विमलासम्मिलित राजशाही एएफसी च्याम्पियन्स लिगबाट बाहिरियो

काठमाडौं। बंगलादेशको पहिलो महिला क्लबका रूपमा एएफसी महिला च्याम्पियन्स लिग खेलेको राजशाही स्टार्स प्रतियोगिताबाट बाहिरिएको छ।

दोस्रो चरणमा पुग्ने लक्ष्यसहित मलेसिया गएको राजशाहीले लगातार दुई खेलमा हार बेहोरेपछि समूह चरणमै यात्रा टुंग्याएको हो।

बिहीबार राति क्वालालम्पुरमा भएको खेलमा नेपाली राष्ट्रिय टोलीकी डिफेन्डर विमला विकसम्मिलित राजशाही मलेसियाको साबाह एफसीसँग २–१ गोलले पराजित भयो।

यसअघि राजशाहीले आफ्नो पहिलो खेलमा भारतको इस्ट बंगालसँग ३–० गोलको हार बेहोरेको थियो। त्यसैले दोस्रो खेलमा अफिदा खन्दकर र उनको टोलीका लागि अंक हासिल गर्नु अनिवार्य थियो।

साबाहविरुद्धको खेलको पहिलो हाफमा राजशाहीले घरेलु टोलीलाई राम्रो चुनौती दिएको थियो। दुवै टोलीले गोलका अवसर सिर्जना गरे पनि पहिलो हाफमा कुनै गोल हुन सकेन।

तर‚ दोस्रो हाफमा राजशाहीको प्रदर्शन कमजोर भयो। एक गोल खाएपछि रुप्ना चक्मासहित राजशाहीका खेलाडी केही दबाबमा देखिए। त्यसपछि साबाहले अर्को गोल थप्दै खेलमा आफ्नो पकड बलियो बनायो।

राजशाहीले ८३औं मिनेटमा उत्कृष्ट गोल गर्दै खेलमा फर्किने प्रयास गर्‍यो। दायाँ छेउबाट गरिएको लामो दूरीको आकर्षक प्रहार गोलरक्षकको टाउकोमाथिबाट जाली चुमेको थियो। तर‚ त्यसपछि थप गोल गर्न नसक्दा राजशाही २–१ को हारबाट जोगिन सकेन।

उता समूहको अर्को खेलमा इस्ट बंगालले गुआमको क्लबलाई १२–० को फराकिलो अन्तरले पराजित गरेको छ। पहिलो खेलमा राजशाहीलाई ३–० ले हराएको इस्ट बंगालले लगातार दोस्रो जितसँगै ६ अंक जोडेको छ।

समूह विजेता टोली अर्को चरणमा प्रवेश गर्नेछ। राजशाहीले अन्तिम खेलमा गुआमको क्लबलाई पराजित गरे पनि इस्ट बंगालको ६ अंक बराबर गर्न नसक्ने भएकाले प्रतियोगिताबाट बाहिरिने निश्चित भएको हो।