एनएसए कप राष्ट्रिय पौडी बुधबार

काठमाडौं । नेपाल पौडी संघ र बागमती प्रदेश खेलकुद विकास परिषद्को संयुक्त आयोजनामा २६ औं संस्करणको एनएसए नेपाल पौडी संघ कप राष्ट्रिय पौडी प्रतियोगिता बुधबार र बिहिबार हुने भएको छ ।

सातदोवाटोस्थित स्पोर्टस कम्प्लेक्समा रहेको हिटिङ्ग पौडी पोखरीमा आयोजना हुने प्रतियोगितामा उमेर समूह र खुल्ला गरि कुल ५१ विधामा प्रतिस्पर्धा हुने नेपाल पौडी संघका अध्यक्ष अशोक बज्राचार्यले जानकारी गराएका छन् ।

उमेर समूह अन्तरगत १० बर्ष मूनी, १२ बर्ष मूनी, १४ बर्ष मूनी र १७ बर्ष मुनीको ५० मिटर फ्रिस्टायल, ब्याक स्ट्रोक, बटरफ्लाई र ब्रेष्ट स्ट्रोक तथा ४ गुणा ५० मिटर फ्रिस्टायल रिले र खुल्लातर्फ ५० मिटर, १०० मिटर २०० मिटर फ्रिस्टायल, ५० मिटर र १०० मिटर ब्याकस्ट्रोक, बटरफ्लाई र ब्रेष्ट स्ट्रोक विधामा प्रतिस्पर्धा गरिने छ ।

उमेर समूह र खुल्ला गरि करिव १ सय ५० खेलाडीहरुले उपाधिका लागि प्रतिस्पर्धा गर्ने अध्यक्ष बज्राचार्यले बताए । उमेर समूहमा उत्कृष्ट अंक हासिल गर्ने शीर्ष ३ टिमलाई च्याम्पियनसिप ट्रफी प्रदान गरिने छ ।

नेपालमा हिटिङ पौडी पोखरीको निर्माण पश्चात नेपाल पौडी संघले पहिलो पटक चिसो मौसममा राष्ट्रिय पौडी प्रतियोगिता आयोजना गर्न लागेको हो । 

पौडी पोखरीको निर्माणले नेपालमा अब सुनसुकै मौसममा पनि प्रशिक्षण गर्न र प्रतियोगिता आयोजना गर्न सकिने भएको छ ।

आगामी दिनमा नेपाली खेलाडीको क्षमता अभिबृद्धिमा निकैनै सहयोग पुग्ने अध्यक्ष बज्राचार्यले बताए ।