अन्तिम लिग खेलमा गोल्डेनगेटको जित

काठमाडौं । गोल्डेनगेट इन्टरनेसनल बास्केटबल क्लबले क्विक्स नेपाल बास्केटबल लिग अन्तर्गत लिग चरणको अन्तिम खेलमा जित निकालेको छ ।

बुधबार भएको खेलमा गोल्डेनगेटले किर्तिपुर बास्केटबल क्लबलाई पराजित गरेको हो । गोल्डेनगेटले किर्तिपुरलाई ८२-५२ अंकले पराजित गर्यो ।

जितसंगै गोल्डेनगेटले १४ खेलबाट २३ अंक जोड्यो । गोल्डेनगेट यसअघि नै प्ले अफ पुगीसकेको छ । किर्तिपुर भने बाहिरिसकेको छ ।

यो खेलसंगै प्रतियोगिताको प्ले अफ समीकरण पुरा भएको छ ।  प्रतियोगितामा गोल्डेनगेटसंगै साबिकको विजेता आर्मी, नेपाल पुलिस र टाइम्स इन्टरनेसनल बास्केटबल क्लबले प्ले अफमा स्थान बनाएका छन् ।

प्रतियोगिताको प्ले अफ खेल आइतबारबाट सुरु हुनेछ ।

प्ले फर डिप्राइभ्ड चिल्ड्रेन नेपाल (पिडिसिएन) को आयोजनामा जारी लिगको विजेताले २ लाख पुरस्कार पाउने छन् ।

यस्तै दोस्रोले १ लाख र मोस्ट भ्यालुएबल खेलाडी र सर्वाधिक स्कोर गर्ने खेलाडीले पनि नगद पुरस्कार पाउने आयोजकले जनाएको छ।