जोर्डनविरुद्ध भरतको त्यो गोल

नमीन ढकाल ।

१० बर्ष अघि । सन् २०११ जुलाई २८ मा राष्ट्रिय फुटबल टोलीले एउटा अप्रत्यासित नतिजा आत्मसाथ गर्यो ।

नेपालले जोर्डनविरुद्ध १–१ गोलको बराबरीको नतिजा निकालेको थियो ।

चार दिनअघि जोर्डनसँग उसको घरेलु मैदानमा ९–० गोल अन्तरले नेपाल पराजित भएको थियो । यस्तो अवस्थामा नेपालले घरेलु मैदान दशरथ रंगशालामा जित वा बराबरीको नतिजा कल्पना गरेको थिएन ।

तर नेपालले घरेलु मैदानमा जोर्डनसंग १–१ गोलको बराबरीको नतिजा निकाल्यो ।

म्याच फिक्सिङका कारण खस्कदो नेपाली फुटबलका लागि जोर्डनविरुद्धको नतिजाले राहत दिएको थियो ।

ब्राजिल विश्वकपको लागि दोश्रो चरणको छनौट खेलमा वरीयता क्रममा ४५ स्थान माथिको जोर्डनसँग पहिलो लेगको नतिजाबाट नेपाली फुटबल पारखी निराश थिए । दोश्रो लेगमा नेपालले कम गोल अन्तर नतिजा अपेक्षा राखेको थियो ।

पहिलो लेगमा करिब १७ हजार जोर्डनी दर्शक समक्ष नेपाली टिम निरिह देखिन्थ्यो । एकपछि अर्को बलले नेपालको जाली चुम्दा खेल बाघ र बाख्राको लडाईझै देखिन्थ्यो । अधिकाश समय गोलरक्षक किरण चेम्जोङको बल रोक्नमै व्यस्त थिए । तर घरेलु दर्शक समक्ष चार दिनपछि जे नतिजा निस्कियो, त्यसको कल्पना न त तत्कालिन कप्तान सागर थापाले गरेका थिए, न प्रशिक्षक ग्राहम रोबर्ट्सले ।

नेपालको स्मरणीय नतिजाका नायक थिए, भरत खवास । भरतको गोलले नेपालले बराबरीको नतिजा निकालेको थियो । नेपाललाई मौसम र मैदानले पनि साथ दिएको थियो । बर्षाले हिलाम्मे बनेको मैदानमा भरतले ८० औ मिनेटमा बराबरी गोल फर्काएका थिए । वैकल्पिक खेलाडीको रुपमा मैदान प्रवेश गरेका भरतले गोलले नेपाललाई विश्वकप छनौटको तेश्रो चरणमा त पुर्याएन तर अवे मैदानको फराकिलो हारमा राहत दिने काम गर्यो । नवप्रवेशी इस्ट टिमोरमाथि दुई लेगमा ७–१ गोल अन्तरको जित निकाल्दै नेपालले विश्वकप छनोटको दोश्रो चरणमा प्रवेश पाएको थियो ।

यसरी भएको थियो त्यो गोल

पहिलो हाफमा गोलरहित बराबरीमा रोकिएको जोर्डनले ६२ औ मिनेटमा नेपालको कमजोर डिफेन्सको फाइदा उठाउदै शहिद मोहम्मद मुरजानको हेड गोलबाट अग्रता बनाएको थियो । एक गोलले पछि परेको नेपाली टोलीमाथि जोर्डनले दबाब सृजना गरिरहेको थियो । तर हिलाम्मे मैदानको फाइदा नेपाली टोलीले उठायो । मैदानका कारण जोर्डनका खेलाडीले बललाई नियन्त्रणमा राख्न असफल देखिन्थे ।

६६ औ मिनेटमा बिराज महर्जन र भोला सिलवालको स्थानमा जुमानु राई र भरत मैदान प्रवेश गरे । ८० औ मिनेटमा सन्दिप राईले फ्रिकिकमार्फत सन्तोष साहुखललाई पास दिएका थिए । सन्तोषले पेनाल्टी बक्स बाहिर रहेका सुजल श्रेष्ठलाई क्रस दिए । तर सुजल भन्दा पहिला अनमार्क रहेका भरतले प्रहार गरिदिए । उनको प्रहार गोलरक्षक इलामैरेलाई बिट गराउँदै जाली चुमेको थियो । दशर्कको तालीले दशरथ रंगशाला गुञ्जयमान बनेको थियो ।

भरत यसरी सम्झन्छन्

‘जोर्डनको मैदानमा ९–० को फराकिलो हारले हाम्रो मनोबल गिरेको थियो । घरेलु मैदानमा कम्तिमा बराबरी वा कम गोल खाने रणनीति थियो ।’ भरत सम्झन्छन् ‘ घरेलु दर्शकको साथले मनोबल समेत बढेको थियो । तर एउटा अवसरलाई पुरा सदुपयोग गर्न पाए ।’

जोर्डनविरुद्धको दुवै लेगमा भरत वैकल्पिक खेलाडीको रुपमा बेञ्चमा थिए ।

‘सन्दिप (सन्दिप राई)को फ्रिकिकमा सन्तोष साहुखलले सुजल (सुजल श्रेष्ठ)लाई पास दिएका थिए । तर मैले भाई छाड्दे भनेर कल गरे । सुजलले बल छाड्यो । म स्पिडमा थिए । मार्कनै नरहेको अवस्थामा आएर हानेको गोलनै भयो ।’ उनी सम्झन्छन् ‘त्यो गोल गरेपछि हजारौ दर्शकबीच खुशीको वर्णननै गर्न सक्दिन ।’

८ वर्षपछि १५ अक्टोबर सन् २०१९ मा अम्मानमै विश्वकप छनोटको पहिलो लेगमा नेपालले जोर्डनसँग ३–० को पराजय भोग्दा भरत टिममा थिएनन् । चोटका कारण राष्ट्रिय टोलीमा नअटाएका उनी दोश्रो लेगमा समेत मुख्य प्रशिक्षक अब्दुल्लाह अल्मुताइरीको नजरमा परेनन् । जोर्डनविरुद्धको त्यो नतिजाको साक्षी किरण चेम्जोङ र रोहित चन्द मात्र अहिले राष्ट्रिय टोलीमा छन् । त्यो समय गोलरक्षकको भूमिकामा मात्र रहेको उनी अहिले कप्तानको भूमिका निर्वाह गरिरहेका छन् ।