अनन्त र एरिकसम्मिलित फोर्टिज एएफसी च्यालेन्ज लिगको कठिन समूह

काठमाडौं। पहिलो पटक एएफसी प्रतियोगितामा सहभागी भएको बंगलादेशी क्लब फोर्टिज एफसीले प्रभावशाली प्रदर्शन गर्दै एएफसी च्यालेन्ज लिगको मुख्य चरणमा स्थान बनाएको छ।

प्लेअफ खेलमा किर्गिस्तानको क्लब मुरास युनाइटेडलाई पराजित गर्दै फोर्टिजले मुख्य चरणमा प्रवेश गरेको हो। बिहीबार मलेसियाको क्वालालम्पुरमा भएको प्रतियोगिताको ‘ड्र’अनुसार फोर्टिज एफसी समूह ‘सी’ मा परेको छ।

एएफसी च्यालेन्ज लिगमा बंगलादेश पश्चिम क्षेत्रअन्तर्गत रहेको छ। पश्चिम क्षेत्रमा तीन समूह छन्। ‘ड्र’अघि तीनवटै समूहका आयोजक टोली निर्धारण गरिएको थियो। भुटानको पारो एफसी समूह ‘ए’, ताजिकिस्तानको इस्तिकलोल समूह ‘बी’ र कुवेतको कादसिया एससी समूह ‘सी’ को आयोजक बनेका छन्।

फोर्टिज एफसी तेस्रो पटमा थियो। सोही पटमा सिरियाको अल इत्तिहाद पनि थियो। ‘ड्र’मा अल इत्तिहादको नाम समूह ‘ए’ मा परेपछि समूह ‘बी’ मा सिरियाकै अर्को क्लब राखिएको थियो। त्यसैले फोर्टिजलाई समूह ‘सी’ मा राखिएको हो।

समूह ‘सी’ मा फोर्टिजसँगै भारतको एफसी गोवा, आयोजक कादसिया एससी र ताजिकिस्तानको रेजाक ताजाक रहेका छन्। एफसी गोवा एएफसी प्रतियोगितामा नियमित रूपमा सहभागी हुँदै आएको टोली हो।

समूह चरणका खेलहरू अक्टोबर १७ देखि २४ सम्म सञ्चालन हुनेछन्। पश्चिम क्षेत्रमा तीन समूहका विजेता र उत्कृष्ट एक उपविजेता टोली अर्को चरणमा प्रवेश गर्नेछन्। यस्तै, पूर्वी क्षेत्रबाट दुई समूहका विजेता र उपविजेता टोलीले अर्को चरणमा स्थान बनाउनेछन्।