पलेशालाई पारा एथलेट सम्मान

काठमाडौं । एनएसजेएफ बजाज पल्सर स्पोर्ट्स अवार्ड-२०७८ अन्तर्गतको पारा एथलेट सम्मान पारा तेक्वान्दो खेलाडी पलेशा गोवर्धनलाई प्रदान गरिएको छ ।

नेपाल खेलकुद पत्रकार मञ्च (एनएसजेएफ) ले मंगलबार आयोजना गरेको अवार्ड कार्यक्रममा पलेशालाई पारा एथलेट सम्मान प्रदान गरिएको हो ।

पारा एथलेट सम्मानसँगै पलेशाले नगद ५० हजार प्राप्त गरिन् ।

को हुन् पलेशा गोवर्धन ?

पलेशा गोवर्धनको हाँसोमा धेरै थोक मिसिएको छ। उनको ब्यवहार, मेहनत, उनको आत्मविश्वास अनि उनको सफलता।

तेक्वान्दो खेलाडी पलेशालाई 'फरक क्षमताको खेलकुद क्षेत्र'  को रोल मोडल हुन् भन्दा फरक पर्दैन।

१० वर्षको उमेर देखि खेल क्षेत्रमा होमिएकी पलेशालाई शुरुमा लागेको थियो खेलकुद क्षेत्र रमाइलोको लागि मात्रै हो।

जब बुझ्दै गइन्, उनलाई थाहा हुँदै गयो की यहाँ त जीवन जिउने कला लुकेको रहेछ, यो त आफुले आफैलाई चिन्ने माध्यम रहेछ।

थाहै नपाई तेक्वान्दो र खेलकुद क्षेत्र उनको जीवनको टर्निङ प्वाइन्ट बनिसकेको थियो।

जब अन्तर्राष्ट्रिय प्रतियोगितामा पलेशाले प्रतिद्धन्दीसंग भिड्न थालिन्, खेलमात्र होइन,  उनले आफैलाई पनि जित्न थालिन्।

खेल यात्रासंगै उनको घरका भित्ताहरु पदकले सजिन थाल्यो। लजालु स्वभावकी पलेशा यसविचमा आत्मविश्वासी खेलाडी बनिसकेकी थिइन्। हिजो आफु अरु भन्दा फरक र कमजोर छु भन्ने मानसिकता उनीबाट कता कता गायब भइसकेको थियो।

खेलकुद यात्रामा उनले धेरै कुरा सिकिन् थाहा पाइन्

वर्ष २०७८ त उनको खेल जीवनको लागि झनै महत्वपुर्ण बन्यो। सोही वर्ष उनी टोकियो ओलम्पिकमा छानिइन् ।

त्यहाँ उनी झन्डै झन्डै पदकको नजिक पुगिसकेकी थिइन्। तर ९ सेकेन्ड खेल सम्हाल्न नसक्दा पदक विमुख हुनु पर्यो।

यद्यपी नेपाली ओलम्पिकको इतिहासमा २ जना प्रतिद्धन्दीलाई हराएर उनले नयाँ इतिहास भने रचिन्।

टोकियोमा पदक गुम्यो, तर त्यहाँबाट फर्के लगत्तै पलेशाले एसियन युथ पारा गेम्समा स्वर्ण पदक जितिन्।

अब उनी सामान्य पलेशा गोवर्धन होइन, ओलम्पियन पलेशा बनिसकेकी थिइन्। गलामा अन्तर्राष्ट्रिय स्वर्ण पदक थियो।

एक दशकको खेलकुद यात्रामा पलेशाले खेलकुदका धेरै पक्ष बुझिसकेकी छिन्। खेलकुदमा शिक्षाको महत्व धेरै रहेको उनको अनुभव छ। र आफुले सिकेको अनुभव भविष्यमा पारा खेलाडीहरुको भलाईमा प्रयोग गर्ने सपना बुनेकी छिन् पलेशा गोवर्धनले।

झट्ट हेर्दा पलेशा ओलम्पिक खेल्ने एकजना सामान्य खेलाडी लाग्न सक्छ। तर उनले भोगेको खेलकुद र देखेको सपना अरु भन्दा फरक छ।

पारा एथलेट क्षेत्रमा पलेशाले रचेको योगदानको उच्च सम्मान गर्दै नेपाल खेलकुद पत्रकार मञ्च उनलाई प्रदान गर्दछ पल्सर पारा एथलिट सम्मान २०७८ ।