मेसीको एक गोल र असिस्ट

काठमाडौं। लिओनल मेसीले एक गोल र एक असिस्ट गरे पनि इन्टर मियामीले बिहीबार बिहान फिलाडेल्फिया युनियनसँग २–२ को बराबरी खेलेको छ।

खेलको २१औं मिनेटमा मेसीले दिएको क्रसलाई लुइस सुआरेजले हेडमार्फत ड्यानियल पिन्टरको बाटोमा पुर्‍याएका थिए। पिन्टरले उक्त बललाई जाली चुमाउँदै मियामीलाई अग्रता दिलाए।

त्यसको पाँच मिनेटपछि मेसीले १२ यार्डबाट आफ्नो रोजाइको बायाँ खुट्टामा बल नियन्त्रण गर्दै भित्रतर्फ काटे र उत्कृष्ट कर्लिङ प्रहारमार्फत गोल गरे। यो आफ्ना बुबा जर्ज मेसीको निधनपछि खेलमा फर्किएयता मेसीको पहिलो गोल थियो।

यस सिजन मेजर लिग सकर (एमएलएस) मा मेसीले १७ खेलबाट १३ गोल र ९ असिस्ट गरेका छन्। फिलाडेल्फिया युनियनविरुद्ध भने उनले सबै प्रतियोगितामा ६ खेल खेल्दै ६ गोल र ४ असिस्ट गरेका छन्।

फिलाडेल्फियाका इन्डियाना भासिलिभले पहिलो हाफमा भलीमार्फत गोल गर्दै खेलमा फर्काए। त्यसपछि १८ वर्षीय डिफेन्डर निल पियरेले ५८औं मिनेटमा हेडमार्फत यस सिजनको पाँच खेलमा आफ्नो तेस्रो गोल गर्दै स्कोर २–२ बनाए। भासिलिभको गोलमा फिलाडेल्फियाका १६ वर्षीय मिडफिल्डर काभान सुलिभानले असिस्ट गरेका थिए।

६२औं मिनेटमा मिलान इलोस्कीले फिलाडेल्फियालाई फेरि अग्रता दिलाएको जस्तो देखिए पनि भिडियो समीक्षा (भीएआर) पछि गोल रद्द भयो। गोलको निर्माणक्रममा पियरे अफसाइड रहेको पाइएको थियो।

खेलको इन्ज्युरी टाइममा मैदानबाहिर भएको झगडका कारण इन्टर मियामीका यानिक ब्राइट र फिलाडेल्फियाका काभान सुलिभान दुवैले रातो कार्ड पाए। इन्टर मियामी यस खेलअघि ११ जित, ३ हार र ६ बराबरीसहित पूर्वी सम्मेलनको दोस्रो स्थानमा थियो।

शनिबार शीर्ष स्थानको न्यासभिलसँग ४–१ ले पराजित भएपछि टोली थप दबाबमा थियो। न्यासभिलविरुद्ध मेसीले पूरा ९० मिनेट खेले पनि पेनाल्टी चुकाएका थिए, दुई पटक पोस्टमा प्रहार गरेका थिए र टेलास्को सेगोभियाको गोलमा असिस्ट गरेका थिए।

बुधबारको बराबरीअघि मियामी सबै प्रतियोगितामा लगातार तीन खेलमा पराजित भएको थियो। लिग्स कपमा दुई मेक्सिकन क्लबविरुद्धको हारपछि टोलीको एमएलएसमा सात खेलको अपराजित यात्रा पनि अन्त्य भएको थियो।

मेसी अगस्ट १२ मा लियोनविरुद्धको खेलमा दोस्रो हाफमा मैदान प्रवेश गर्दै ४५ मिनेट खेलेका थिए। यसअघि अगस्ट ८ को मोन्टेरेविरुद्धको खेल उनले आफ्ना बुबा जर्ज मेसीको अन्त्येष्टिमा सहभागी हुन अर्जेन्टिना जानुपर्ने भएकाले गुमाएका थिए। जर्ज मेसीको अगस्ट ७ मा निधन भएको थियो।

यता फिलाडेल्फिया युनियन अन्तरिम प्रशिक्षक रायन रिक्टरको नेतृत्वमा लगातार पाँच खेलदेखि अपराजित छ। टोलीले यस अवधिमा चार जित र एक बराबरीको नतिजा निकालेको छ।

अर्जेन्टिनाको विश्वकपमा उपविजेता टोलीका सदस्य रोड्रिगो डे पाउल भने पहेँलो कार्डको संख्या पुगेका कारण बुधबारको खेलमा निलम्बित थिए।

यसअघि मे २४ मा भएको पछिल्लो भेटमा इन्टर मियामीले फिलाडेल्फियालाई ६–४ ले पराजित गरेको थियो। उक्त खेलमा मेसीले गोल नगरे पनि सुआरेजले ह्याट्रिक गर्दै मियामीलाई पहिलो हाफको २–० र ३–१ को घाटाबाट उत्कृष्ट पुनरागमन गराएका थिए।