काठमाडौं । नेपालको घरेलु फुटबलमा तल्लो स्तरको लिग हो, ‘सी’ डिभिजन लिग ।
खेल्ने र खेलाउने बाहेक धेरैमा सी डिभिजन लिगले यस बर्ष चर्चा पाएन ।
हुन त एन्फाले यो बर्ष रेलिगेशन बिनाको लिग गर्यो । ए डिभिजन लिग रेलिगेशनबिनै सकियो । चढ्ने र झर्ने नभएपछि बाँकी बी र सी डिभिजन लिग समेत औपचारिकतामा सकिए ।
तर सी डिभिजन लिगको अन्तिम तिर केही रोचक दृष्य देखियो ।
खालीबारी युथ क्लब ‘सी’ डिभिजनको च्याम्पियन बन्यो ।
खालीबारीको च्याम्पियन यात्राको नायक बने, मनिष डाँगी ।
उनले लिगका अन्तिममा तीन खेल खेले । पाँच गोल गरे । अनि टिमलाई सी डिभिजनको च्याम्पियन बनाए ।
१७ बर्षे मनिष नेपालको घरेलु फुटबलमा अचानक देखा परेका छन् । उद्भुत खेल कौशलबाट नेपाली फुटबलका पण्डितहरुलाई आश्चार्य चकित बनाएका छन् । घरेलु फुटबलका ‘हटकेक’ बनेका मनिष आखिर को हुन् त ?
यही प्रश्नमा यो आलेख तयार पारिएको छ ।
धेरै बोल्ने उनको बानी छैन । हेर्दा सोझा देखिन्छन् । मैदानमा निकै निर्मम तरिकाले खेल्छन् । उनको गति र वेगलाई रोक्न धेरै खेलाडीलाई निकै मुस्किल देखिन्छ ।
फुटबलको मैदान देखिने मनिषको चित्र यही हो ।
उनको बाबा–आमा रोजगारीको सिलसिलामा कोरिया थिए । तर उनको सुरुवाती बाल्यकाल नेपालमा बित्यो । कक्षा ९ मा पढ्दै गर्दा बाबा–आमाले उनलाई समेत कोरिया लग्ने भए । कोरियामा पुगेर उनले पढाई सुरु गरे । दाजु आकाश कोरियाको फुटबल एकेडेमीमा थिए, मनिष समेत फुटबलसंग जोडिए ।
दाजु आकाशले समेत मनिषलाई फुटबल खेल्न सहयोग गरे ।
![Image may contain: 1 person, playing a sport, standing, outdoor and text](https://scontent.fktm8-1.fna.fbcdn.net/v/t1.0-9/55882381_354564725158197_8511739884833079296_n.jpg?_nc_cat=111&_nc_eui2=AeEOtDF-usWx7m-bAe_Uv79FKRgXyK2-jgHnENVEPFqq0v_IVnhSoRUBIKv5uZ2HpAK8ph2k7Jm25VfoLHPqEvg-aGZZV2tKB_OcMM00-x0PpA&_nc_ht=scontent.fktm8-1.fna&oh=303bf3f4c2087241a47604982ba09e31&oe=5D0A305E)
पाँच बर्षको कोरिया बसाई पछि मनिष गत महिना नेपाल आए, नागरिकता बनाउन ।
त्यही समय शहरमा सी डिभिजन चलिरहेको थियो । फुटबलको नशा लागेका उनले ब्रिगेड ब्वाईजका प्रशिक्षक उर्जन महर्जनलाई सम्झिए । उर्जनले खालीबारीसंग कुरा गरिदिए । दोस्रो चरणबाट उनी सी डिभिजन खेल्न पाउने भए ।
दोस्रो चरणमा खालीबारीले पहिलो खेल ओसिससँग खेल्यो । दोस्रो हाफमा मैदान छिरेर उनले घरेलु फुटबलमा डेब्यु गरे । आफुलाई प्रमाणित गर्ने क्रममा मनिषले एक गोल समेत गरे, तर खालीबारीले त्यो खेल गुमाउन पुग्यो ।
पहिलो खेलमै उनी एन्फा कम्प्लेक्समा आफ्नो प्रभाव छाड्न सफल भए । मैदानमा रहेका रेफ्री, दर्शक, म्याच कमिस्नर लगायत सबैको ध्यान खिच्न सफल भए । सबैले उनको खेलको प्रशंसा गरे ।
उनी दोस्रो खेलमा प्लेईङ सेटमा रहेर मैदान उत्रिए । एक हिसावले त्यो खेलमा मनिषकै वरपर घुम्यो । विरगञ्जविरुद्वको खेलमा उनले दुई गोल गरे ।
अन्तिम खेलमा समेत उनी सुरुवाती रोजाईमा परे । खालीबारीलाई उपाधिकालागि अन्तिम खेल्न जित्नैपर्ने थियो । उनले अन्तिम खेलमा समेत जादुमयी प्रर्दशनलाई निरन्तरता दिए ।
केही खराब ट्याकल समेत ब्यहोरे । उनको प्रहार रोक्ने क्रममा प्लानिङका कप्तानले लगातार ट्याकल गरे । रेफ्री प्रकाशनाथ श्रेष्ठले खराब ट्याकलका कारण एकै पटक प्लानिङलाई तीन रातो कार्ड देखाउन परेको थियो ।
मनिषले सी डिभिजन लिगको तीन खेलमा पाँच गोल गरे । अन्तिम खेलमा म्यान अफ दी म्याच चुनिए ।
