अलमुताइरी प्रकरणको 'च्याप्टर क्लोज'

काठमाडौं । केही हप्तादेखि राष्ट्रिय फुटबल टिमका मुख्य प्रशिक्षक अब्दुल्लाहा अलमुताइरी चर्चामा छन् । तर नराम्रो कारणले ।

उनले फुटबल प्रशंसकलाई सम्बोधन गर्दै पदबाट राजीनामा दिने घोषणा गरे । अलमुताइरीले वरिष्ठ उपाध्यक्ष पंकज नेम्वाङ्गलाई राजीनामाको कारण बताए । नेम्वाङ्गकै कारण काम गर्ने वातावरण नपाएको उनको गुनासो थियो ।

अलमुताइरीसंगै विवादमा आए एन्फा वरिष्ठ उपाध्यक्ष नेम्वाङ्ग । नेम्वाङ्गको पछिल्लो एन्फा अध्यक्ष कर्माछिरिङ शेर्पासंग ठिक–ठाक सम्बन्ध चलेको छैन । उनले एन्फाभित्र सुशासन, पारदर्शीता र सामुहिक नेतृत्वको बहश पुन छेड्न खोजेका छन् । तर उनको बहश सोचे जसरी उठिरहेको छैन । नेम्वाङ्ग आफै एन्फा नेतृत्वको आकांक्षी हुन् ।

उनको छेड्न खोजेको बहशलाई अहिलेसम्म धेरैले राजनीतिक खपतको रुपमा बुझेका छन् ।

अध्यक्ष शेर्पाले नेम्वाङ्गलाई ‘मिनिमाइज’ गर्ने अनि नेम्वाङ्गले शेर्पामाथि दुख दिने श्रृङ्खला एन्फामा चलिरहेको छ । यहीँ राजनीतिक दाउपेचमा आईपुगेका छन्, प्रशिक्षक अलमुताइरी ।

उनको फुटबल प्रशंसकमाझ राम्रो लोकप्रियता छ । तर आचरण र व्यहोरा भने छैन । शुक्रबारको एन्फा कार्यसमिति बैठकमा समेत उनको त्यही ब्यहोरा देखाए । बैठकमा चर्किदै-झर्किदै बोल्नेदेखि छलफल कक्षलाई छाडेर हिड्नेसम्मको असोभनीय व्यवहारमा प्रस्तुत भए । राजीनामा प्रकरणबारे छानविन गर्न माग गर्दै अलमुताइरीले एन्फामा निवेदन दिएका थिए । एन्फा कार्यसमितिका सदस्यले प्रशिक्षकको समेत धारणा सुन्न चाहेपछि उनलाई बैठकमा बोलाइएको थियो ।

अलमुताइरीमाथि एन्फा राजनीतिमा मिसिएको ‘बात’ लागेको छ । उनले आफ्ना असन्तुष्टि सामाजिक सञ्जालमा मात्र पोखेनन्, वरिष्ठ उपाध्यक्षमाथि संघीन अरोप समेत लगाए । एन्फाको ‘सेकेन्ड लिडर’माथि अलमुताइरीले लगाएको आरोप अत्यन्त आपत्तीजनक थियो । वरिष्ठ उपाध्यक्षमाथि यत्रो आरोप लगाईसकेपछि उनी आफै मुख्य प्रशिक्षकको जिम्मेवारीबाट हट्न पर्दथ्यो, नभए एन्फाले उनीमाथि कारबाही गर्न पर्दथ्यो । महासचिवलाई सम्बोधन गरेर अलमुताइरीको राजीनामा पत्र एन्फामा भने आएन ।

एउटा प्रशिक्षकले संस्थाको वरिष्ठ उपाध्यक्षमाथि सामाजिक सञ्जालमा अप्रमाणित आरोप लगाउन मिल्दैन । तर फुटबलका प्रशंसकहरु र एन्फा नेतृत्व उनीप्रति नरम देखिए ।

राज्य गरिब भएपछि के हुन्छ भन्ने राम्रो उदाहरण हो, अलमुताइरी प्रकरण ।

उनी जस्ता प्रशिक्षक अनुदानमा आउँछन् । हरेक घटनामा शर्त तेर्साउँछन् । उदण्डता देखाउँछन् । कसैलाई टेर्दैनन्, कसैलाई गन्दैनन् । पदाधिकारीमाथि हिलो छ्याप्छन् । पपुलिस्ट कुरा गर्छन् । प्रोपागान्डा रच्छन् । सिंगो फुटबललाई ‘माझी औला’ देखाउँछन् । जगत हेर्या–हेर्यौ हुन्छ ।

प्रशिक्षकको ‘स्टन्ट’ प्रकरणको छानविन अब मन्त्रालयले गर्ने भएको छ । एन्फा आफैले यसको छानविन गर्न हुन्थेन । घटनामा सबै मुछिएका थिए । वरिष्ठ उपाध्यक्ष र प्रशिक्षक विवादका मुख्य पात्र भैहाले । धेरैले कतै अध्यक्ष पो संलग्न छन् कि भनेर संका गरेका थिए । यसको उच्च स्तरीय छानविन आवश्यक थियो । एन्फाको शुक्रबारको बैठकले घटनाको छानविनका लागि मन्त्रालयलाई सिफारिस गर्ने निर्णय पनि गरेको छ ।

तर एउटा प्रश्न नेपाली फुटबलमा रहिरहनेछ । के अलमुताइरीले सही गरेका थिए ?

