काठमाडौं । सहिद स्मारक ए डिभिजन लिग पहिलो पटक काठमाडौं उपत्यका बाहिर सञ्चालन हुदैछ । घरेलु लिगको संरचनामा सुधार हुन नसकिरहेको बेला लिग फुटबल पहिलो पटक उपत्यका बाहिर हुन लागेको हो ।
नेपाली फुटबलको सर्वाधिक सफल क्लब मनाङ मर्स्याङ्दीले पोखरा रंगशालालाई घरेलु मैदानको रुपमा विकास गर्दै पहिलो ‘होम गेम’ आयोजना गर्दैछ ।
उसले पहिलो खेलमा विभागीय टिम पुलिसलाई आतिथ्यता प्रदान गरेको छ । मनाङ नेपाली फुटबलमा काठमाडौं उपत्यका बाहिर घरेलु मैदानमा लिग सञ्चालन गर्ने पहिलो क्लब बनेको छ ।
शनिबार दिउँसो मनाङले पुलिससँग पोखरा रंगशालामा खेल्दै घरेलु फुटबलमा नयाँ इतिहास कायम गर्नेछ । पुलिससँगै मनाङले ब्रिगेड ब्वाइज र च्यासलसँग समेत पोखरा रंगशालामा खेल्नेछन् ।
मनाङले यस सिजन कम्तीमा ६ खेल पोखरा रंगशालामा खेल्न चाहेको थियो । एन्फा समेत यसका लागि तयार थियो । तर अन्य क्लब मनाङसँग पोखरा खेल्न आउन मानेनन् ।
‘डबल राउण्ड रोबिन’ र ‘होम एण्ड अवे’ अनिवार्य नभएका कारण क्लबहरु पोखरा रंगशाला आउन बाध्य थिएनन् । मनाङले क्लबसँग सहमती गरेर तीन खेल पोखरा रंगशाला लैजान सफल भएको हो ।
यस वर्ष मनाङले ‘होम गेम’को प्रयोग पोखरा रंगशालामा गर्न चाहेको छ । अर्को सिजनबाट आफ्ना सम्पूर्ण खेल पोखरा रंगशालामा खेल्ने मनाङको लक्ष्य छ ।
गण्डकी प्रदेश अन्तर्गतको जिल्ला भएका कारण मनाङले पोखरा रंगशालालाई घरेलु मैदानको रुपमा विकास गर्ने निर्णय गरेको हो । क्लबलाई आर्थिक रुपमा बलियो र व्यवसायीक रुपमा सफल बनाउन समेत मनाङले पोखरा रंगशाला रोजेको हो ।
सोही अनुसार मनाङले पहिलो वर्षनै पोखरामा सञ्चालन हुने खेलको सम्पुर्ण आर्थिक भार आफैले उठाएको छ । साथै ‘गेटमनी’ मार्फत आउने रकम समेत क्लब आफैले राख्नेछ ।
पोखरालाई घरेलु मैदानको रुपमा विकास गर्ने क्लबको निर्णयबाट खुसी हुँदै गण्डकी प्रदेश सरकारले यस वर्ष मनाङलाई १० लाख रुपैयाँ प्रदान गरेको छ । मनाङले सो रकम खेलाडी, अफिसियल, तयारीको सन्दर्भमा खर्च गर्नेछ।
ए डिभिजन लिग खेल्ने अधिकांश क्लब काठमाडौं उपत्यका केन्द्रित छन् । सबै क्लब काठमाडौं र ललितपुरका छन् । महङ्गो बन्दै गईरहेको फुटबलको व्यवस्थापन र व्यवसायीक रुपमा काठमाडौं उपत्यकाले मात्र क्लबहरु थेग्न नसक्ने अवस्था छ ।
सोही कारण क्लबहरु काठमाडौं उपत्यका बाहिर जानुपर्ने बाध्यतामा छन् । एन्फाले समेत यसमा क्लबहरुलाई प्रेरित गरिरहेको छ । तर मोफसललाई घरेलु मैदानको रुपमा विकास गरेर लिग खेलाउने मनाङ पहिलो क्लब बनेको छ ।
घरेलु लिगमा फुटबलमा इतिहास कायम गरेको मनाङको कदमले अन्य क्लबलाई समेत मोफसल झर्न प्रेरित गरेको छ । साथै एन्फालाई समेत लिग डबल राउण्डमा सञ्चालन गर्न र होम एण्ड अवेको रुपमा लैजान दबाब बढाएको छ ।
