काठमाडौं । मंगलबार साफ च्याम्पियनसिपमा नेपालले श्रीलंकालाई हरायो ।
‘हाइ स्कोरिङ’ खेलमा दक्षिण एसियाको बलियो प्रतिद्धन्दी श्रीलंकामाथि ३–२ को जित निकाल्दै नेपाल साफको अंक तालिकामा शीर्ष स्थानमा उक्लिएको छ ।
फुटबलका जानकार सञ्जिव मिश्र नेपाल साफ च्याम्पियनसिपको अहिलेको अवस्थामा ‘ड्राइभिङ सिट’मा रहेको बताउँछन् ।
के नेपाल उपाधिको बलियो दाबेदार हो त ?
प्रश्न खस्न नपाउँदै मिश्र भन्छन्, ‘अझै धेरै दौड बाँकी छ । तर नेपाल अहिले ‘ड्राइभिङ सिट’मा छ । तुलनात्मक रुपमा फाइनल पुग्न नेपाललाई अरु टिमभन्दा सजिलो अवस्था बनेको छ ।’
नेपालले उद्घाटन खेलमै आयोजक तथा साविक विजेता माल्दिभ्सलाई १–० ले हराएर सनसनीपूर्ण नतिजा निकालेको थियो ।
नेपाललाई जित दिलाउन मनिष डाँगीले विजयी गोल गरेका थिए । मनिषको गोललाई अन्तराष्ट्रिय फुटबलमा नेपालले गरेको उत्कृष्ट मध्यको एक मानिएको छ ।
सोमबार श्रीलंकाविरुद्धको खेल अझै कठिन हुने अपेक्षा गरिएको थियो ।
प्रशिक्षक अब्दुल्लाह अलमुताइरी भन्दै थिए, ‘श्रीलंकाले हामीलाई आश्चार्यमा पार्न सक्छ ।’
तर नेपाली खेलाडीको गति र कौशल अघि श्रीलंकाको खासै जोर चलेन ।
खेल अवधिभर नेपाल नतिजा र प्रदर्शनका आधारमा श्रीलंकामाथि हावीनै देखियो ।
सुमन लामा, अन्जन विष्ट र आयुश घलानले निकै उत्कृष्ट गोल श्रीलंकाविरुद्ध गरे ।
साफ च्याम्पियनसिपको इतिहासमा नेपालको यो उत्कृष्ट सुरुवात हो ।
अर्थात नेपालले साफको इतिहासमा सुरुवाती दुई खेलमा जित निकालेको थिएन ।
साफ फुटबलमा अहिलेसम्म फाइनल पुग्न नसकेको नेपाल १३ औं संस्करणको फाइनल खेल्ने ‘फेबरेट’ टिम बनेको छ ।
नेपालले लिग चरणमा दक्षिण एसियाली फुटबलका चिरप्रतिद्धन्दी बंगलादेश र भारतविरुद्ध खेल्नै बाँकी छ । तर सुरुवाती दुई खेलको प्रर्दशन र नतिजाले नेपाललाई महत्वकाक्षी टिमको रुपमा प्रस्तुत गरिदिएको छ ।
‘साफमा हामीले उत्कृष्ट सुरुवात गरेका छौं ।’ फुटबलका विश्लेषक समेत रहेका मिश्र भन्छन्, ‘साविक विजेता माल्दिभ्सलाई घरेलु मैदानमै हराएका छौं । श्रीलंकाविरुद्ध जुन नतिजा निकालेका छौं । यस हिसाबले अहिलेसम्मै उत्कृष्ट सुरुवात भन्न सक्छौं ।’
साफ च्याम्पियनसिप जिताउने लक्ष्य सहित कुवेती प्रशिक्षक अलमुताइरीलाई नेपाली टिम जिम्मा लगाइएको थियो । नेपाली टिमको प्रर्दशन र नतिजामा उनै अलमुताइरी हाबी देखिन्छन् ।
लिग निर्देशक समेत रहेका मिश्र प्रशिक्षकको रणनीतिनै नेपाली फुटबलले प्राप्त गरेको नतिजाको कारण मान्छन् ।
‘प्रशिक्षकले खेलाडीलाई गरेको ‘मोटिभेसन’नै प्रमुख कारण हो । खेलाडीको क्षमता प्रशिक्षकले सही किसिमले बुझेका छन् । आफुले छनोट गरेका खेलाडीलाई सही किसिमले प्रयोग गरेका छन् ।’ मिश्र भन्छन्, ‘प्रशिक्षकले सही समय, सही स्थानमा सही खेलाडीको प्रयोग गरेको देखिन्छ ।’
-1734842793.webp)
