आर्सनल छाड्दै अल हिलाल लागे मार्टिनेली

काठमाडौं। ब्राजिलका फरवार्ड गाब्रियल मार्टिनेलीले आर्सनलसँगको सात वर्ष लामो यात्रा टुंग्याउँदै बिहीबार साउदी प्रो लिग क्लब अल हिलालमा आबद्ध भएका छन्।

आर्सनलले सामाजिक सञ्जाल एक्समार्फत उनी साउदी जान लागेको घोषणा गरेको हो। ‘सबै कुराका लागि धन्यवाद र शुभकामना, गाबी,’ आर्सनलले लेखेको छ।

स्थानान्तरण रकम सार्वजनिक गरिएको छैन। तर‚ सञ्चारमाध्यमका अनुसार अल हिलालले मार्टिनेलीका लागि ६ करोड पाउन्ड (८ करोड १२ लाख अमेरिकी डलर) तिरेको छ। योसँगै २५ वर्षीय मार्टिनेलीलाई आर्सनलबाट बाहिरिने सबैभन्दा महँगो खेलाडी बनेका छन्।

यसअघि आर्सनलबाट सबैभन्दा ठूलो रकममा बाहिरिएका खेलाडी एलेक्स अक्सलेड–चेम्बरलेन थिए। उनी २०१७ मा ३ करोड ५० लाख पाउन्ड (४ करोड ६३ लाख अमेरिकी डलर) मा लिभरपुल पुगेका थिए।

बायाँतर्फ खेल्ने अर्का फरवार्ड लेआन्ड्रो ट्रोसार्ड गत महिना बेसिक्टासमा स्थानान्तरण भएका थिए। त्यसलगत्तै मार्टिनेली साउदी प्रो लिग जाने निर्णय भएको हो।

आर्सनलले क्लब ब्रुगबाट क्रिस्टोस जोलिसलाई अनुबन्ध गरेको छ। तर, मार्टिनेली र ट्रोसार्ड दुवै बाहिरिएपछि टोलीको बायाँतर्फको आक्रमण कमजोर हुन सक्ने देखिएको छ।

यस सिजन एबेरेची एजेले बायाँतर्फको फरवार्डका रूपमा बढी खेल्नेछन्। क्लबभित्र भने इंग्ल्यान्डका नानी माडुके र बुकायो साकाले पनि उक्त स्थानमा खेल्न सक्ने विश्वास छ।

मार्टिनेलीले आर्सनलका लागि २७८ खेल खेले। तर‚ गत महिना म्यानचेस्टर सिटीविरुद्धको कम्युनिटी शिल्ड जित्दा उनी टोलीमा परेनन्। त्यसपछि कोभेन्ट्री र एस्टन भिल्लाविरुद्धको प्रिमियर लिग खेलमा पनि उनलाई टोलीबाहिर राखिएको थियो।

आर्सनलका पूर्वस्ट्राइकर इयान राइटले मार्टिनेलीप्रति गरिएको व्यवहारले आफूलाई असहज महसुस गराएको बताएका थिए। उनका अनुसार मार्टिनेलीले अझ बढी सम्मान पाउनुपर्ने थियो।

मार्टिनेलीले ब्राजिलका लागि २७ खेल खेलेका छन्। प्रिमियर लिगको स्थानान्तरण विन्डो मंगलबार बन्द भइसकेको छ। तर‚ साउदी प्रो लिगको स्थानान्तरण विन्डो आइतबारसम्म खुला रहनेछ।