अन्यौलमा अल्भारेज

काठमाडौं। स्पेनको विश्वकप जितको उत्सव सेलाउन नपाउँदै नयाँ ला लिगा सिजनको चर्चा सुरु भएको छ।

घरेलु उपाधि जोगाउने लक्ष्यमा बार्सिलोना उत्रिँदा लगातार दुई सिजन उपाधिविहीन बनेको रियल मड्रिड भने ठूलो लगानी, स्टार खेलाडी र प्रशिक्षक जोसे मोरिन्होसहित उपाधि फिर्ता ल्याउने अभियानमा छ।

स्पेनले गत महिना न्यु जर्सीमा अर्जेन्टिनालाई पराजित गर्दै दोस्रोपटक विश्वकपको उपाधि जितेको थियो। युरोपियन च्याम्पियनसिपपछि विश्वकपसमेत जितेको स्पेनको फुटबल अब राष्ट्रिय टोलीबाट क्लब फुटबलतर्फ केन्द्रित भएको छ।

ला लिगामा मुख्य प्रतिस्पर्धा भने फेरि पनि बार्सिलोना र रियल मड्रिडबीच हुने अपेक्षा गरिएको छ। लगातार दुईपटक घरेलु उपाधि जितेको बार्सिलोनाविरुद्ध रियल यसपटक निकै आक्रामक देखिएको छ।

राजधानी मड्रिडकै अर्को ठूलो क्लब एट्लेटिको मड्रिड पनि नयाँ सिजनमा दबाबमा हुनेछ।

प्रशिक्षक डिएगो सिमेओनेले क्लबको जिम्मेवारी सम्हालेको १५औं सिजन सुरु गर्दैछन्। तर‚ पछिल्लो पाँच वर्षदेखि ला लिगा उपाधि जित्न नसकेपछि उनीमाथि दबाब बढ्दो छ।

गत सिजन एट्लेटिकोले कोपा डेल रेको फाइनलसम्म यात्रा गरे पनि पेनाल्टी सुटआउटमा रियल सोसिडाडसँग पराजित भयो। च्याम्पियन्स लिगको सेमिफाइनलमा पनि आर्सनलसँग हार्दै टोली बाहिरिएको थियो।

अहिले क्लबका लागि सबैभन्दा ठूलो समस्या स्टार स्ट्राइकर जुलियन अल्भारेजको भविष्य बनेको छ। अल्भारेजले सार्वजनिक रूपमा एट्लेटिको छाड्न चाहेको बताएका छन् र बार्सिलोनाले पनि उनलाई अनुबन्ध गर्न चासो देखाएको छ।

एट्लेटिकोले अल्भारेजलाई बार्सिलोनाजस्तो प्रत्यक्ष प्रतिद्वन्द्वीलाई बेच्न अस्वीकार गर्ने संकेत दिएको छ। तर‚ सिजन सुरु हुनुअघि नै खेलाडीको भविष्यलाई लिएर बढेको तनावले यसपटक ला लिगाको उपाधि दौड मैदानमा मात्र होइन, क्लबको व्यवस्थापन तहमा पनि उत्तिकै रोचक हुने संकेत गरेको छ।