एसियन गेम्स तयारी गर्न योंङगी र इभाना थाइल्यान्ड प्रस्थान

आगामी २०औँ एसियन गेम्स, नागोया–जापानको तयारीका लागि नेपाली राष्ट्रिय टेबल टेनिस खेलाडी योंङगी पौडेल र इभाना थापा थाइल्यान्डको बैंककस्थित थोनबुरी विश्वविद्यालयमा प्रशिक्षणका लागि प्रस्थान गरेका छन्।

उनीहरूले सेप्टेम्बर ४ देखि १५ गतेसम्म थोनबुरी विश्वविद्यालयमा विशेष प्रशिक्षण लिनेछन्। उक्त प्रशिक्षणले आगामी एसियन गेम्सका लागि महत्वपूर्ण योगदान पुग्ने अपेक्षा गरिएको छ।

प्रशिक्षणका लागि प्रस्थान गर्नुअघि त्रिभुवन अन्तर्राष्ट्रिय विमानस्थलमा राष्ट्रिय खेलकुद परिषद्की कार्यकारी समिति सदस्य सिक्का सुवाल श्रेष्ठ तथा अखिल नेपाल टेबल टेनिस संघका कोषाध्यक्ष ज्याकी महर्जनले खेलाडीहरूलाई बिदाइ गर्दै सफल प्रशिक्षण तथा आगामी एसियन गेम्सका लागि शुभकामना व्यक्त गरे।

नेपालको प्रतिनिधित्व गर्दै एसियन गेम्सको तयारीमा रहेका योंङगी र इभानाले थाइल्यान्डको प्रशिक्षणबाट उत्कृष्ट अनुभव हासिल गरी प्रतियोगितामा राम्रो प्रदर्शन गर्ने लक्ष्य राखेका छन्।