घानालाई हराउँदै पहिलोपटक विश्वकपमा पुग्यो मलावी

काठमाडौं। महिला अफ्रिका कप अफ नेसन्समा मलावीले आफ्नो ऐतिहासिक यात्रा जारी राख्दै पहिलोपटक महिला विश्वकपमा स्थान पक्का गरेको छ। अन्तिम क्वार्टरफाइनलमा एक गोलले पछि परेको अवस्था उल्टाउँदै मलावीले घानालाई २–१ गोलले पराजित गर्‍यो।

खेलको सातौं मिनेटमै इंग्ल्यान्डमा जन्मिएकी स्ट्राइकर शान्तेले बोए–ग्लोरकाहले गोल गर्दै घानालाई अग्रता दिलाएकी थिइन्। तर‚ मलावीले पाँच मिनेटमै खेल बराबरीमा ल्यायो। १२औँ मिनेटमा टेम्बा चाभिङ्गाले गोल गर्दै टोलीलाई खेलमा फर्काइन्।

निर्णायक गोल भने रोज कादजेरेले खेलको ७९औं मिनेटमा गरिन्। उनको गोलसँगै मलावीले २–१ को जित निकाल्दै इतिहासमै पहिलोपटक विश्वकपको टिकट काट्यो।

ब्राजिलमा आयोजना हुने ३२ टोली सहभागी विश्वकपमा अफ्रिकाबाट चार टोलीले सिधै स्थान बनाउनेछन्। मलावी यसअघि नै विश्वकपमा छनोट भएका अल्जेरिया, क्यामरुन र मोरक्कोसँगै अफ्रिकाका प्रतिनिधि बनेको छ।

अब सेमिफाइनलमा मलावीले बुधबार अल्जेरियाको सामना गर्नेछ। अर्को सेमिफाइनलमा आयोजक मोरक्को र क्यामरुनबीच प्रतिस्पर्धा हुनेछ। क्यासाब्लान्कामा भएको क्वार्टरफाइनलमा क्यामरुनले साविक विजेता नाइजेरियालाई १–० गोलले पराजित गर्दै अन्तिम चारमा स्थान बनाएको हो।

लगातार नौ संस्करणको विश्वकपमा सहभागी हुँदै आएको नाइजेरिया भने यसपटक कठिन छनोट यात्रामा धकेलिएको छ। अफ्रिकाबाट विश्वकपमा पुग्न अझै दुई टोलीका लागि अवसर बाँकी छ।

नाइजेरिया प्रतियोगिताबाट बाहिरिएसँगै महिला अफ्रिका कप अफ नेसन्सले यसपटक नयाँ च्याम्पियन पाउने निश्चित भएको छ। नाइजेरियाबाहेक यसअघि प्रतियोगिताको उपाधि जित्ने टोलीमा इक्वेटोरियल गिनी र दक्षिण अफ्रिका मात्र रहेका छन्।