८ खेलपछि धीरेन्द्रको प्रतिबन्ध फुकुवा, सरस्वतीले पायो ३ अंक

काठमाडौं। ‘बी’ डिभिजन लिग सरस्वती युथ क्लबले अन्ततः न्याय पाएको छ। अखिल नेपाल फुटबल संघ (एन्फा)ले अनिश्चितकालीन प्रतिबन्ध लगाएको फरवार्ड धीरेन्द्रबहादुर शाहलाई खेल्न दिने निर्णय गरेको हो। 

एन्फाले मंगलबार सरस्वतीलाई पत्र पठाउँदै खेल्न योग्य रहेको जानकारी दिएको छ। योसँगै उनले लिगमा बाँकी रहेको तीन खेल खेल्न पाउने भएका छन्। सरस्वतीले मंगलबार नै वीरगञ्ज युनाइटेडसँग खेल्दैछ। वीगञ्ज १० खेलबाट १६ अंकसहित तेस्रो स्थानमा छ। 

‘आठ खेल सक्किएपछि बल्ल एन्फाले आफ्नो गल्ती महसुस गरेको छ। हामीले सोमबार बेलुका एन्फाले धीरेन्द्र खेल्न योग्य रहेको जानकारी दिएको थियो। अहिले इन्द्रमान तुलाधारले पत्र पठाएका छन्,’ सरस्वतीका अध्यक्ष उत्तमराज भण्डारीले खेलपाटीसँग भने।

सरस्वतीको खोसिएको तीन अंक पनि फिर्ता भएको छ। योसँगै सरस्वतीको १० खेलबाट १३ अंक पुगेको छ। ‘नयाँबस्ती र सरस्वतीबीच भएको खेलका सन्दर्भमा प्रतियोगिता समितिले गरेको निर्णय तथा अनुशासन समितिमार्फत भएको निर्णयमा सरस्वतीले गरेको अपिल उपर निर्णय बमोजिम उक्त दुवै निर्णय बदर गरी फिफा कनेक्ट प्रणाली अनुसार दर्ता कायम रहेको खेलाडीलाई योग्य रूपमा राखी सोही अनुरुप गर्न, गराउन पत्राचार गर्नु भनी निर्णय भइ आएको हुँदा सोही अनुसार गर्न यस पत्र जानकारीका लागि पठाइएको छ,’ एन्फा प्रमुख कार्यकारी अधिकृत (सिइओ) इन्द्रमान तुलाधरले सरस्वतीलाई पठाएको पत्रमा भनिएको थियो।

एन्फाका अनुसार नयाँबस्ती युथ क्लबका टिम म्यानेजर विकास राईले चैत ७ गते आफ्नो क्लबसँग भएको खेलमा शाहविरुद्ध उजुरी गरेका थिए। उक्त उजुरीउपर छानबिन गर्दा धीरेन्द्रले विभिन्न मितिमा टुसाल र सरस्वतीसँग लिग खेल्न सम्झौता गरेको देखिएको दाबी एन्फाको थियो।

‘निज खेलाडी धीरेन्द्रबहादुर शाहलाई अर्को निर्णय नभएसम्मका लागि जारी लिग फुटबल प्रतियोगिताका बाँकी म्याचबाट निलम्बन गरेको व्यहोरा जानकारी गराउँदछु,’ सिइओ इन्द्रमान तुलाधरले पठाएको पत्रमा भनिएको थियो।

धीरेन्द्र सरस्वतीका उत्कृष्ट खेलाडी हुन्। उनले सुरुआती दुई खेलमा दुई गोल गरेका थिए। उनले बाँसबारी क्लबविरुद्धको २–१ र  नयाँ बस्ती युथ क्लबविरुद्धको १–० को जितमा गोल गरेका थिए। दुई लगातार जितसहित सरस्वतीले लिग सुरुआत गरेको थियो। तर, सरस्वती क्लब र उनीमाथि एन्फा र नयाँ बस्तीले राजनीति प्रतिशोध प्रतिशोध साध्दै चेपुवामा पारेको थियो। लगत्तै सरस्वती उच्च अदालत पाटन पुगेको थियो।

धीरेन्द्रमाथि प्रतिबन्ध लागेसँगै सरस्वतीले लगातार ७ खेलमा हार बेहोरेको थियो। तर, १०औं खेलमा पुगेर सरस्वतीले ब्रिगेट ब्वाइज क्लबमाथि ३–१ को नतिजा निकाल्दै रेलिगेसन टार्ने आशा देखाएको थियो। एन्फाले गल्ती स्वीकार गरेसँगै सरस्वतीलाई राहत पुगेको छ। तर, सरस्वती क्षतिपूर्ति माग्ने दाउमा देखिन्छ।

‘यत्रो लगानी गरेर लिग खेलेका छौं। एन्फाले छानबिनबिना नै सरस्वतीलाई प्रतिशोध साधेको छ। त्यसैले हामी यो कुरालाई त्यतिकै छाड्दैनौं,’ भण्डारीले भने।