अल्भारेजको भविष्यबारे एट्लेटिकोमा अन्योल

एट्लेटिको मड्रिडले नयाँ ला लिगा सिजनको पहिलो खेलमा मालागामाथि २–० को जित निकालेको छ। तर, टोलीको कमजोर आक्रामक प्रदर्शनले प्रशिक्षक डिएगो सिमियोनलाई चिन्तित बनाएको छ।

यस्तो अवस्थामा क्लबले स्टार फरवार्ड जुलियन अल्भारेजको भविष्यबारे छिटो निर्णय हुने अपेक्षा गरेको छ। मिडफिल्डर ली काङ–इनले बेन्चबाट मैदान प्रवेश गरेको १३ मिनेटमै डेब्यु गोल गरे।

उनले दायाँ विङबाट भित्रतर्फ काट्दै उत्कृष्ट प्रहारमार्फत बललाई गोलको माथिल्लो कुनामा पुर्‍याए। त्यसपछि एलेक्स बाएनाले सानदार फ्रिकिकमार्फत गोल गर्दै एट्लेटिकोको जित सुनिश्चित गरे।

यद्यपि, यी दुई गोलबाहेक एट्लेटिकोको आक्रमण प्रभावहीन देखिएको थियो। अल्भारेजको भविष्यबारे क्लब र खेलाडीबीच देखिएको असमझदारीका कारण पनि उनको अनुपस्थितिले टोलीमा प्रभाव पारेको देखियो।

अर्जेन्टिनी फरवार्ड अल्भारेजले क्लब छाडेर बार्सिलोना जान चाहेको संकेत यसअघि नै दिएका छन्। हालैको विश्वकपका क्रममा उनले बार्सिलोनाबाट खेल्नु आफ्नो सपना पूरा हुने बताएका थिए। रोबर्ट लेवान्डोस्कीका लागि विकल्प खोजिरहेको बार्सिलोनाले अल्भारेजलाई उपयुक्त खेलाडीका रूपमा हेरेको छ।

तर‚ एट्लेटिको भने २६ वर्षीय अल्भारेजलाई क्लबमै राख्न चाहन्छ। मालागाविरुद्धको खेलअघि सिमियोनले विश्वकपपछि बिदाबाट फर्किएयता अल्भारेज अपेक्षित फिटनेस र स्तरमा नपुगेकाले उनलाई टोलीमा छनोट नगर्ने बताएका थिए।

अल्भारेजको अनुपस्थितिको असर एट्लेटिकोको आक्रमणमा स्पष्ट देखियो। एन्टोनी ग्रिजम्यान मेजर लिग सकरतर्फ लागिसकेका छन् भने अलेक्जान्डर सोर्लोथ मांसपेशीको चोटका कारण बाहिर छन्। त्यसैले सामान्यतया विंगरका रूपमा खेल्ने एडेमोला लुकम्यानलाई सेन्ट्रल फरवार्डका रूपमा प्रयोग गरिएको थियो।

एट्लेटिकोले आइतबार भिल्लारियलको सामना गर्नेछ। क्लबले त्यस खेलमा अल्भारेजलाई मैदानमा उतार्न सक्ने आशा गरेको छ। तर‚ सेप्टेम्बर १ मा ट्रान्सफर विन्डो बन्द नहुन्जेल उनको सम्भावित स्थानान्तरणको विषयले एट्लेटिकोलाई पछ्याइरहने देखिन्छ।

खेल सुरु हुनुअघि एट्लेटिकोका विश्वकप विजेता चार खेलाडी मार्कोस लोरेन्टे, मार्क पुबिल, एलेक्स बाएना र अलेजान्द्रो ग्रिमाल्डोलाई मैदानमा एक–एक गर्दै सम्मान गरिएको थियो। दर्शकहरूले उनीहरूलाई ठूलो तालीसहित स्वागत गरेका थिए।