काठमाडौं । ए डिभिजन क्लब मनाङ मर्स्याङ्दी क्लबलाई पोखरा रंगशाला घरेलु मैदानको रुपमा प्रयोग गर्न दिने गरि सिफारिस गरिएको छ ।
घरेलु फुटबलको लोकप्रिय क्लब मनाङले पोखरालाई घरेलु मैदानको रुपमा विकास गरेर फुटबल गतिविधि अघि बढाउन प्रयास गरिरहेको छ ।
सोमबार अखिल नेपाल फुटबल संघ (एन्फा)का अध्यक्ष कर्माछिरिङ शेर्पा, राष्ट्रिय खेलकुद परिषद् (राखेप)का बोर्ड सदस्य राजेश गुरुङ सहित सरोकारवाला निकायको बैठक पोखरामा बस्यो ।
बैठकले मनाङको घरेलु मैदान पोखरा रंगशालालाई बनाउने विषयमा सहमती जुटाएको छ । साथै मनाङलाई घरेलु मैदानको रुपमा पोखरा रंगशालाको प्रमाणपत्र दिने विषयमा राखेपलाई सिफारिस गर्ने निर्णय गरेको छ ।
राखेप बोर्ड सदस्य राजेश गुरुङले मनाङलाई घरेलु मैदानको रुपमा पोखरा रंगशाला दिने निर्णय केन्द्रबाट हुनुपर्ने बताउँदै राखेपलाई सिफारिस गर्ने निर्णय भएको बताए ।
‘प्रदेशबाट निर्णय गर्दा समस्या पर्न सक्छ । प्रमाणपत्र दिने काम राखेपबाटै होस भनेर सिफारिस गरेका छौं ।’ गुरुङले खेलपाटीसंग भने ।
राखेपले गण्डकी प्रदेशको खेलकुद पूर्वाधार हेर्ने जिम्मेवारी बोर्ड सदस्य गुरुङलाई दिएको छ । संघीय संरचना अनुसार राष्ट्रिय खेलकुद विकास ऐन कार्यान्वयनमा आएपनि नियमावली तथा कार्यविधि बन्न सकेको छैन । ऐन कार्यान्वयनका लागि कार्यविधि जारी नहुदा जिल्ला र प्रदेशमा रहेका राखेपको पूर्वाधार कसको मातहत रहने भन्ने टुङ्गो लागिसकेको छैन । तत्कालका लागि राखेपले देशभरको खेलकुद पूर्वाधार आफ्नै मातहत राखेको छ ।
बोर्ड सदस्य गुरुङले मनाङको पोखरा आगमनसंगै खेलकुदको विकाससंगै गण्डकी प्रदेशको पर्यटनलाई टेवा पुग्ने विश्वास व्यक्त गरे ।
‘साहारा क्लबले पोखराको फुटबललाई लामो समयदेखि योगदान गरिरहेको छ । अर्को क्लब मनाङले पोखरा आउन चाहेको छ । कुनैपनि क्लबले पोखरामा खेलकुद आयोजना गर्दा यहाँको पर्यटनमा टेवानै पुग्छ । खेलकुदको विकास गर्नुपर्छ भन्ने मेरो मान्यता छ ।’ उनले भने ।
स्थापनाकालदेखी काठमाडौंलाई आधार बनाएर घरेलु फुटबल खेलिरहेको मनाङले पोखरालाई घरेलु मैदानको रुपमा विकास गर्न चाहेको छ । व्यवसायीक फुटबललाई अघि बढाउन र एएफसीको क्लब लाइसेन्सिङ पुरा गर्न समेत काठमाडौंका क्लबलाई ढिलोचाँडो मोफसल झर्नुपर्ने बाध्यता छ । मनाङले सोही कारण पोखरालाई घरेलु मैदानको रुपमा विकास गर्न चाहेको हो । मनाङ जिल्ला गण्डकी प्रदेशमा पर्ने हुनाले पोखरा रंगशाला आफ्नालागि उपयुक्त हुने क्लबको बुझाई छ ।
मनाङले घरेलु मैदानका लागि पोखरा रंगशाला उपलब्ध गराउन माग गर्दै राखेपमा निवेदन दिएको थियो । राखेप सदस्य सचिव रमेश सिलवालले घरेलु मैदानका लागि मनाङलाई स्विकृती प्रदान गर्दै जिल्ला खेलकुद विकास समितिमार्फत सम्झौता गर्न पत्राचार गरेका थिए ।
सोमबारको बैठकमा कस्तो प्रतियोगिताका लागि क्लबलाई मैदान उपलब्ध गराउने र मैदान सञ्चालन गर्दा लाग्ने खर्च कसरी ब्यहोर्ने विषयमा छलफल भएको थियो ।
राखेप बोर्ड सदस्य गुरुङले प्रतियोगिता र मैदान सञ्चालन खर्चको विषय केन्द्रबाट निर्णय हुनुपर्ने बताउदै घरेलु मैदानको प्रमाणपत्र समेत राखेपको केन्द्रिय नेतृत्वबाट हस्तान्तरण गर्दा उचित हुने राय राखेका थिए । अब ओलम्पिक भ्रमणमा रहेका राखेप सदस्य सचिव रमेशकुमार सिलवाल स्वदेश फर्किएपछि रंगशाला उपभोग गरेवापत क्लबले तिर्नुपर्ने न्युनतम शुल्क सहित घरेलु मैदानको प्रमाणपत्र हस्तान्तरणको काम हुने बताइएको छ ।
पोखरामा साहारा क्लबले आवसीय एकेडेमी सञ्चालन गरेर फुटबल गतिविधि अघि बढाइरहेको छ । साहाराले हरेक वर्ष आहा–रारा गोल्डकप समेत सञ्चालन गर्छ ।
मनाङले पोखरा रंगशालालाई घरेलु मैदानको रुपमा प्रस्तुत गर्दा साहारा क्लबका केही पदाधिकारीले चित्त दुखाएका छन् ।
मनाङका एक पदाधिकारीका अनुसार पोखरा रंगशालानै मनाङ क्लबले लिने हो कि भन्ने गलत बुझाई देखिएको बताउँछन् । उनले मनाङले हरेक वर्ष खेल्ने केही खेलका लागि मात्र पोखरा रंगशालाको अनुमती मागेको बताउँछन् ।
‘घरेलु मैदानको रुपमा पोखरा रंगशालामा क्लबले केही सिमित प्रतियोगिताका खेल मात्र खेल्ने हो । रंगशालानै क्लबले लिने हैन । केही असमझदारी जस्तो देखिन्छ । तर मनाङले पोखरालाई आधार बनाएर फुटबल गतिविधि अघि बढाउन प्रदेशकै पर्यटन र फुटबल विकासमा टेवा पुग्छ ।’ मनाङका एक पदाधिकारीले भने ।
-1734875597.jpg)
