इतिहास बदल्ने लक्ष्यमा नेदरल्यान्ड्स

तीन पटक विश्वकपको फाइनलमा पुगेर पनि उपाधि जित्न नसकेको नेदरल्यान्ड्स यसपटक इतिहास बदल्ने लक्ष्यमा छ। सन् १९७४, १९७८ र २०१० मा फाइनल पुगे पनि डच टोली उपविजेतामै सीमित भएको थियो।

यस वर्षको विश्वकपमा नेदरल्यान्ड्स समूह ‘एफ’ मा स्विडेन, जापान र ट्युनिसियासँग छ। समूहको शीर्ष टोली बन्ने प्रबल दाबेदार मानिए पनि जापानजस्ता टोलीले उसको यात्रा कठिन बनाउन सक्छन्। जापानले २०२२ को विश्वकपमा जर्मनी र स्पेनलाई हराएर सबैलाई चकित पारेको थियो।

विश्वकप जित्न नसकेको नेदरल्यान्ड्स

सन् १९७० को दशकमा ‘टोटल फुटबल’ शैली विकास गरेको नेदरल्यान्ड्स विश्व फुटबलको आकर्षक टोलीमध्ये एक मानिन्छ। तर, उत्कृष्ट प्रदर्शनका बाबजुद उसले अहिलेसम्म विश्वकप जित्न सकेको छैन।

मुख्य प्रशिक्षक रोनाल्ड कोम्यान दोस्रो पटक राष्ट्रिय टोलीको जिम्मेवारी सम्हालिरहेका छन्। उनले खेलाडीका रूपमा सन् १९८८ मा नेदरल्यान्ड्सलाई युरोपियन च्याम्पियन बनाएका थिए भने प्रशिक्षकका रूपमा सन् २०१९ मा राष्ट्र लिगको फाइनलसम्म पुर्‍याएका थिए।

टोलीमा भर्जिल भान डाइक, रायन ग्राभेनबेर्ख, टिजानी रेइन्डर्स र कोडी गाक्पो जस्ता इङ्ग्लिस प्रिमियर लिगमा खेल्ने चर्चित खेलाडी छन्। यद्यपि अघिल्ला पुस्तामा जस्तो विश्वस्तरीय प्रतिभाको गहिराइ भने केही कम रहेको मानिन्छ।

तेस्रो पटक समूह चरण पार गर्ने लक्ष्यमा जापान

जापान लगातार आठौँ पटक विश्वकप खेल्दैछ र लगातार तेस्रो पटक समूह चरण पार गर्ने लक्ष्यमा छ। आयोजक राष्ट्रहरू बाहेक विश्वकपमा स्थान सुरक्षित गर्ने पहिलो टोली पनि जापान नै बनेको थियो।

कतारमा भएको २०२२ विश्वकपमा जर्मनी र स्पेनलाई हराएर ठूलो सनसनी मच्चाएको जापान अहिलेसम्म अन्तिम १६ भन्दा माथि पुग्न सकेको छैन।

जापानी टोलीका अधिकांश खेलाडी युरोपेली क्लबहरूमा आबद्ध छन्। हिरोकी इटो र काओरु मितोमा टोलीका प्रमुख खेलाडी मानिन्छन्।

एक खेल पनि नजिति विश्वकपमा पुगेको स्विडेन

स्विडेनले निकै संघर्षपूर्ण यात्रापछि विश्वकपमा स्थान बनाएको हो। छनोट चरणमा आफ्नो समूहको अन्तिम स्थानमा रहँदै एक खेल पनि जित्न नसकेको स्विडेनलाई राष्ट्र लिगमा गरेको प्रदर्शनले प्लेअफमा पुग्ने अवसर दिलाएको थियो।

नयाँ प्रशिक्षक ग्राहम पोटरको नेतृत्वमा स्विडेनले प्लेअफमा युक्रेन र पोल्यान्डलाई हराउँदै विश्वकपको टिकट पक्का गर्‍यो।

टोलीमा युरोपका चर्चित अग्रपङ्क्तिका खेलाडी अलेक्जान्डर इसाक र भिक्टर ग्योकेरेस छन्। साथै लुकास बेर्गभाल र एन्थोनी एलाङ्गा पनि टोलीका महत्त्वपूर्ण सदस्य हुन्।

सन् १९५८ को विश्वकपमा उपविजेता बनेको स्विडेनले अमेरिकामा आयोजित १९९४ विश्वकपमा सेमिफाइनलसम्मको यात्रा तय गरेको थियो।

पहिलोपटक समूह चरण पार गर्ने लक्ष्यमा ट्युनिसिया

ट्युनिसिया सातौँ पटक विश्वकप खेल्दैछ र पहिलोपटक समूह चरण पार गर्ने लक्ष्य राखेको छ।

चार वर्षअघि कतारमा सम्पन्न विश्वकपमा ट्युनिसियाले तत्कालीन च्याम्पियन फ्रान्सलाई १–० ले पराजित गरेको थियो भने डेनमार्कसँग बराबरी खेलेको थियो। तर, समूहमा तेस्रो हुँदै नकआउट चरणमा पुग्न असफल रह्यो।

अफ्रिका राष्ट्र कपमा निराशाजनक प्रदर्शनपछि सामी त्राबेल्सीको स्थानमा साब्री लामुसीलाई प्रशिक्षक नियुक्त गरिएको हो।

२१ वर्षीय खालिल अयारी यस सिजन फ्रान्सको प्रतिष्ठित क्लब पेरिस सेन्ट–जर्मेन (पीएसजी) मा आबद्ध भएका छन् र हालै राष्ट्रिय टोलीमा स्थान बनाउन सफल भएका छन्।

समूह ‘एफ’ मा नेदरल्यान्ड्सलाई शीर्ष दाबेदार मानिए पनि जापान, स्विडेन र ट्युनिसियाले कडा चुनौती दिने अपेक्षा गरिएको छ। अब सबैको चासो नेदरल्यान्ड्सले यसपटक आफ्नो दशकौँ पुरानो विश्वकप उपाधिको सपना पूरा गर्न सक्छ कि सक्दैन भन्नेमा केन्द्रित हुनेछ।