सरस्वतीका धीरेन्द्रलाई मैदान उत्रिन एन्फाको रोक !

काठमाडौं। अखिल नेपाल फुटबल संघ (एन्फा)ले सरस्वती युथ क्लबका फरवार्ड धीरेन्द्रबहादुर शाहलाई सहिद स्मारक ‘बी’ डिभिजन लिग खेल्न रोकेको छ।

एन्फाले क्लब अध्यक्ष उत्तमराज भण्डारीलाई पत्र पठाउँदै टुसाल युवा क्लबमा अनुबन्ध भएका शाहलाई सरस्वतीले खेलाएको भन्दै अर्को निर्णय नआउँदासम्म खेल्न रोक लगाएको हो।

एन्फाका अनुसार नयाँ बस्ती युथ क्लबका टिम म्यानेजर विकास राईले चैत ७ गते आफ्नो क्लबसँग भएको खेलमा शाहविरुद्ध उजुरी गरेका थिए। उक्त उजुरीउपर छानबिन गर्दा शाहले विभिन्न मितिमा टुसाल र सरस्वतीसँग लिग खेल्न सम्झौता गरेको देखिएको दाबी एन्फाको छ।

‘निज खेलाडी धीरेन्द्रबहादुर शाहलाई अर्को निर्णय नभएसम्मका लागि जारी लिग फुटबल प्रतियोगिताका बाँकी म्याचबाट निलम्बन गरेको व्यहोरा जानकारी गराउँदछु,’ प्रमुख कार्यकारी अधिकृत इन्द्रमान तुलाधरले पठाएको पत्रमा भनिएको छ।

धीरेन्द्र सरस्वतीका उत्कृष्ट खेलाडी हुन्। उनले जारी लिगमा दुई खेलमा दुई गोल गरेका छन्। उनले बाँसबारी क्लबविरुद्धको २–१ र  नयाँ बस्ती युथ क्लबविरुद्धको १–० को जितमा गोल गरेका थिए।

दुई लगातार जितसहित सरस्वतीले लिग सुरुआत गरेको थियो। तर, तेस्रो खेलमा टुसाल युथ क्लबसँग १–० र चौथो खेलमा झापा फुटबल क्लबसँग २–० ले पराजित हुन पुगेको थियो। सरस्वतीले दुई खेलबाट ६ अंक पुर्‍याएको छ। यी पराजित भएका दुवै खेलमा धीरेन्द्र मैदान उत्रिन पाएका थिएनन्।