काठमाडौं । विश्व चर्चित कतारको अस्पेटार अस्पतालमा खुट्टाको उपचार गर्न राष्ट्रिय फुटबल टिमकी स्टार फुटबलर सावित्रा भण्डारी शानिबार कतार प्रस्थान गर्दैछिन् ।
अखिल नेपाल फुटबल संघ (एन्फा)को सहयोग पत्रसँगै कतार फुटबल संघले सावित्राको एन्टेरिएर क्रुसिएल लिगामेन्ट (एसिएल)को शल्यक्रिया गरिदिने भएको हो । साबित्रा आज राति १० बजे कतार उड्दैछिन् ।
सावित्रा नेपालको महिला फुटबलले पाएको अहिलेसम्मकै उत्कृष्ट खेलाडी हुन् । यो तर्कमात्र हैन, सावित्राको प्रर्दशनले यसलाई प्रमाणित गरेको छ । उनले देशमात्र हैन, दक्षिण एसियाली स्तरमा समेत आफुलाई प्रमाणित गरेकी छिन् । अब्बल दर्जाको फरवार्डको रुपमा उभ्याएकी छिन् । दक्षिण एसिया भन्दा बाहिर उनले आफुलाई जाँच्नै पाईनन् । उनले अझै माथिल्लो स्तरको फुटबल खेल्न चाहन्छिन् । यसकालागि उनी प्रयासरत समेत थिईन् ।
तर गत फागुनमा राष्ट्रिय महिला लिगको दौरान उनले चोट बोकिन् । विपक्षी खेलाडीसँग बल खोसे लगत्तै ल्याण्डिङ गर्ने क्रममा उनले चोट बोक्न पुगेकी थिईन् ।
लिगमा दुई खेल अघिनै एपीएफले उपाधि हात पर्दा सावित्राले चोट बोकिन् । चोट लगत्तै एमआरआई गरेकी सावित्राको लिगामेन्ट च्याँतिएको र शल्यक्रिया गर्नु पर्ने रिपोर्टमा देखियो ।
पछिल्लो समय एन्फाले लगातार कतारलाई शल्यक्रियाको लागि पत्र पठाएको थियो । झण्डै ५ महिनापछि मात्रै सावित्राको शल्यक्रिया हुने पक्का भएको हो ।
‘राम्रो उपचारका लागि पर्खिएको थिए । त्यो पुरा हुँदैछ । ५ महिनाको अन्तरालमा उपचार हुनेछ । विश्वस्तरीय अस्पतालको पर्खाइमा थिए । त्यहाँ उपचार हुनुनै राम्रो हो । त्यसका लागि कति समय पर्खिए मतलब भएन । त्यहाँ उपचार गराउन पाउनु ठुलो कुरा हो । अब राम्र्रो भएर फर्कन्छु । प्रतिक्षाको फल मिठो हुन्छ ।’ कतार उड्नुअघि खेलपाटीसँग सावित्राले भनिन् ।
यसअघि एन्फाले राष्ट्रिय टोलीकै दुई सदस्यको अस्पेटारमा उपचार गरेको थियो । अस्पेटारमा उपचार गरेका डिफेण्डर बिक्रम लामा स्वदेश फर्किसकेका छन् । उनि मैदान समेत फर्किसकेका छन् । युवा स्ट्राइकर विमल घर्ति मगरको भने अस्पेटारमै उपचार भैरहेको छ । उनी हाल रिहाबमा छन् । उनको स्वदेश फर्कने टुंगो अझै लागेको छैन ।
लिगमा चोट बोक्दै गर्दा सावित्राले १० खेलमा ४३ गोल गरेकी थिईन् । जसमा ७ ह्याट्रिक रहेको थियो । सावित्राले चौदण्डीगढी नगरपालिकाविरुद्धको पहिलो लेगमा एक्लै १२ गोल गरेकी थिईन् । सावित्रा लिग उपविजेता विभागीय आर्मीविरुद्ध मात्रै गोलविहिन भईन् ।
राष्ट्रिय फुटबल टोलीकी सर्वाधिक गोलकर्ता सावित्राले कतारको अस्पेटारमा हुने शल्यक्रिया र रिहाबबाट फर्किएपछि पनि आफ्नो प्रदर्शनमा कुनै कमी हुन नदिने र अझै मजबुद, बलियो भएर मैदान फर्कनेमा विश्वस्त रहेको बताईन् ।
‘शल्यक्रिया र रिहावपछि कति समय लाग्छ मैदान फर्कन त्यो समय कुर्नुपर्ने हुन्छ । त्यस क्रममा आफ्नो प्रदर्शन गुमाउने छैन । पहिलाको साम्बानै भएर फर्कन्छु । प्रदर्शन घट्ने छैन । झनै बढाएर आउँछु ।’ साबित्राले भनिन् ।
चोट बोकेसँगै सावित्राले पाकिस्तानी लिग गुमाएकी थिईन् । राष्ट्रिय टोलीका चार सदस्य गोलरक्षक अन्जिला तुम्बाप्पो सुब्बा, डिफेण्डर गिता राना, मिडफिल्डर सरु लिम्बु र स्ट्राइकर अनिता केसीले पाकिस्तानी महिला क्लब माषा युनाइटेडबाट खेलेका थिए ।
यसअघि भारतीय आईलिग दुई संस्करण फरक क्लबबाट खेलेकी साबित्राले उच्च प्रदर्शन गर्दै दुबै क्लबलाई उपाधि जिताएकी थिईन् । पहिलो पटक सेथु एफसीलाई उपाधि दिलाएकी साबित्राले दोस्रो पटकमा भने गोकुलम केरेला एफसीलाई उपाधि दिलाएकी थिईन् । घरेलु महिला फुटबलमा एपीएफको एक्लो दबदबा सावित्राकै कारण सम्भव देखिन्छ ।
अब, सावित्राले घरेलु मैदानमा हुने एएफसी महिला एसिया कप २०२२ छनोट खेल गुमाउने भएकी छिन् । समूह एच मा रहेको नेपालले एएफसीको कार्यक्रम अनुसार बलिया थाईल्याण्ड र फिलिपिन्ससँग घरेलु मैदान खेल्नेछ । छनोटको ८ समूहको विजेताले अर्काे बर्ष भारतमा हुने एसिया कप खेल्नेछ ।
तर यो छनोट खेल भने साबित्राले गुमाउने छिन् । सावित्रा नहुँदा नेपाली टोलीले अग्रपंक्तिमा दबाब खेप्ने निश्चित छ ।
‘होम ग्राउण्डमा त्यो प्रतियोगिता खेल्न नपाउँदा दुखी छु । ग्राउण्डमा कहिले फर्कन्छु रिहावपछि थाहा हुन्छ । छनोटमा नेपालले राम्रो गर्नेमा विश्वस्त छु ।’ राष्ट्रिय टोलीको लागि सर्वाधिक ३८ गोल गरेकी सावित्राले भनिन् ।
-1734879364.jpg)
-1734875597.jpg)
