काठमाडौं । नेपाल सुपर लिग (एनएसएल) को तालिकालाई लिएर सुरुमै धेरै प्रश्न उठेका थिए । लगातारको खेल अनि खेलाडीलाई रिकभरीको समय नपुग्ने प्रश्न आयोजक सामु तेर्सिएका थिए ।
एनएसएलका निर्देशक श्रियन्स कार्कीले फिफाको नियम अनुसारनै समय पुर्र्याएर तालिका सार्वजनिक गरेको बताएका थिए । उनले फिफाको नियम अनुसार ४८ घण्टा समय छुट्टाएर खेल तालिका सार्वजनिक गरेको बताएका थिए । उनको जिकिर थियो, छोटो समयका कारण धेरै समय ग्याप राख्न सकिएन ।
प्रिमियर लिग फुटबलको प्रसङ्ग कोट्याउँदै उनले भनेका थिए, ‘प्रिमियर लिगमा लामो समयको खेल तालिका छ । त्यसमा ७२ घण्टा अनिवार्य क्लबलाई विश्राम दिनु पर्ने भन्ने छ । तर, हामीले छोटो समयमा लिग सक्नु पर्नेछ । त्यसैले हामीले कम्तिमा पनि ४८ घण्टा सबै क्लबलाई रिकभरी समय दिएका छौ ।’
एनएसएलको तेस्रो चरणको खेल नसकिदै व्यस्त खेल तालिकाले खेलाडी र क्लबलाई समस्यामा पारेको छ । पर्याप्त रिकभरीको समय नपाएको उल्लेख गर्दै क्लबहरुले खेलाडी गुमाउनुपरेको दुखेसो पोख्न थालेका छन् ।
तेस्रो चरणको खेल नसकिदै धनगढी फुटबल क्लबका प्रशिक्षक युगल किशोर राईले खेलाडीले रिकभरी हुने समय नपाएको गुनासो गरेका छन् । लगातारको खेलका कारण खेलाडीको मसल्समा समस्या भइरहेको बताए । उनले खेलाडीको मसल्समा आएको समस्याका कारण खेलाडीले सोचे अनुसारको प्रदर्शन गर्न नसकेको उल्लेख गरे ।
उनले भने, ‘रिकभरी समय थोरै छ । यो सबै क्लबलाई यस्तै हो । तर कसलाई कति पर्यो भन्ने ठुलो विषय हो । चोटकै कारण हामीले केही खेलाडी गुमाईसकेको छौ । अब रिकभरी समय कसरी मिलाउने समस्या भइरहेको छ । किनभने हाम्रो खेल तालिका छिटो–छिटो छ ।’
तालिकालाई नियाल्दा सबैभन्दा मारमा धनगढी एफसी परेको छ । धनगढी एक्लो टोली हो, जसले लगातार चार खेल ४८ घण्टाको अन्तरालमा खेल्नु पर्नेछ । धनगढीले पहिलो खेल १२ गते विराटनगर सिटी एफसीसँग खेल्यो । लगातार ४८ घण्टको फरकमा १४ र १६ गतेको खेलिसकेको छ । अब ४८ घण्टाको अन्तरालमा धनगढीले १८ गते चितवन एफसीसँग आफ्नो चौथो खेल खेल्दैछ । त्यसपछि पाँचौ खेलका लागि धनगढीलाई ९६ घण्टाको रिकभरी समय छ ।
जेठ १ बाट अखिल नेपाल फुटबल संघ एन्फाले विश्वकप छनोटका लागि बन्द प्रशिक्षणको तयारी थालेको छ । विश्वकपको तयारी नजिकिदै गएकाले सिमित समयमा लिग सक्नै पर्ने भएर खेल तालिका टाइट भएको एनएसएलका निर्देशक कार्कीले बताए । उनले लिग छोटो समयमा सक्नु पर्ने भएकाले विवादरहित तालिका सार्वजनिक गरेको विश्वास व्यक्त गरेका थिए । उनले तीन टिमले ४८ घण्टा कम्तिमा समय पुर्याएर खेल्नु पर्ने बाध्यता भएकाले तालिकामा समस्या जस्तो देखिएको हुन सक्ने धारणा राखे ।
