काठमाडौं । नेपाली बास्केटबल खेलकै सर्वाधिक ठुलो प्रतियोगिता क्विक्स नेपाल बास्केटबल लिगको उपाधि ट्रफी सार्वजनिक गरिएको छ ।
आयोजक प्ले फर डिप्राइभ्ड चिल्ड्रेन नेपाल (पिडिसिएन) ले शुक्रबार उपाधि विजेता र उपविजेता टोलीले पाउने ट्रफी सार्वजनिक गरेका छन् । आयोजकले प्रतियोगिताको प्ले अफ खेलअघि ट्रफी सार्वजनिक गरेको हो ।
प्रतियोगितामा गोल्डेनगेट इन्टरनेसनल बास्केटबल क्लब, साबिकको विजेता त्रिभुवन आर्मी क्लब, नेपाल पुलिस क्लब र टाइम्स इन्टरनेसनल बास्केटबल क्लबले प्ले अफमा स्थान बनाएका छन् । प्रतियोगिताको प्ले अफ खेल आइतबारबाट सुरु हुनेछ ।
प्रतियोगिताको विजेताले २ लाख र दोस्रोले १ लाख पुरस्कार पाउने छन् । यस्तै मोस्ट भ्यालुएबल खेलाडी र सर्वाधिक स्कोर गर्ने खेलाडीले पनि नगद पुरस्कार पाउने आयोजकले जनाएको छ ।
त्यस्तै आयोजकले प्रतियोगिताको प्ले अफ खेलको तयारी समेत पुरा भएको जनाएको छ । प्रतियोगिताको सम्पूर्ण प्ले अफ खेल र फाइनल त्रिपुरेश्वरस्थित राखेपको कबर्ड हलमा हुने आयोजकले जनाएको छ ।
