काठमाडौँ। ‘जस्तो गुरु, त्यस्तै शिष्य’! यो भनाइ सनराइजर्स हैदराबादका नयाँ स्टार अभिषेक शर्मालाई निकै सुहाउँछ। युवा क्रिकेटर अभिषेक भारतीय पूर्वअलराउन्डर तथा महान् क्रिकेटर युवराज सिंहलाई आफ्नो गुरु मान्छन्। युवराजजस्तै अभिषेक पनि पञ्जाबबाट आएका हुन्।
इन्डियन प्रिमियर लिग (आईपीएल)मा अभिषेकले बुधबार मुम्बई इन्डियन्सविरुद्ध १६ बलमा अर्धशतक बनाएर आफ्नो क्षमताको अर्को प्रमाण दिएका छन्। तर, युवराजले टी–२० विश्वकपमा १२ बलमा अर्धशतक बनाएर कायम गरेको कीर्तिमान भने उनले तोड्न सकेनन्।
४ सेप्टेम्बर २००० मा अमृतसरमा जन्मेका अभिषेकका बुबा राजकुमार शर्मा पनि क्रिकेटर हुन्। राजकुमारको लक्ष्य जसरी भएपनि छोरालाई क्रिकेटर नै बनाउने थियो। त्यसैले अभिषेकलाई उनले क्रिकेट मैदानसम्म ल्याउन खुब मिहिनेत गरे।
स्थानीय स्पोर्ट्स क्लबमा अभिषेकलाई अभ्यास गराउँथे। आफ्नो छोरामा क्षमता भए/नभएको जाँच्न स्थानीय टोलीसँग प्रतिस्पर्धा गर्न लगाउँथे।
अभिषेकले दिल्ली पब्लिक स्कुल अमृतसरमा पढेका हुन्। पढाइमा उनी टपर थिए। कक्षा १० को बोर्ड परीक्षामा उनले ८० प्रतिशत अंक ल्याएका थिए। अभिषेकले जीडी गोयन्का विश्वविद्यालयमा पनि अध्ययन गरेका छन्। सन् २०१५-१६ मा भएको यू–१६ विजय मर्चेन्ट ट्रफीमा पञ्जाबका लागि उनले उत्कृष्ट प्रदर्शन गरेका थिए।
अभिषेकले यू–१९ एसिया कपमा भारतीय टोलीको कप्तानी गरिसकेका छन्। सन् २०१८ को आईपीएलमा तत्कालीन दिल्ली डेयरडेभिल्स (दिल्ली क्यापिटल)ले अभिषेकलाई ५५ लाख भारुमा किनेको थियो। आईपीएलको डेब्यू खेलमा अभिषेकले १९ बलमा ४६ रनको इनिङ्स खेलेर आफ्नो क्षमता प्रस्तुत गरिसकेका थिए।
सनराइजर्स हैदराबादले मुम्बईविरुद्ध आईपीएल इतिहासमा सर्वाधिक २७७ रन बनाएको थियो। ‘म्यान अफ द म्याच’ अभिषेकले २३ बलमा ७ छक्का र ३ चौकासहित ६३ रनको उत्कृष्ट इनिङ्स खेले। अभिषेकभन्दा आधा घण्टाअघि उनका सहकर्मी ट्रेभस हेडले १८ बलमा अर्धशतक बनाएर आफ्नो टोलीका लागि नयाँ कीर्तिमान बनाएका थिए। तर, यो कीर्तिमान अभिषेकको अगाडि छायामा पर्यो।
आईपीएलको सबैभन्दा छिटो अर्धशतक राजस्थान रोयल्सका यशस्वी जसवालको नाममा छ। उनले १३ बलमा यो कीर्तिमान पूरा गरेका थिए। दोस्रो स्थानमा केएल राहुल र प्याट कमिन्स छन्। उनीहरूले १४ बलमा अर्धशतक बनाएका छन् भने युसुफ पठान, सुनिल नारायण र निकोलस पूरनले १५ बलमा।
अभिषेकले अहिलेसम्म ९० टी–२० खेल खेलेर २ हजार २८२ रन बनाएका छन्। उनको अधिकतम स्कोर ११२ रन छ। अभिषेक गुरु युवराजजस्तै स्पिन बलिङ पनि गर्छन्। टी–२० मा उनले ३० विकेट लिएका छन्। संकटको समयमा कप्तानहरू बलिङको लागि अभिषेकलाई नै खोज्छन्। यही लय कायम रहे अर्को पटक भारतीय टोलीमा उनले पक्कै स्थान बनाउने छन्।
