पीएसजी र एस्टन भिल्लाबीच यूईएफए सुपर कप भिडन्त, चर्चामा सोमाली रेफ्री आर्टान

काठमाडौं। विश्वकप फाइनल सकिएको तीन साता नबित्दै युरोपियन फुटबलको नयाँ सिजनको पहिलो उपाधिका लागि पेरिस सेन्ट–जर्मेन (पीएसजी) र एस्टन भिल्ला बुधबार साल्जबर्गमा यूईएफए सुपर कपमा आमनेसामने हुँदैछन्।

च्याम्पियन्स लिग र युरोपा लिगका पछिल्ला विजेताबीच हुने वार्षिक प्रतिस्पर्धा यसपटक मैदानभित्रका खेलाडीभन्दा पनि रेफ्रीका कारण थप चर्चामा छ। खेल सञ्चालनको जिम्मेवारी सोमालियाका रेफ्री ओमार आर्टानले पाएका छन्।

आर्टानलाई विश्वकप सुरु हुनुअघि अमेरिकाले सुरक्षा जाँचसम्बन्धी चिन्ताका कारण प्रतियोगितामा रेफ्रीको भूमिका निर्वाह गर्नबाट रोकेको थियो। अमेरिकी अधिकारीहरूले उनी आतंकवादी संगठनसँग सम्बन्धित रहेको दाबी गरे पनि त्यसको प्रमाण भने सार्वजनिक गरेका थिएनन्।

त्यसपछि यूईएफएले अफ्रिकाको गत सिजनका उत्कृष्ट रेफ्री घोषित आर्टानलाई सुपर कपको जिम्मेवारी दिएको हो। उनको नियुक्तिलाई फुटबल समुदायले व्यापक रूपमा स्वागत गरेको थियो। साथै, यूईएफए र फिफाबीच बढ्दो मतभेदका बीच यसलाई युरोपेली फुटबल निकायको रणनीतिक कदमका रूपमा समेत हेरिएको छ।

यूईएफए र फिफाबीचको दूरी पछिल्लो समय अझ बढेको छ। फिफा अध्यक्ष जियानी इन्फान्टिनोको विश्वकपमा लगानीकर्तालाई हिस्सेदारी बिक्री गर्ने योजना विवादमा परेपछि यूईएफए उनको नेतृत्वविरुद्ध अभियानमा अग्रसर भएको छ।

यसै कारण पीएसजी र एस्टन भिल्लाबीचको खेलमा आर्टानको उपस्थितिलाई पनि खेलाडीहरूको प्रदर्शन जत्तिकै चासोका साथ हेरिएको छ।

गत वर्ष टोटनहमलाई पेनाल्टी सुटआउटमा पराजित गर्दै सुपर कप जितेको पीएसजी लगातार दोस्रोपटक उपाधि जित्ने आधुनिक युगको दोस्रो टोली बन्ने लक्ष्यमा छ। यसअघि रियल मड्रिडले २०१६ र २०१७ मा लगातार सुपर कप जितेको थियो।