पोखरामा लिगका ६ खेल लैजान मनाङको प्रस्ताव

काठमाडौं । मनाङ मर्स्याङ्दी क्लबले ए डिभिजन लिगका ६ खेल पोखरामा लैजान एन्फासँग प्रस्ताव गरेको छ । पोखराको रंगशालालाई आफ्नो घरेलु मैदान बनाउने निर्णय गरेको मनाङले आसन्न ए डिभिजन लिगका खेलहरु पोखरा रंगशालामा खेल्न चाहेको हो ।

एन्फा कार्यसमिति सदस्य समेत रहेका मनाङका प्रतिनिधि विजय घलेले लिगका ६ खेल पोखरा लैजान दिन एन्फासँग माग गरेका छन् । घलेले बुधबार एन्फाको लिग कमिटीसँगको बैठकमा आसन्न लिग अन्तर्गत मनाङले खेल्ने कम्तिमा ६ खेल पोखरामा राख्न प्रस्ताव गरेका हुन् ।

मनाङले पोखरालाई आफ्नो ‘होम ग्राउण्ड’ बनाउने तयारी सकेको उल्लेख गर्दै उनले लिग अन्तर्गत मनाङले खेल्न आफ्ना खेल पोखरामा लैजान पाउन प्रस्ताव राखेका हुन् ।

मनाङको प्रस्तावमा एन्फाको लिग कमिटी समेत सकारात्मक देखिएको छ ।

‘मनाङका ६ खेल पोखरा लैजाने विषयमा लिग कमिटीसँग सहमती जुटेको छ । कुन–कुन खेल लैजाने भन्ने विषयमा थप छलफल गरेर टुङ्गो लगाउँछौं ।’ बैठकपछि घलेले खेलपाटीसँग भने ।

घलेले लिग कमिटीसँग बसेर थप गृहकार्य गरेर यस सिजन ६ खेल पोखरा लैजाने तयारी गरिएको बताए ।

यस सिजनको ए डिभिजन लिग कात्तिक २९ गतेबाट सुरु हुदैछ । लिगको दुई चरणको खेल तालिका समेत सार्वजनीक भैसकेको छ । पहिलो चरणमा मनाङले एन्फा कम्प्लेम्समा मसिर १ गते जावलाखेल युथ क्लबसँग खेल्दै प्रतियोगिताको सुरुवात गर्नेछ । दशरथ रंगशालामा मंसिर ४ गते मनाङले लिगको दोस्रो म्याच हिमालयन शेर्पासँग खेल्नेछ ।

तेस्रो चरणपछि लिग अन्तर्गतका आफ्ना ६ खेल मनाङले पोखरा रंगशालामा खेल्न चाहेको हो ।

‘मनाङले ६ खेल पोखरामा गर्न माग गरेको छ । लिग सिंगर राउण्डमा हुने भएकाले ६ खेल भन्दा बढी दिन पनि मिल्दैन । मनाङको प्रस्ताव र मागप्रति एन्फा सकारात्मक छ ।’ एन्फाका महाचिव इन्द्रमान तुलाधरले खेलपाटीसंग भने ।

तुलाधरले पोखरामा लिगका खेलहरु सञ्चालन गर्नका लागि मैदान, सुरक्षा लगायतको तयारीमा जुट्न क्लबलाई आग्रह गरिएको बताए ।

‘मनाङको मागप्रति सरकारात्म छौं । क्लबलाई उपत्यका बाहिर लैजाने एन्फाको नीतिनै हो ।’ उनले भने ।

यस सिजनको लिग सिंगर राउण्ड रोबिनका आधारमा सञ्चालन हुदैन । डबल राउण्ड रोबिनका आधारमा लिग सञ्चालनका लागि एन्फाले आग्रह गरेपनि कोभिडको कारण देखाउँदै सिंगर राउण्डमा मात्र लिग गर्न केही क्लबहरुले दबाब दिएका थिए ।

एन्फाले ए डिभिजनका क्लबहरुलाई काठमाडौं बाहिर जानका लागि आग्रह गर्दै आएको छ । उपत्यका बाहिरका रंगशालालाई घरेलु मैदानको रुपमा विकास गर्न क्लबलाई एन्फाले सुझाव दिईरहेको छ ।

शीर्ष डिभिजनका क्लबले मोफसललाई घरेलु मैदानको रुपमा विकास गर्न सके फुटबलको माहोल र क्लबको आर्थिक प्रगति बढ्ने एन्फाको धारणा छ ।

मनाङले पोखरालाई घरेलु मैदानको रुपमा विकास गर्ने योजना अघि सारेपछि एन्फाले राखेपसँग समन्वय गरेर लिग तथा अन्य खेलका लागि पोखरा रंगशाला मनाङलाई घरेलु मैदानको रुपमा प्रयोग गर्न दिने सहजीकरण गरेको थियो ।