बायर्नको जितमा केनको २ गोल
काठमाडौं। डिफेन्डिङ च्याम्पियन बायर्न म्युनिखले दोस्रो डिभिजनको ओस्नाब्रुकलाई ४–१ ले हराउँदै बिहीबार जर्मन कपको दोस्रो चरणमा स्थान बनाएको छ। बायर्नको जितमा ह्यारी केनले दुई गोल गरे।
जर्मनीका स्टार जमाल मुसियाला बायर्नको टोलीमा थिएनन्। न्युरोलोजिकल समस्याका कारण प्रि–सिजनका दुई खेलमा मैदानमै ढलेपछि उनी त्यसयता टोलीबाट बाहिर रहँदै आएका छन्।
बायर्नका प्रशिक्षक भिन्सेन्ट कोम्पानीले शनिबार बढुवा भएको शाल्केविरुद्ध हुने लिग खेलमा मुसियाला खेल्न सक्ने सम्भावना रहेको बताए।
‘तर‚ म उनीमाथि थप दबाब सिर्जना गर्न चाहन्नँ,’ कोम्पानीले भने। तल्लो डिभिजनको टोलीविरुद्ध खेल्दा कोम्पानीले ठूलो संख्यामा खेलाडी परिवर्तन गर्ने विकल्प रोजेनन्।
उनले केनसँगै लुइस डियाज र माइकल ओलिसेलाई अग्रपंक्तिमा उतारे। यसैगरी पीएसभी आइन्डहोभनबाट नयाँ अनुबन्धित इस्माइल साइबारीले बायर्नका लागि पहिलोपटक सुरुआती टोलीबाट खेले।
ओस्नाब्रुकका रोबिन माइसनरले खेलको सुरुआतमै उत्कृष्ट गोल गर्दै घरेलु टोलीलाई अग्रता दिलाए। उनले करिब ३० मिटर टाढाबाट प्रहार गर्दै बललाई पोस्टको माथिल्लो दायाँ कुनामा पुर्याएका थिए। गोलपछि केन र बायर्नका गोलरक्षक जोनास उर्बिगले समेत माइसनरको प्रशंसा गर्दै उनलाई बधाई दिए।
त्यसको केही समयपछि केनले गोल गर्दै खेल बराबरीमा ल्याए। त्यसपछि २४औं मिनेटमा टम बिस्कोफले गोल गर्दै बायर्नलाई २–१ को अग्रता दिलाए।
बायर्नले खेलको नतिजा सुनिश्चित गर्न ७३औं मिनेटसम्म कुर्नुपर्यो। ओलिसेले गोल गर्दै टोलीको अग्रता ३–१ बनाए। त्यसपछि केनले पेनाल्टीमार्फत गोल गर्दै बायर्नको ४–१ को जित सुनिश्चित गरे।
