किरणको प्रस्ताव, ‘मिलेर जाऔं’, शेर्पाको जवाफ ‘इमेज सुधार्नुस्’

काठमाडौं । फुटबलमा देखिएको जारी गतिरोध अन्त्य गर्ने सन्दर्भमा एन्फाका पूर्व अध्यक्ष कर्माछिरिङ शेर्पा र महासचिव किरण राईबीच भेटवार्ता भएको छ । कार्यसमिति बैठकअघि विवाद बढ्न थालेपछि महासचिवको हैसियतमा किरण राईले पूर्व अध्यक्ष शेर्पासँग सोमबार भेटवार्ता गरेका हुन् । दुवैले भेटघाटको पुष्टि गर्दै फुटबलमा वर्तमान अवस्थाबारे छलफल भएको उल्लेख गरेका छन् ।

महासचिव राईले फुटबलमा आम सहमती जुटाएर अघि बढ्नुपर्ने प्रस्ताव शेर्पा समक्ष राखेका थिए । ‘न्युनतम के हुन्छ अथवा अधिकतम के हुन्छ, एउटा सहमती जुटाएर जानुपर्यो । फुटबललाई राम्रोसँग अघि बढाउन वर्तमान अध्यक्ष समेत सकारात्मक हुनुहुन्छ । यसमा तपाईको पनि सकारात्मक भुमिका हुनुपर्यो ।’ राईले प्रस्ताव गरेका थिए । 

उनले फुटबललाई राम्रो बनाउन सहकार्य गर्नुको विकल्प नभएको भन्दै कसरी अघि बढ्ने भनेर शेर्पासँग सोधेका थिए । ‘यसरीनै जाने हो भने कोही ब्यक्तिले जित्ला, कसैले हार्ला । तर फुटबल सक्किन्छ । यसलाई सुधार गर्नुको विकल्प छैन ।’ राईले भनेका थिए ।

छलफलमा पूर्व अध्यक्ष शेर्पाले फुटबलको इमेज सुधार गर्न आग्रह महासचिव राईसँग आग्रह गरेका थिए । ‘फुटबलको इमेजनै बिग्रिएको अवस्थामा छ । सबैभन्दा पहिला यसलाई सुधार गर्नुस् । फुटबलको इमेज नसुधारेसम्म सहकार्य गर्न सकिदैन ।’ छलफलमा शेर्पाले भनेका थिए, ‘सुशासनको कुरा गर्नेले आपतकालिन बैठक राखेर एजेण्डा पास गराएर र लोभी पापीबाट बहुमत पुर्याएर कहिलेसम्म फुटबल चलाउनुहुन्छ ?’

उनले एन्फा नेतृत्वले सबैलाई मिलाएर लैजान आवश्यक रहेको बताएका थिए । ‘मेरो समूहमा भएकै कारण क्षमता भएका साथीहरुलाई जिम्मेवारीबाट बञ्चित गरिएको छ । पेलेर मात्र फुटबल चल्दैन । सबैसँग छलफल गर्नुस्, एजेण्डामा सहमती गर्ने भए फुटबलको इमेज सुधार गर्नुस् ।’ शेर्पाको भनाई थियो । 

उनले उपाध्यक्ष दिर्घबहादुर केसी (कुमार), रुपेश अधिकारी, रमेश ब्यन्जनकार, रबिन चन्द लगायतको नामै लिएर आफ्नो समूहमा भएकै कारण सक्षमहरुलाई जिम्मेवारीबाट बञ्जित गरिएकोमा असन्तुष्टि जनाएका थिए । 

महासचिव राईले आफुहरु मिल्नुको विकल्प नरहेको दोहो¥याउँदै सहमती गरेर अघि बढ्न शेर्पासँग अनुरोध गरेका थिए । उनले सहमती नबनेको खण्डमा तानतुन पारेर फुटबल चलाउनुको विकल्प नहुने कुुरा शेर्पासँग प्रस्टसँग राखेका थिए ।  

शेर्पाले आपतकालिन बैठक राखेर वार्षिक कार्यक्रम पास गरेकोदेखि पूर्वाधार विकासको बजेट रकमान्तर गरेर प्रतियोगिता, कार्यक्रममा खर्च गरिएको भन्दै राईसँग असन्तुष्टि पोखेका थिए । शेर्पाले नेतृत्वलेनै सबैलाई मिलाएर लैजान अग्रसर हुनुपर्ने भन्दै आफ्ना समुहका कार्यसमितिका पदाधिकारी र सदस्यसँग छलफल गरेर अघि बढ्न राईलाई सुझाव दिएका थिए । 

कुनै समय एउटै आन्दोलन र प्यानलबाट फुटबलको सत्तामा उदाएका शेर्पा र वर्तमान अध्यक्ष पंकज बिक्रम नेम्वाङ पछिल्लो समय संवादहिनताको अवस्थामा छन् । शेर्पालाई हराउँदै एन्फाको नेतृत्वमा आएका नेम्वाङलाई फुटबल चलाउनै सकस परिरहेको छ । प्यानल बनाएर चुनावी प्रतिस्पर्धामा उत्रिएका शेर्पा र नेम्वाङको एन्फाभित्र बेग्ला बेग्लै समूह छ । पूर्व अध्यक्ष गणेश थापाको प्यानलबाट चुनाव जितेका अधिकांश पदाधिकारी पछिल्लो समय शेर्पा र नेम्वाङ समूहमा बाँडिएका छन् । आफ्ना भनिएका सबै पदाधिकारी लाखा–पाखा लागेपछि फुटबल बाहिरका मान्छे जम्मा पारेर पूर्व अध्यक्ष थापाले ‘फुटबलमा आमुल परिवर्तनको अभियान’ चलाएर बसेका छन् ।

एन्फाको सत्ता राजनीतिमा बराबरीको हैसियतमा रहेका शेर्पा र नेम्वाङ दुवैसँग स्पष्ट बहुमत देखिदैन । केही अवसरवादीले दुवै समूहमा रहेर चलखेल गर्दै फुटबलबाट प्रशस्त लाभ लगिरहेका छन् । फुटबलमा देखिएको गतिरोधबाट आजित भएका महासचिव राईले पूर्व अध्यक्ष शेर्पासँग भेटेर सहकार्यको प्रस्ताव गरेका हुन् । पछिल्लो भेटले संवादहिनताको अवस्थामा रहेका दुई समूहमा छलफलको ‘ब्रेक थ्रु’ गरेको छ ।