इलाम ।
‘वान मिस्टेक गेम ओभर’ ।
उल्लेखित भनाई राष्ट्रिय फुटबल टिमका डिफेन्डर रोहित चन्दको लागि तितो अतित हो ।
८ वर्षअघि रोहितको एक गल्तीले घरेलु मैदान साफको उपाधि चुम्ने नेपालको सपना अधुरै रह्यो ।
सन् २०१३ को १० औं संस्करणको साफमा समूह 'ए' बाट अपराजित रहदै समूह विजेताको रुपमा नेपाल सेमिफाइनल पुगेको मात्र थिएन्, उपाधिको दाबेदार भारतमाथि जित निकालेको थियो ।
सोही कारण उपाधिको प्रवल दाबेदारको रुपमा नेपाललाई हेरिएको थियो ।
घरेलु मैदान र घरेलु दर्शक नेपाली टिमका लागि अर्का सहयोगी कारक थिए ।
फाइनल प्रवेशका लागि नेपालको प्रतिद्धन्द्धी थियो, अफगानिस्तान ।
नवौं संस्करणमा समेत नेपालको फाइनल प्रवेशको बाधक अफगानिस्तान नै थियो । त्यसबेला अतिरिक्त समयमा भएको गोल नै निर्णायक बनेको थियो ।
सन् २०१३ को दसौं संस्करणमा समेत नेपालको बाधक अफगानिस्ताननै बन्यो । खेलको सुरुवातमै नेपालले गोल खान पुग्यो । पेनाल्टी क्षेत्र बाहिरबाटै अफगानिस्तानका अनिरुद्दिन अनवरले ११ औं मिनेटमा प्रहार गरेको बल गोलकिपर किरण चेम्जोङको हातमै पुग्यो । तर, किरणले बल फुस्काए । नजिकै रहेका सन्जर अहमदीले त्यही बललाई वान टचमै गोल गर्दै पाहुना टोली १–० ले अघि बढाए ।
यद्दपी निरन्तर आक्रमण बुनेको नेपाललाई गोल फर्काउने आश थियो । घरेलु मैदान भएकाले नेपाली टिम दबाबका बीच खेलिरहेको थियो । अन्ततः त्यही गोल निर्णायक बन्यो । र, अफगानिस्तान लगातार दोस्रोपल्ट फाइनल प्रवेश गर्यो ।
त्यसबेला सबैभन्दा ठूलो अपजस डिफेन्डर रोहित चन्दले बोक्न पर्यो । अफगानी टोलीविरूद्व सेमिफाइनलमा १–० ले पछि रहेको अवस्थामा बराबरी गर्ने एउटा सुनौलो अवसर नेपालसँग थियो ।
भरत खवासमाथी भएको खराब ट्याकलमा सन्दीप राईले फ्रिकिक प्रहार गरेका थिए । सन्दिपको प्रहारमा हेडर प्रयासमा उफ्रिएका विमल घर्तीमगरलाई अफगान गोलकिपर मन्सुर फगिरयारले पेनाल्टी क्षेत्रमा फल गर्न पुगे । रेफ्री सलि अल हेथलोलले ८६ औं मिनेटमा नेपाललाई पेनाल्टीको अवसर दिएका थिए । पेनाल्टीमा आएका थिए, रोहित चन्द ।
उनले हानेको बल गोलकिपर मन्सुरले बचाए । दशरथ रंगशाला स्तब्ध बन्यो।
नेपालले पुन पेनाल्टीको अवसर प्राप्त गर्यो ।
रोहितले बल प्रहार गर्नु अगाबै अफगान खेलाडी पेनाल्टी क्षेत्रमा प्रवेश गरेकाले सहायक रेफ्रीले नेपाललाई पुन: पेनाल्टीको मौका दिए ।
दोस्रोपल्ट पनि रोहितले हानेको बल मन्सुरले पञ्जामा पारे । रोहितले पुनः त्यही स्थानमा प्रहार गरेका थिए, जहाँ पहिलो पटक उनको पेनाल्टी असफल बनेको थियो ।
लगातार दुई पेनाल्टी पाउँदा पनि गोल गर्न नसक्दा नेपाल प्रतियोगिताको सेमिफाइनलबाट बाहिरिएको थियो ।
समर्थकले रोहितको चर्को आलोचना गरेका थिए ।
सो घटनालाई लिएर रोहितले सम्पूर्ण नेपाली तथा नेपाली फुटबल समर्थकसँग सामाजिक सञ्जाल तथा विभिन्न अन्तरवार्तामा माफी मागेका थिए ।
‘पेनाल्टीसंगै धेरैको भरोसा गुमाए । अब राम्रो खेल्दै फेरी विश्वास दिलाउनेछु । पेनाल्टी चुकाएको दबाबमा बस्ने छैन । थप मेहनत गर्नेछु । अफगानिस्तानविरुद्ध पेनाल्टीका निम्ति माफ गर्नुहोला । अर्को पटक पक्कै गोल गर्नेछु ।’ रोहितले त्यसबेला समर्थकहरुसँग माफी माग्दै भनेका थिए ।
नेपाललाई हराउँदै फाइनल पुगेको अफगानिस्तानले उपाधि समेत जित्यो । भारतमाथि २–० जित निकाल्दै अफगानिस्तानले दक्षिण एसियामा आफ्नो प्रभुत्व कायम राखेको थियो ।
यसबीच रोहितले करियरमा निकै उतार चढाव ब्यहोरे ।
सो घटनापछि उनी सामान्य बन्न धेरै कोशिश गरे । मैदानमा आफुलाई केन्द्रित गरे । अभ्यासमा धेरै मेहनत गरे । त्यो घटनाबाट बाहिर निस्कन उनले धेरै मेहनत गर्नुपरेको थियो ।
रोहित अहिले राष्ट्रिय फुटबल टिमको प्रमुख खेलाडी बनेका छन् । एसियामा बलियो मानिने इन्डोनेसियाको लिग खेल्छन् । राष्ट्रिय टिमलाई आफ्नो अनुभव र सिनियरको हिसाबले अघि बढाइरहेका छन् ।
नेपाली टिम साफ फुटबल खेल्न माल्दिभ्समा छ । घरेलु टोली र डिफेन्डिङ च्याम्पियन माल्दिभ्सलाई हराउँदै नेपालले प्रतियोगिताको विजयी सुरुवात गरेको छ । नेपाल पहिलो साफ उपाधिको लक्ष्यमा छ ।
यदी नेपालले साफ जित्छ भने रोहितको प्रर्दशन पक्कैपनि उत्कृष्ट हुनुपर्नेछ । रोहित त्यसका लागि तयार देखिन्छन् ।
विगतको गल्तीलाई सच्चाउने एक अवसर रोहितसँग छ ।
-1734842793.webp)
