काठमाडौं । सुवास तामाङले फाल्डो सिरिज जुनियर गल्फ प्रतियोगिताको पहिलो दिन सोमबार सुरुवाती अग्रता बनाएका छन्।
गोकर्ण गल्फ क्लबमा एक अण्डर ७१ स्कोर कार्डसहित सुवासले पुरुषतर्फ पहिलो दिन अग्रता बनाएका हुन् । पहिलो दिन सुवासले साबिकको विजेता शुक्र बहादुर राईलाई पछि बनाए । २ ओभर ७४ स्कोरकार्डसहित शुक्र दोस्रो स्थानमा रहेका छन् ।
यस्तै १७ देखि २१ बर्ष उमेर समूहको पुरुषमा विपिन तामाङ ८ ओभर ८० स्कोर कार्डसहित शीर्ष स्थानमा छन् । ९ ओभर ८१ स्कोर बनाएका सुमन नेपाल दोस्रो स्थानमा छन् ।
१२ देखि १६ बर्ष उमेर समूहको पुरुषमा विनोद तामाङ शीर्ष स्थानमा रहदा साम डोउबार्ड र रितेश तामाङ संयुक्त दोस्रो स्थानमा छन् ।
महिलातर्फ प्रतिभा राईले १३ ओभर ८५ स्कोरसहित शीर्ष स्थान हात पारेका छन् । करिश्मा शाह दोस्रो र जुनी गुरुङ तेस्रो स्थानमा छन् ।
आगामी पुस २५ गतेसम्म संचालन सिरिजमा २६ खेलाडीले प्रतिस्पर्धा गरिरहेका छन् ।
नेपाल गल्फ एसोसियसनले पछिल्लो पाँच बर्षबाट बार्षिक हुँदै आएको यस प्रतियोगिता फाल्डो सिरिज एसियाको छनोटको रुपमा रहेको छ ।
सिरिजको विजेताले भियतनामको लगुना लङ दानङ गल्फ कोर्षमा सन् २०१९ मार्चमा हुने फाइनल चरणमा छनोट हुनेछन् ।