पक्कै थिएनन् । कुनै एक प्रशिक्षकले सामाजिक सञ्जालमार्फत फुटबल संघका वरिष्ठ पदाधिकारीमाथि लगाएको आरोप÷आक्षेप सही मानिदैन । प्रशिक्षक त मैदानभित्र व्यस्त हुनुपर्ने हो । तर अलमुताइरीले एन्फा राजनीतिमा युद्धको शंख फुके ।

उनले जे गरे, ठिक गरेनन् । गलत गरे । सामाजिक सञ्जालमा उनको ‘स्टन्ट’संगै सिंगो फुटबल तरंगित बन्यो । बदनाम बन्यो । धेरैले फुटबललाई गाली गरे । एन्फामाथि प्रहार गरे । पदाधिकारीमाथि आक्षेप लगाए । अलमुताइरी कारण देखिए ।

के सिंगो फुटबल भन्दा, सिंगो संस्था भन्दा, सिंगो फुटबल नेतृत्व भन्दा एउटा प्रशिक्षक ठुलो हुन सक्छ ?

पुच्छरले भैसी हल्लाएको सुहाउँछ ? पक्कै सोभनीय देखिदैन ।

त्यसो भए अब कसरी घटना अघि बढ्ला ?

एन्फाले छानविका लागि मन्त्रालयलाई सिफारिस गर्ने निर्णय गरेसंगै अलमुताइरी प्रकरणको अब ‘च्याप्टर क्लोज’ भएको छ । पछिल्ला केही हप्ताको फुटबल विवादले ‘फोर्स ल्यान्डिङ’ गरेको छ । शुक्रबारको एन्फा बैठकमा उपाध्यक्ष वीरबहादुर खड्काले प्रशिक्षकलाई केही ‘नसीहत’ भएपनि दिनुपर्ने धारणा राखेका थिए । तर एन्फा अध्यक्ष शेर्पाले त्यसलाई मानेनन् । प्रशिक्षकमाथि एक्सन लिदा राष्ट्रिय टिमको वर्तमान गति र निर्माण भंग हुने शेर्पाले बताए ।

उनी कम्तिमा अक्टोबरसम्म प्रशिक्षकलाई चलाउन चाहदैनन् । अक्टोबरमा साफ फुटबल छ । शेर्पा साफको नजिकिदो समयमा प्रशिक्षक फेर्न चाहदैनन् । अलमुताइरीलाई नेपाल ल्याउनुको शेर्पाको मुख्य उद्धेश्य पनि साफ फुटबलको उपाधि जित्नु हो ।

आसन्न साफ नेपालले आयोजना गर्ने देखिएको छ । साफ आयोजना लागि अध्यक्ष शेर्पा आफैले पनि धेरै मेहनत गरेका छन् । सरकारसंग ५ करोड रुपैयाँको स्रोत सुनिश्चित गरेका छन् । शनिबार साफलाई १० करोडको विस्तृत प्रस्ताव पठाउँदैछन् । उनी साफ आयोजना मात्र हैन, उपाधि पनि जित्न चाहन्छन् । दक्षिण एसियाली फुटबलको सबैभन्दा ठुलो फुटबल उपाधि शेर्पा आफ्नै कार्यकालमा हासिल गर्न चाहन्छन् ।

उपाधिका लागि प्रतिबद्ध प्रशिक्षक चाहिन्छन्, अलमुताइरीमा शेर्पाको विश्वास देखिन्छ । त्यसैले तमाम विवादका बीच एन्फाले अलमुताइरीको संरक्षण गरेको छ ।

साफको तयारीका लागि एन्फाले भारत, बंगलादेश, सिंगापुर लगायतका देशसंग मैत्रीपूर्ण खेलको तयारी गरिरहेको छ । अबका केही महिना राष्ट्रिय फुटबल टिमले अन्तराष्ट्रिय मैत्रीपूर्ण खेलमा भाग लिनेछ । साफको तयारी गर्नेछ । फुटबलको हितका लागि अलमुताइरी प्रकरणको ‘च्याप्टर’ अहिलेलाई यहीँ बिसाउन आवश्यक छ ।