मेसीको सम्मानमा १०औं मिनेटमा खेल एक मिनेट रोकिने

काठमाडौं। अर्जेन्टिनामा यस सप्ताहन्त हुने सबै फुटबल खेल १०औं मिनेटमा एक मिनेट रोकिने भएका छन्।

अर्जेन्टिना फुटबल संघ (एएफए) ले राष्ट्रिय टोलीबाट सन्यासको घोषणा गरेका सुपरस्टार लिओनल मेसीको सम्मानमा उक्त समयमा एक मिनेट ताली बजाउने कार्यक्रम तय गरेको हो।

मेसीले सोमबार अर्जेन्टिनाको राष्ट्रिय टोलीबाट सन्यास लिने घोषणा गरेका थिए। ३९ वर्षीय मेसीले अर्जेन्टिनाका लागि खेल्दा अधिकांश समय १० नम्बरको जर्सी लगाएका छन्।

एएफएले बुधबार राति जारी गरेको विज्ञप्तिमा पुरुष र महिला दुवैका सबै डिभिजन तथा विधाका आगामी खेलमा पहिलो हाफको १०औं मिनेटमा खेल रोकेर मेसीको राष्ट्रिय टोलीसँगको करिअरको सम्मानमा एक मिनेट ताली बजाउने जनाएको छ।

त्यसैगरी, स्क्रिन जडान गरिएका रंगशालामा खेल सुरु हुनुअघि एएफएको आधिकारिक भिडियो पनि प्रसारण गर्न निर्देशन दिइएको छ।

इन्टर मियामीका स्टार मेसीले यसै ग्रीष्ममा भएको विश्वकपमा अर्जेन्टिनालाई उपविजेता बनाउन महत्वपूर्ण भूमिका खेले। आठ खेलमा उनले आठ गोल गरेका थिए। यससँगै उनको अन्तर्राष्ट्रिय गोलसंख्या १२५ पुगेको छ, जसमा विश्वकपमा गरेका २१ गोल पनि समावेश छन्।

मेसीले सोमबार इन्स्टाग्राममा राष्ट्रिय टोलीबाट सन्यासको घोषणा गर्दै आफूले धेरै सोचविचार गरेपछि यो निर्णय लिएको बताएका थिए। उनले राष्ट्रिय टोलीका लागि खेल्दा आफूले सधैं सक्दो प्रयास गरेको र मैदानमा सबै कुरा दिएको उल्लेख गरेका थिए।

यो मेसीको दोस्रो अन्तर्राष्ट्रिय सन्यास हो। सन् २०१६ मा चिलीविरुद्ध कोपा अमेरिकाको फाइनलमा पराजित भएपछि उनले पहिलोपटक अन्तर्राष्ट्रिय फुटबलबाट सन्यासको घोषणा गरेका थिए। तर पछि निर्णय फिर्ता लिँदै उनले अर्जेन्टिनालाई २०२२ को विश्वकप तथा २०२१ र २०२४ को कोपा अमेरिका उपाधि जिताउन नेतृत्व गरे।

मेसीले मेजर लिग सकर (एमएलएस) मा जारी सिजन नै आफ्नो अन्तिम सिजन हो वा होइन भन्नेबारे भने केही बताएका छैनन्।

विश्वकै उत्कृष्ट खेलाडीका रूपमा आठपटक बालोन डी’ओर जितेका मेसी अहिले इन्टर मियामीमा चौथो सिजन खेलिरहेका छन्। गत सिजन उनले मियामीलाई पहिलोपटक एमएलएस कप उपाधि जिताउन नेतृत्व गर्नुका साथै लगातार दोस्रोपटक लिगको सर्वोत्कृष्ट खेलाडी (एमभीपी) को अवार्ड जितेका थिए।