![Image may contain: 1 person, text](https://scontent.fktm8-1.fna.fbcdn.net/v/t1.0-9/55575696_354564878491515_3496936658433998848_o.jpg?_nc_cat=101&_nc_eui2=AeH9gBzxxcqaq-L2bvhTQHuL3xxtkbZmI4seVhws-Xopb1o-Bzj5prtzGyac6TjDW17emcwpYJG1TSB9qwRhuTcd5wQ4oS9r174eg8LZRsB4FA&_nc_ht=scontent.fktm8-1.fna&oh=1bd8901ade8a732c22c3a5f1718d1ef6&oe=5D052469)
मनिष नागरिकता बनाउन नेपाल आएका हुन् । तर उनको धोको नेपालको राष्ट्रिय फुटबल टिमबाट खेल्ने रहेको छ । यसकालागि उनले घरेलु मैदानमा आफुलाई प्रमाणित गर्नुपर्ने हुन्छ । सी डिभिजनमा गरेको प्रर्दशनले उनको फुटबल सम्भावनालाई उजागर गरेको छ । तर उनी लिगमा आफुले गरेको प्रर्दशनबाट सन्तुष्ट छैनन् ।
‘मैले जति खेल्नुपर्ने हो, त्यो खेल्न सकिन ।’ उनले भने ।
कोरियामा जस्तो लिगमा प्रर्दशन गर्न नसकेको उनको बुझाई छ ।
‘मैले कति खेल्न सक्छु भन्ने मलाई मात्र थाहा छ । त्यहि भएर खेल्न इच्छा देखाएको हुँ ।’ उनले भने, ‘उमेर समुहमा राम्रो गरेर राष्ट्रिय टिमबाट खेल्ने सपना छ । मौका पाए देखाउथे, नपाए कमजोर सच्चाउथे ।’
लिगको दौरान कोरिया र नेपाली फुटबलमा धेरै भिन्नता उनले देख्ने मौका पाए ।
‘कोरियामा र नेपाली फुटबलमा धेरै फरक हुन्छ । त्यहाँ राम्रो सिष्टम छ । सेवा सुविधा राम्रो हुन्छ । बाल्यकालबाटै सिकेर आएका हुन्छन् ।’ उनले हास्दै भने, ‘नेपालमा एकेडेमी धेरै नहुने, कोरियामा खेल्ने बाताबरण राम्रो हुन्छ ।’
उनी कोरिया हुदाँ समेत नेपाली फुटबललाई पछ्याउने गरेका रहेछन् ।
पाँच बर्ष कोरिया बसेर आएका मनिष नेपाली गाह्रो गरि बोल्छन् ।
‘पाँच बर्ष बसेर नेपाल आउँदा नेपाली भाषा पनि कस्तो फरक लाग्यो । अलि नेपाली गाह्रो लाग्यो ।’ उनले अनुभव सुनाए ।
मनिष अर्को महिना फेरी कोरिया लाग्नेछन् ।
उनलाई नेपालको उमेर समुहबाट खेल्ने मन छ ।
‘नेपाली नागरिकता बनाए । कोरियामा माबि स्तरको खेल खेल्न जानु छ । उमेर समुहमा खेल्न बोलाए पक्कै आउने छु ।’ उनले थपे, ‘कोरियाको एकेडेमीमा सिकेको कुरा नेपाली फुटबलबाट प्रमाणित गर्ने मन छ ।’
मनिषको खेल जिवनमा आमाको महत्वपुर्ण भुमिका छ । एन्फा कम्प्लेक्समा मनिष मैदान उत्रदै गर्दा दर्शक दिर्घाबाट आमाको समर्थन देखिन्थ्यो ।
‘सानो छदै सधै खेल्ने गर्दथ्यो । कोरियामा पनि राम्रो खेल्छ । साथीहरु पनि राम्रो खेल्छ भन्छन् । उसैको खेल हेर्न मैदान सम्म आएकी हुँ ।’ गीताले सुनाईन् ।
गीतालाई समेत छोरा मनिषले नेपालको राष्ट्रिय टिमको जर्सी लगाएको हेर्न मन छ ।
‘खेल राम्रो छ । अवसर पाएमा गर्न सक्छ । तर उसले उमेर समुहबाट आफुलाई प्रमाणित गर्दै लैजानपर्छ ।’ उनले भनिन् ।
![Image may contain: 4 people, people smiling, people playing sport, stadium and outdoor](https://scontent.fktm8-1.fna.fbcdn.net/v/t1.0-9/55776319_354564625158207_1033657018780483584_o.jpg?_nc_cat=109&_nc_eui2=AeFsdiJZeEd7ipp7NUqKWQqSyVXG5sBUQpIYjOMmzRCFfwWH8_s-O1N5afKMFiVe_aYarf4zZ_lhd04l-QVhIuFLCbZdlnYftsWXbfoZlLLvwA&_nc_ht=scontent.fktm8-1.fna&oh=acf547fe842e930785d4b22ed08ea074&oe=5D4D8323)
सानैदेखि मनिषको खेल हेरेका ब्रिगड ब्वाईजका उर्जन श्रेष्ठ भन्छन्, ‘नेपाली खेलाडीको भन्दा उसले खेल्ने शैली फरक छ । खेलको मुभमेन्ट राम्रो बनाउँछ । गति तिव्र छ । टर्निङ उत्कृष्ट छ ।’
खालीबारी क्लबलाई सी डिभिजन लिग च्याम्पियन बनाएका प्रशिक्षक अमित रावलको भनाई मान्ने हो भने उमेर समुहमा मनिष उत्कृष्ट खेलाडी हुन् ।
‘राष्ट्रिय टिमबाट भन्न सक्दिन । तर यु–१९, यु–२३ टिममा पर्ने खेलाडी हो । खेल राम्रो छ ।’ उनले थपे, ‘बल फिनिस गर्ने, स्पिड, मुभ र स्पेस बनाउने धेरै कुरा उसको राम्रो छ ।’