अनिश्चित पोग्बा

काठमाडौं। फ्रान्सका पूर्वस्टार मिडफिल्डर पाउल पोग्बासँग मोनाकोले सम्झौता समाप्त गरेको छ।

लगातार चोटका समस्याका कारण पोग्बाको मोनाको बसाइ अपेक्षाअनुसार सफल हुन नसकेपछि क्लब र उनीबीच आपसी सहमतिमा सम्झौता तोडिएको हो।

३३ वर्षीय पोग्बाले मोनाकोप्रति आभार व्यक्त गर्दै भनेका छन्,‘मोनाको एउटा असाधारण क्लब हो। मैले आशा गरेजति धेरै खेल खेल्न नपाए पनि यहाँ पाएको अवसरका लागि म सधैं आभारी रहनेछु।’

पोग्बाले गत वर्ष मोनाकोसँग दुई वर्षको सम्झौता गरेका थिए। चोट र डोपिङ प्रतिबन्धका कारण प्रभावित आफ्नो करिअरलाई पुनः लयमा फर्काउने उद्देश्यले उनले फ्रान्सेली क्लब रोजेका थिए।

तर‚ चोटको समस्याले उनलाई फेरि सतायो। गत सिजन उनले केही खेलमा मात्र वैकल्पिक खेलाडीका रूपमा मैदानमा प्रवेश गर्ने अवसर पाए। मोनाकोले नयाँ सिजनको पहिलो खेलअघि नै पोग्बासँगको सम्झौता समाप्त गर्ने निर्णय गरेको जनाएको छ।

क्लबका अनुसार सुरुमा तय गरिएका लक्ष्यहरू पूर्ण रूपमा हासिल हुन नसकेपछि दुवै पक्षले सन् २०२७ जुनसम्म कायम रहने सम्झौता समयअघि नै अन्त्य गर्ने सहमति गरेका हुन्।

प्रि–सिजनका खेलहरूमा पनि पोग्बा पूर्ण रूपमा फिट हुन संघर्ष गरिरहेका थिए। त्यसमाथि पछिल्लो समय उनलाई फेरि चोट लागेको थियो। गत सिजन मोनाको फ्रेन्च लिग वानमा सातौं स्थानमा रहेको थियो।

पोग्बा आफ्नो उत्कृष्ट समयमा विश्वकै चर्चित मिडफिल्डरमध्ये एक थिए। सन् २०१८ को विश्वकप फाइनलमा फ्रान्सले क्रोएसियालाई ४–२ ले हराउँदा उनले गोलसमेत गरेका थिए। फ्रान्सका लागि ९१ खेल खेलेका पोग्बाले ११ गोल गरेका छन्।

सन् २०१६ मा उनी तत्कालीन समयका सबैभन्दा महँगा फुटबलर बनेका थिए। युभेन्ट्सबाट म्यानचेस्टर युनाइटेड फर्किँदा उनको स्थानान्तरण शुल्क १०५ मिलियन युरो रहेको थियो।

तर‚ त्यसपछि चोट र अन्य समस्याले उनको करिअरमा ठूलो प्रभाव पार्‍यो। सन् २०२४ को फेब्रुअरीमा युभेन्ट्समा रहँदा ‘टेस्टोस्टेरोन’को परीक्षण पोजेटिभ आएपछि इटालीको एन्टी–डोपिङ अदालतले उनलाई सुरुमा चार वर्षको प्रतिबन्ध सुनाएको थियो।

पछि अक्टोबर २०२४ मा कोर्ट अफ आर्बिट्रेसन फर स्पोर्ट (कास) ले उक्त प्रतिबन्ध घटाएर १८ महिनामा झारेको थियो। प्रतिबन्ध पूरा गरेपछि पुनरागमनको प्रयास गरेका पोग्बाले मोनाकोमा पनि चोटका कारण अपेक्षित निरन्तरता कायम गर्न सकेनन्।

अब उनको करिअरको अर्को गन्तव्य कहाँ हुनेछ भन्ने विषयमा चासो बढेको छ।