काठमाडौ । ‘खेलमा हामीलाई रोक्न दुई क्लबले फिक्सिङ गरेको देखियो ।’ डाइनामाईट क्लबसंगको खेल सकिए लगत्तै जोरपाटी फुटबल क्लबका अध्यक्ष दिपक लामा विवादमा उत्रिए ।
उपत्यकामा चलिरहेको सहिद स्मारक सी डिभिजन लिगको छनोटमा मंगलबार जोरपाटीले डाइनामाइटलाई ४–० गोल अन्तरले पराजित गरेको थियो ।
तर जोरपाटी क्लबका खेलाडी तथा अफिसियल बारम्बार खेलमा मिलेमतो भएको आरोप लगाउँदै फोर्थ अफिसल र लिग संयोजक संञ्जिब मिश्रसँग भनाभन गरिरहेका थिए ।
उनिहरुको आरोप थियो, झापा फुटबल क्लबले दोस्रो चरणमा प्रवेश गर्न डाइनामाटलाई प्रयोग गर्याे । यसअघि भएको खेलमा झापाले डाइनामाइटलाई ४–० ले हराएको थियो ।
झापा र जोरपाटीको खेल बराबरीमा सकिएको थियो ।
समिकरण अनुसार आजको खेलमा जित निकाल्दै ४ अंक बटुल्ने अवसर जोरपाटीलाई थियो ।
नतिजा पनि सोही अनुसारनै निस्कियो ।
जोरपाटीले ४–० को जित निकालेसँगै झापा र जोरपाटीको समान ४ अंक भयो ।
समान अंक र गोल पनि बराबरी भएपछि खेलको छिनोफानो कार्डबाट हुने तय भयो । त्यस अवस्थामा झापाले २ र जोरपाटीले ५ पँहेलो कार्ड खाएका थिए ।
थोरै कार्डका कारण झापा दोस्रो चरणमा प्रवेश गर्याे ।
लगत्तै जोरपाटीका प्रशिक्षक, कप्तान र अध्यक्ष तीनै जनाले एउटै स्वरमा भने, ’खेलमा झापाले फिक्सिङ गर्याे । हामीलाई रोक्न झापाले डाइनामाइटलाई पैसा खुवायो ।’
![](https://scontent.fktm4-1.fna.fbcdn.net/v/t1.15752-9/61598447_673409459762669_8824974078818385920_n.jpg?_nc_cat=104&_nc_ht=scontent.fktm4-1.fna&oh=e43b2c71018c365118fa7c118b4bcbca&oe=5D5EECA2)
‘खेलमा सबै टिम जित्नको लागि खेल्छ । हामीलाई पनि टप फाईट गर्नपर्छ भनियो । हामीले बरम्बार गोल गर्दा उनीहरु ब्याक पास मात्र खेले । अझ संसारमै नभएको सिधै सेन्टरबाट बारम्बार किपरपास खेले ।’ जोरपाटीको गुनासो छ ।
‘डाइनामाइडले झापाविरुद्ध खेल्दा गोल गरोस् भनेर २५ मिनेट १० खेलाडीमा सिमित भएर खेल्यो ।’ जोरपाटीका अध्यक्ष दिपकले भने, ‘खेलाडी छैन भनेर हाल्न मिल्दैन भनियो । आज त्यही खेलाडी भने खेलाईयो । खेल्न नसक्ने खेलाडी कसरी खेल्यो । ३–४ दिनमै रिकभरी भयो त ?’
‘हामीलाई जित आवश्यक थियो । हामी गोल हानिरहेका थियौ । यस्तो अवस्थामा उनीहरु एक पटक पनि हामीतर्फ मुभ बनाउन चाहेनन् । खाली किपरसंग पास मात्रै खेले । हामीलाई हराउन झापाले कमिसन खुवायो ।’ टिमका कप्तान विकाश राईले भने ।
‘डाइनामाइडलाई जसरी पनि हार्छु भन्ने थियो । त्यसैले उनीहरु गोल गर्न भन्दा पनि हामीलाई गोल गर्न नदिन तिर लागे ।’ जोरपाटीका प्रशिक्षक रञ्जित लामाले भने ।
‘हामीले धेरै गोल गर्याे भने झापा बाहिरिने अवस्था थियो । त्यसैले झापाले गोल खान नदिन यो सबै सिकाएको हो । झापाले फिक्सिङ गरेकै हो ।’ उनले भने ।
![](https://scontent.fktm4-1.fna.fbcdn.net/v/t1.15752-9/61103331_626454751194388_8753993727002804224_n.jpg?_nc_cat=111&_nc_ht=scontent.fktm4-1.fna&oh=c61558ceed57e64d68625aef70c2cd0c&oe=5D602C2E)
खेल लगत्तै जोरपाटीले खेलमा मिलेमतो भएको भन्दै एन्फाका लिग संयोजक संञ्जिब मिश्रलाई लिखित रिपोर्ट गरेको छ ।
यता, लिग संयोजक संञ्जिब मिश्रले खेल मिलोमतोको आरोप अस्विकार गरे ।
‘कुनै पनि टिमले ब्याक पास खेल्न नपाउने भन्ने हुँदैन । यो निराधार आरोप हो । हारपछि यस्तो आरोप आईरहन्छ ।’ उनको भनाई थियो ।