मेसीलाई फेरि फर्काउन चाहन्छ अर्जेन्टिना

काठमाडौं। अर्जेन्टिनाका स्टार फुटबलर लिओनल मेसीले राष्ट्रिय टोलीबाट सन्न्यासको घोषणा गरिसकेका छन्। उनको अन्तर्राष्ट्रिय करिअरको अन्तिम खेल स्पेनविरुद्धको विश्वकप फाइनल थियो।

उक्त खेलमा अर्जेन्टिना १–० ले पराजित भएको थियो। सो खेल सकिएको दुई दिनपछि नै मेसीले सन्न्यास लिएका थिए। तर, बुबाको मृत्युपछि मात्रै उनले उक्त कुरा सार्वजनिक गरेका थिए।

तर, विश्व फुटबलमै तहल्का मच्चाएका मेसीले यसरी राष्ट्रिय टोलीबाट बिदा लिने अपेक्षा धेरैले गरेका थिएनन्। त्यसैले अर्जेन्टिना फुटबल संघ (एएफए) ले देशका महान् खेलाडीलाई उचित सम्मानसहित बिदाइ गर्न चाहेको छ।

अर्जेन्टिनाका सञ्चारमाध्यमका अनुसार मेसीको राष्ट्रिय टोलीसँगको यात्रा औपचारिक रूपमा अन्त्य भए पनि उनलाई घरेलु मैदानमै विशेष बिदाइ दिने योजना अघि बढिरहेको छ। आगामी फिफा विन्डोमा मेसीका लागि विशेष खेल आयोजना गर्ने विषयमा छलफल भइरहेको छ।

यद्यपि, योजना अहिलेसम्म निश्चित भइसकेको छैन। एएफएले सबैभन्दा पहिले मेसी स्वयं अर्को एउटा खेल खेल्न इच्छुक छन् कि छैनन् भन्ने यकिन गर्न चाहेको छ। योजना कार्यान्वयन भए अर्जेन्टिनाका समर्थकले घरेलु मैदानमै आफ्ना महान् खेलाडीलाई प्रत्यक्ष रूपमा बिदाइ गर्ने अवसर पाउनेछन्।

आगामी फिफा विन्डो सेप्टेम्बर २१ देखि अक्टोबर ६ सम्म चल्नेछ। यस अवधिमा अर्जेन्टिनाले दुई वा तीनवटा मैत्रीपूर्ण खेल खेल्ने तयारी गरेको छ। केही रिपोर्टमा अर्जेन्टिनाले तीन वा चारवटासम्म खेल खेल्न सक्ने उल्लेख गरिएको छ। तर‚ प्रतिद्वन्द्वी टोली, मिति र खेलस्थल भने अहिलेसम्म तय भएको छैन।

अर्जेन्टिनाका पत्रकार पाब्लो ग्राभेलोने भन्छन्,‘सबै संकेतले मेसीले घरेलु मैदानमा अर्जेन्टिनाका लागि आफ्नो अन्तिम खेल खेल्ने सम्भावना देखाएको छ।’

सम्भावित खेलस्थलका रूपमा राजधानी ब्युनस आयर्सस्थित एस्तादियो मोनुमेन्ताललाई हेरिएको छ। अर्जेन्टिनाले नियमित रूपमा घरेलु खेल खेल्ने यो मैदानमा मेसीलाई बिदाइ गर्ने सम्भावना बढी रहेको बताइएको छ। मेसीको जन्मस्थान रोसारियोमा रहेको मैदानमा खेल आयोजना गर्ने सम्भावना पनि छ।

टीएनटी स्पोर्ट्स अर्जेन्टिनाका म्याक्सिमिलियानो ग्रिलोका अनुसार सेप्टेम्बरमा दुई वा तीनवटा मैत्रीपूर्ण खेल आयोजना गर्ने विषयमा अर्जेन्टिना काम गरिरहेको छ। उनका अनुसार ती खेल ब्युनस आयर्स, कोर्दोबा वा रोसारियोमा हुन सक्छन्।

एएफएले यस विषयमा अहिलेसम्म औपचारिक घोषणा गरेको छैन। त्यसैले मेसीलाई घरेलु मैदानमा बिदाइ गर्ने योजना अहिले चर्चामै सीमित छ। अन्तिम निर्णयअघि एएफएले मेसीसँग छलफल गरेर उनी उक्त विशेष खेलमा सहभागी हुन इच्छुक छन् कि छैनन् भन्ने टुंगो लगाउनुपर्नेछ।