एनएसएलको सम्पुर्ण प्राविधिक सहयोग एन्फाले गरेको हो । तर तालिकालाई लिएर सुरुमै केही क्लब र प्रशिक्षकले आपत्ती जनाएका थिए । सार्वजनीक रुपमा मुख नखोले पनि धेरैले काठमाडौं रेजर्सको खेल्ने तालिकालाई लिएर असन्तुष्टि जनाएका छन् । घरेलु फुटबलमा नतिजालाई प्रभावित पार्न अनेक दाउपेच हुन्छ । एनएसएलका खेल सुरु नहुँदै तालिकाबाट दाउपेच सुरु भएको केही क्लब र पदाधिकारीको आरोप छ ।
तालिकामा धेरै क्लबले ४८ घण्टामा खेल्नुपर्ने बाध्यता छ । तर काठमाडौं रेजर्सले सबै खेल ७२ घण्टाको अन्तरमा खेल्नेछ । काठमाडौं रेजर्स त्यही टिम हो, जहाँ ए डिभिजन लिग कमिटीका संयोजक बिज्ञान राज शर्मा टिमको कार्यकारी निर्देशक छन् । तत्कालिन राष्ट्रिय टिमका मुख्य प्रशिक्षक बालगोपाल महर्जनले टिम सम्हालेका छन् । राष्ट्रिय टिमकै म्यानेजर मधुशुदन उपाध्यायले टोलीलाई व्यवस्थापन गरिरहेका छन् । एन्फाकै हर्ताकर्ता सम्मिलित काठमाडौं रेजर्सले खेल तालिकामा अरु टिम भन्दा धेरै आराम पाउनुलाई धेरैले शंकाको दृष्टिकोणले हेरेका छन् । टिमले तालिका प्रभावित बनाएको धेरैको आरोप छ ।
ललितपुर सिटीसँग लिगको उद्घाटन खेल खेलेको काठमाडौंले सुरुवाती चार खेलसम्म कम्तीमा पनि ७२ घण्टाको रिकभरी समय पाएको छ । उद्घाटन खेलपछि १४ र १७ गतेको खेलका लागि ७२ घण्टाको समय पाएको काठमाडौंले चौथो खेलका लागि भने ९६ घण्टाको विश्राम समय पाएको छ ।
बुटवल लुम्बिनीले पनि सुरुवाती समय चार खेलमा ७२ घण्टाको रिकभरी समय पाएको थियो । त्यसपछिका दुई खेल ४८ घण्टाको अन्तरालमा खेल्नु पर्नेछ । तालिका अनुसार सबैभन्दा मारमा परको अर्को टोली हो, पोखरा थन्डर्स । पोखराले कुनै पनि खेलमा ९६ घण्टाको रिकभरी समय पाएका छैन । सुरुवाती दुई खेलमा ७२ घण्टाको अन्तरालमा खेले पनि त्यसपछिका दुई खेल र अन्तिम खेल ४८ घण्टाको अन्तरालमा पोखराले खेल्नु पर्नेछ ।
एफसी चितवनले पनि तीन खेल ४८ घण्टाको अन्तरालमा खेल्नु पर्नेछ । तर, चितवनले ४८ घण्टामा खेल्नु पर्ने खेलअघि र पछिका खेलमा ७२ र ९६ घण्टाको विश्राम पाएको छ ।
पहिलो खेलपछि ललितपुरले क्रमश दुई खेल ४८ र ७२ घण्टाको अन्तरालमा खेल्दै छ । उसले एक खेल खेलका लागि ९६ घण्टाको रिकभरी समय पाएको छ । विराटनगरले पनि पहिलो खेलपछि दुई खेल ४८ र तीन खेल ७२ घण्टाको अन्तरालमा खेल्नुपर्नेछ ।
टिमका एक व्यवस्थापकले नियम नपुर्याएर टाईसिट सार्वजनिक गरिएको बताए ।
‘संसारभरको अभ्यास अनुसार फरम्याट बनाएर टिमले टाईसिट ड्र गर्ने प्रचलन छ । तर यहाँ आफ्नो हिसाबले टाईसिट बनाएर सबै टिमलाई बाँड्ने काम भयो ।’ उनले भने, ‘यसले कुनै टिमलाई धेरै फाईदा भएको छ । कुनै टिमलाई धेरै घाटा भएको छ ।’
-1734879364.jpg)
-1734875597.jpg)
