दिएको एक अन्तर्वार्तामा तापियाले मेसीले आफ्नो खेलजीवन कहिले अन्त्य गर्ने भन्ने निर्णय पूर्ण रूपमा स्वयंले गर्नुपर्ने बताएका छन्।

तापिया भन्छन्,‘यो पूर्ण रूपमा उनको व्यक्तिगत निर्णय हो। हामीले उनलाई सहज रूपमा खेल्न दिनुपर्छ।’ सन् २०२२ मा मेसीले २०२६ को विश्वकप खेल्छन् कि खेल्दैनन् भन्ने नै निश्चित थिएन। उनले त्यतिबेला एक–एक खेलमा ध्यान दिने बताएका थिए।

‘अहिले हामीले विश्वकपमा मेसीको उत्कृष्ट अझ भनुम सायद उनको करियरकै उत्कृष्ट रूप देख्यौं,’तापिया भन्छन्,‘उनी फुटबल खेल्न रमाइरहन दिनुपर्छ। त्यसपछि उनले आफूलाई सही लाग्ने निर्णय आफैं गर्नेछन्।’ २४ जुनमा ३९ वर्ष पुगेका मेसीले यसअघि विश्वकपको समूह चरणमा अस्ट्रियाविरुद्ध दुई गोल गरेका थिए।

यद्यपि‚ उनले अर्जेन्टिनाका लागि अन्तर्राष्ट्रिय फुटबलबाट कहिले सन्न्यास लिने वा मेजर लिग सकर (एमएलएस) क्लब इन्टर मियामीका लागि अझै कति समय खेल्ने भन्नेबारे कुनै स्पष्ट संकेत दिएका छैनन्।

तापियाले उल्लेख गरेझैं कतारमा सन् २०२२ को विश्वकपमा अर्जेन्टिनालाई फ्रान्सविरुद्ध उपाधि जिताएपछि पनि मेसीको २०२६ को विश्वकप यात्रा निश्चित थिएन। तर‚ यसपटक उनले अर्जेन्टिनाका लागि उत्कृष्ट प्रदर्शन गर्दै ८ गोल र ४ असिस्ट गरेका थिए।

अमेरिकामा गत महिना भएको विश्वकपको फाइनलमा अर्जेन्टिना अतिरिक्त समयमा स्पेनसँग १–० ले पराजित भएको थियो। यस विश्वकपमा मेसीले मिरोस्लाभ क्लोजेको १६ गोलको विश्वकप करिअरको कीर्तिमानसमेत तोडे। तर‚ फ्रान्सका स्टार किलियन एमबाप्पेले प्रतियोगिताको अन्त्यसम्म २२ गोल गर्दै मेसीलाई एक गोलले पछि पारे।

तापियाले मेसीको प्रदर्शनको प्रशंसा गर्दै भने,‘लिओका लागि यो उत्कृष्ट विश्वकप थियो। हामीले निकै आनन्द लियौं र उनीप्रति गर्व गर्नुपर्छ। मैले हरेक क्षणको आनन्द लिएँ। निस्सन्देह, उनी यस विश्वकपमा हाम्रो टोलीका मुख्य खेलाडी थिए। यदि उनको विश्वकप प्रदर्शनलाई विश्लेषण गर्ने हो भने मेरो विचारमा उनी उत्कृष्ट खेलाडी थिए। उनले लगभग हरेक खेलमा नयाँ कीर्तिमान बनाइरहेका थिए।’

सन् २०३० को विश्वकप स्पेन, पोर्चुगल र मोरक्कोमा आयोजना हुनेछ। त्यसबेला मेसी ४३ वर्षका हुनेछन्। उक्त विश्वकपको शतवार्षिकीका अवसरमा अर्जेन्टिना, उरुग्वे र पाराग्वेमा पनि एक–एक खेल आयोजना हुनेछ।

फिफाका अनुसार विश्वकपमा खेल्ने सबैभन्दा पाका गैरगोलरक्षक खेलाडी क्यामरुनका फरवार्ड रोजर मिला हुन्। उनले ४२ वर्ष ३९ दिनको उमेरमा विश्वकप खेलेका थिए। यसैबीच, पोर्चुगलका अर्का महान् फुटबलर क्रिस्टियानो रोनाल्डोले पनि यसपटक ४१ वर्षको उमेरमा विश्वकपमा सहभागिता जनाएका थिए।

उनी अर्को विश्वकप हुँदा ४५ वर्षमा पुग्नेछन्।