एमबाप्पेको पेनाल्टी रोक्दै रियलमाथि बेटिसको जित

काठमाडौं। गोलरक्षक अल्भारो भालेसले इन्ज्युरी समयमा किलियन एमबाप्पेको पेनाल्टी बचाएपछि रियल बेटिसले रियल मड्रिडलाई स्पेनिस ला लिगामा शुक्रबार १–० ले पराजित गरेको छ।

ला कार्टुजा रंगशालामा भएको खेलमा ट्रोय पारोटले ८१औं मिनेटमा गरेको गोल नै निर्णायक बन्यो। बेटिसविरुद्धको हार रियलका प्रशिक्षक जोसे मोरिन्होको यस सिजन बेन्चमा फर्किएपछिको पहिलो पराजय हो।

खेलको अन्तिम समयमा रियलले बराबरी गर्ने अवसर पाएको थियो। भिनिसियस जुनियरले बायाँतर्फबाट बल लिएर गोललाइनतर्फ अघि बढ्ने क्रममा बेटिसका डिफेन्डर नातानले हतारमा ट्याकल गर्दा पेनाल्टी प्राप्त भयो।

पेनाल्टी लिन आएका एमबाप्पेले केही क्षण रोकिँदै बलको दिशा तय गरे। उनले तल्लो बायाँतर्फ प्रहार गरे पनि भालेसले डाइभ गर्दै बल नियन्त्रणमा लिए। त्यससँगै बेटिसले अप्रत्याशित जित सुनिश्चित गर्‍यो।

भालेसले खेलअघि एमबाप्पेले प्रहार गर्ने पेनाल्टीको अध्ययन गरेको र आफूले सही दिशा अनुमान गर्न सफल भएको बताए।

‘हामीलाई लागिरहेको थियो कि हामीले यो रोक्न सक्छौं, तर त्यसका लागि केही भाग्य पनि चाहिन्छ,’ भालेसले भने‚ ‘उनी गोलरक्षकलाई चाँडै निर्णय गर्न बाध्य पार्न निकै माहिर छन् र आफूले कहाँ प्रहार गर्दैछु भन्ने संकेत दिँदैनन्। म भाग्यमानी रहें, त्यसलाई रोक्न सकें।’

भालेसले खेलभर उत्कृष्ट प्रदर्शन गरेका थिए। उनले पहिलो हाफमै जुड बेलिङ्घमको हेडरलाई डाइभ गर्दै रोकेका थिए। एमबाप्पेको पेनाल्टी बचाउनु भने उनको प्रदर्शनको सबैभन्दा महत्त्वपूर्ण क्षण बन्यो। पेनाल्टी बचाएपछि उनले उत्सव मनाउँदै एमबाप्पेसँग छाती ठोक्काएका थिए।

एमबाप्पेले यस सिजनको सुरुआत भने प्रभावशाली रूपमा गरेका छन्। उनले तीनमध्ये दुई खेलमा गोल गरेका छन्, जसमा एक खेलमा ह्याट्रिकसमेत गरेका थिए।

तर‚ सेभियामा भएको खेलमा उनी आफ्नो उत्कृष्ट लयमा देखिएनन्। पेनाल्टी गुमाउनुका साथै पहिलो हाफमा भिनिसियसले गोलरक्षक भालेसलाई आफ्नो स्थानबाट बाहिर निकालेर दिएको अवसरमा उनले लगातार दुईपटक प्रहार गरे पनि दुवै प्रयास बेटिसका फरक–फरक डिफेन्डरलाई लागेर रोकिएका थिए। एमबाप्पेको अर्को प्रहार गोलको फ्रेममा लागेर बाहिरिएको थियो।

यस समरममा भएको विश्वकपमा सर्वाधिक गोलकर्ता बनेका एमबाप्पेले रियलका लागि मंगलबार च्याम्पियन्स लिगको सुरुआती खेलमा सुधार गर्ने अवसर पाउनेछन्। उक्त खेलमा रियलले इन्टर मिलानको सामना गर्नेछ।