नेपाल बास्केटबल लिगको प्ले अफ खेल आजबाट
काठमाडौं । नेपाली बास्केटबल खेलकै सर्वाधिक ठुलो प्रतियोगिता क्विक्स नेपाल बास्केटबल लिगको प्ले अफ खेल आजबाट सुरु हुँदैछ ।
त्रिपुरेश्वरस्थित राखेपको कबर्ड हलमा हुने पहिलो प्ले अफ खेलमा नेपाल पुलिस क्लब र गोल्डेनगेट इन्टरनेसनल बास्केटबल क्लबबीच प्रतिस्पर्धा हुनेछ ।
यस्तै दोस्रो खेलमा साबिकको विजेता त्रिभुवन आर्मी क्लब र टाइम्स इन्टरनेसनल बास्केटबल क्लबले प्रतिस्पर्धा गर्नेछन् ।
पहिलो प्ले अफ खेल साँझ ५ बजे दोस्रो खेल ७ बजे सुरु हुने आयोजकले जनाएको छ ।
प्ले फर डिप्राइभ्ड चिल्ड्रेन नेपाल (पिडिसिएन) ले आयोजना गरेको प्रतियोगिताको प्ले अफमा ४ टोलीले प्रतिस्पर्धा गर्नेछन् ।
चारै टोलीले एक अर्कासंग खेल्नेछन् । र, प्ले अफको अंक तालिकामा पहिलो र दोस्रो हुनेले पहिलो क्वालिफायर खेल्नेछ । विजेता फाइनलमा पुग्नेछ भने उपविजेताले दोस्रो क्वालिफायर खेल्नेछ ।
प्रतियोगिताको विजेताले २ लाख र दोस्रोले १ लाख पुरस्कार पाउने छन् ।
यस्तै मोस्ट भ्यालुएबल खेलाडी र सर्वाधिक स्कोर गर्ने खेलाडीले पनि नगद पुरस्कार पाउने आयोजकले जनाएको छ ।
